5 Na ki pan na ee Fninyuŋgo kre klɔ mbe sɛ kre, Aaron na u biile pre pe fna, mbe klu mbe le wa, mbe yoŋgo ŋga ki nyuŋgo kre yɔ shiin mu cheche lawee kre tɔ kre saan, mbe ki tɛɛ mbe Nyu nunu daka kre tɔ. 6 Na pe kɔ, mbe pe yurɔ hlɛ chichie kre ka tɛɛ mbe ki tɔ, mbe yoŋgo ŋga ki pe na mbruku yi tɛɛ mbe ki tɔ na. Kena na pe kɔ kre, mbe pe chin mbe kɛɛn nyjɛ ni pie ki tio yire le le yi lawee.

7 Kre kɔkro mbe pe yoŋgo ŋga ki pe na mbruku yi tɛɛ mbe tebru ŋga na pe Nyiɛkpɔɔ Paanu taari kre tɔ. Kena pe chin mbe kotie, na gbɔyirɛ, na taahɛɛ nyjɛ nu pe tuwe ndiom tɛɛn leni, na olive sra simi leyirɛ yire kro taa, yire na blenyini paanu kre ni. 8 Mbe pe yoŋgo nyiɛ piipii tɛɛ mbe yi tɔ, mbe yurɔ hlɛ chichie kre ka tɛɛ mbe yi tɔ, mbe chiin kɛɛn prɔrɔprɔrɔ nyjɛ ni pie ki tio yire le le ki na. 9 Mbe pe yoŋgo ŋga ki pe na mbruku yi tɛɛ mbe kania kaan kre, na kaniɛ yirɛ nyjɛ ni pe yi mɛnyi gbeele yire, na taahɛɛ, na yirɛ nyjɛ nu pe kaniɛ simi leni yire kro tɔ. 10 Kena pe yi kro fo na yurɔ hlɛ chichie kre ka ni, mbe chiin ki taa yira ŋga ki pe na ki jɔɔn yi kre na.

11 Swanyiɛ sragbunu kre, mbe pe ki tɔ na yoŋgo ŋga ki pe na mbruku yi ni, mbe chiin ki tɔ na yurɔ hlɛ chichie ni, mbe chiin ki kɛɛn nyjɛ ni pe ki tru le le ki na. 12 Mbe pe yirɛ nyjɛ ni pe tnumu tuni lawee cheche kre nu yire kro pɔ na yoŋgo mbruku wo ni, mbe yurɔ hlɛ chichie tɛɛ mbe yi tɔ, mbe yi taa yi taa yira na. 13 Mbe pe tɔɔnrɔ nyjɛ yii wa swafre sragbunu kre nu kre wɔ, mbe chin mbe ki tɔ na yoŋgo nyiɛ ni. 14 Mbe e taahɛɛ, na kaara su yirɛ, na sofi, na taahɛɛ nyjɛ nu pe nyimi leni na nyaara yire, na yirɛ nyjɛ ni pe tnumu tuni sragbunu kre na kro taa ki na. Mbe e yurɔ hlɛ chichie tɛɛ mbe yi tɔ, mbe ki tio kɛɛn yire le ki na. 15 Kena na wre Aaron na u biile pre yire tnumu nyjɛ ni nyina ŋga krɛrɛ kɔ, a nyjila da mbe Israel leele pre yo pie kɔ pe titɛɛ kre, kena Kohath leele pre pie yi tio. La, wa waa shia kɛ taa ki yirɛ cheche yire ka na, na kre ma ufun we ku. Kohath leele pre chiin pie na yirɛ nyjɛ yi pe cheche Fninyuŋgo wa yire turu.

16 Kena Aaron pɔ ŋmba pe yeeri Eleazar wre, we na kaniɛ yire simi, na tuwe ndiom taan yire, na shɔlɔ sra wɔ wee, na olive simi ŋga ni pe srawɔfɛɛnlɛ faa yire le. Wre kɛɛ pra Fninyuŋgo kre, na ki lam yirɛ kro wru mu le.”

17 Bawa o Tafun wre na yo Moses na Aaron pan mbo, 18-20 “Yaa shia ti mbe pre Kohath leele pre wa da cheche yirɛ yire ka na, mbaa yo ka we nya nyini ni, mbe sɛ su na Aaron na u biile pre we yirɛ yire kro tɔ tun. Na pe waa kɛ taa ka na, pe kro we soo peii. Kena e le na Aaron na u biile pie na yiɛ klu na pe ni mbra pe nyina ŋga pie pe.”

21 Bawa o Tafun Nyiɛkpɔɔ na yo Moses pan mbo, 22 “Gershon leele pre tɔɔnri mu yire pe lɛɛlɛ katoo mu sɛ su pe jlom na. 23 Pe mblɛ pe li yɛlɛ fulo na kɛ mu sɛ su fuloe shiin na kɛ pre wɔ mu tɔɔnri, mbe praa paan mbra tnumu tuni Suminyuŋgo wa. 24 Pre Gershon leele pre tnumu yi na pie na Suminyuŋgo kre tnumu bɛɛlɛ tuni, mbra ki yirɛ tru. 25 Yirɛ nyjɛ pie na tru yi kre, Fninyuŋgo kre yonyi, na yurɔ hlɛ nyjɛ ni pe ki toni, na ki nyu yonyi yire ni kro. 26 Yire na yonyi nyjɛ pe hlu mbe kagbala kpɔɔ kre na sragbunu kre fɛ mu kun kre, na yonyi nyjɛ pe waa ki jlonwee nyu na, na ki mɛnyi, mu wru mu ya ki lam yirɛ hɛnyi nyjɛ ni pe ki tnumu tuni kro na. Yire yirɛ nyjɛ krɛrɛ, Gershon leele pre pie na yi tru. 27 Kena Aaron na u biile pie na pe nyina tnumu ŋga pie na tuni. 28 Kena srawɔfun Aaron pɔ ŋmba pe yeeri Ithamar wre we na pre Gershon leele pre le pe tnumu tun haa.”

29 A o Tafun wre na yo Moses pan na u Merari leele pre tɔɔnri pe katoe nu mbe sɛ su pe sele yire nu. 30 Pe bilɛ mblɛ pe li yɛlɛ fulo na kɛ mu sɛ su lafaa yɔɔ, mbe jaa tnumu tun Suminyuŋgo wa pre tɔɔnri. 31 Fninyuŋgo kre tnumu ŋga pie na tuni yi na, pie na ki kɛɛn nyjɛ pe yiri sholo, na nyjɛ pe paarii, na ki yii kɛɛn yire kro tru. 32 Mbe wruu ya kɛɛn nyjɛ ni pe ki kagbala kpɔɔ kre pini, na ki mɛnyi, na kɛɛn bɛɛlɛ nyjɛ pe ki kani tra, na ki yirɛ bɛɛlɛ kro. Mbe e yi yɔɔlɛ mbe pe ŋga imi na pie yi tio. 33 Kena nyjɛ ni nyina ŋga, yire pie na piin Fninyuŋgo wa. A pe kroo wa srawɔfun Aaron pɔ ŋmba pe yeeri Ithamar wre jaara.

34 Moses na Aaron, na Israel loplombo pre, na Kohath leele pre kro tɔɔnri pe jlom na mu sɛ su pe sele yire kro na. 35 Mblɛ pra tɔɔnri pre na li yɛlɛ fulo na kɛ mu sɛ su lafaa yɔɔ, mbe jaa Suminyuŋgo kre tnumu tun. 36 Pe kro nyu naa kagbenyi shiin, na lafɛɛ kɔɔnashin na yɔɔ. 37 Kena Kohath leele mblɛ Moses na Aaron na chia loplombo na tɔɔnri pre nyu ni nyina kre. Pre praa Fninyuŋgo kre tnumu tuni imi na o Tafun Nyiɛkpɔɔ na yo Moses pan kre.

38-41 Gershon kɛ leele mblɛ pra tɔɔnri, mu yire pe katoe nu mu sɛ su pe sele kro na kre, pe mblɛ pra li yɛlɛ fulo na kɛ mu sɛ su fuloe shiin na kɛ a praa Fninyuŋgo kre tnumu tuni pre nyu na pe kagbenyi shiin, lafɛɛ kɔɔnanu na fulo na kɛ. Kena pre Gershon kɛ leele mblɛ o Tafun Nyiɛkpɔɔ wre na tia Moses na Aaron na tɔɔnri mbe praa tnumu tuni Fninyuŋgo wa na lɛ kre.

42-45 Ŋga pra Merari kɛ leele pre tɔɔnri, mu yire pe katoe nu mu sɛ su pe sele kro na kre, pe bilɛ mblɛ pe li yɛlɛ fulo na kɛ mu sɛ su fuloe shiin na kɛ mblɛ nu faŋga na nyi mbe jaa tnumu tun Suminyuŋgo wa pre, kro nyu na pe kagbenyi taarɛ na lafɛɛ shiin. Kena Merari leele mblɛ Nyiɛkpɔɔ na tia Moses na Aaron na tɔɔnri kre, pe mblɛ pie ja mbra tnumu tuni Suminyuŋgo na lɛ kre.

46 Moses na Aaron na Israel loplombo pre na Levi leele pre tɔɔnri pe katoe, na pe jlom na, imi na o Tafun Nyiɛkpɔɔ na yo pe pan kre. 47 Pra pe bilɛ mblɛ pe li yɛlɛ fulo na kɛ kɛ mu sɛ su fuloe shiin na kɛ, mbe jaa na Fninyuŋgo kre tru, mbra ki tnumu tuni. 48 Pe kro nyu na pe kagbenyi kɔɔnatarɛ, na lafɛɛ kunɔ na fuloe jijirɛ. 49 Pra pe kro nyina nyjɛ pie na piin, imi na o Tafun Nyiɛkpɔɔ na paara Moses na Aaron pan kre.