Aaron Biile
3
Ŋga ble o Tafun wre na paara Moses ni Sinai nyua na kre, wre na Aaron kɛ leele mblɛ pra nyunɔ na lɛ kre, 2 Aaron biile na lɛ Nadab ŋmba wra pe u pɔ lopom na Abihu, na Eleazar na Ithamar. 3 Kena Aaron na u biile mblɛ, pre pra wru mu le Nyiɛkpɔɔ kɛɛ mbe pra sra woni. 4 Ki n na mu, a Nadab, na Abihu na foli mu to mu ku o Tafun Nyiɛkpɔɔ yiɛ Sinai tablɔ tra kre nu. Kra yire ndikana ŋga pra pe, a pe nsra taa kolo ŋga o Tafun Nyiɛkpɔɔ wre na pe nyina na praa kanhun gbeerii kre na. Pe n naa biile ni ki tia kra kro Eleazar na Ithamar mblɛ pra pe srawɔfɛɛnlɛ pe lɛ Aaron nyjila kre nu.5 Bawa o Tafun wre na yo Moses pan mbo, 6 “Levi leele pre kro yeeri mu pe wru mu le Aaron kɛɛ mbe praa yaa u na. 7 Kena pre pie na wre Aaron na Israel lee pre kro tnumu ŋga kii wa Fninyuŋgo wa kro tuni. 8 Pre pie yire Israel leele pre jeelee na mbra o Tafun wre Fninyuŋgo kre lam yira kro tnumu tuni. 9 Levi leele pre wru mu le Aaron na u biile pre kɛɛ. Pre lɛ Israel leele mblɛ pie pe Aaron na u biile pre sumi. 10 Kena Aaron na u biile pre chiin wɔ mbe pe pe srawɔfɛɛnlɛ. Mu kɔ pre na, ndro ŋmba we da cheche ndoo kre na kre, ki fna mbe e ufun gbo.”
11 O Tafun Nyiɛkpɔɔ wre na ndru mu yo Moses pan mbo, 12 “Mi ni Levi leele pre wɔ mu yili Israel leele pre nu, mbe pe yire Israel bijloe bilɛ jeele na. Ki tia pre Levi leele pre ni wolo lɛ. 13 Ŋgi na hin? Bijlo ŋmba u pe blɔ kro ni wo wi. Mu yire ŋga ble ndaa Egypt leele bijloe bilɛ gbo peii kre, kre ble kre ndaa ki yo mu tɛɛ na Israel bijlo blɔ, na pe yurɛ bilɛ mblɛ pe klu mu se kro, Mi e Tafun wre wolo lɛ. Mi wi e Tafun Jaŋgafun wre.”
Pe Levi Leele Tɔɔnri
14 O Tafun Nyiɛkpɔɔ na paara Moses pan Sinai tablɔ tra kre nu mna yo u pan mbo, 15 “Levi leele pre kro tɔɔnri pe katoe nu mu sɛ su pe jlom yire na. Blɔ ŋmba u lii nyiɛpɔ nunu na shie kro.” 16 A Moses na pe tɔɔnri imi o Tafun Nyiɛkpɔɔ na u nyina kre. 17 Levi biile naa taarɛ, pre na lɛ Gershon, na Kohath na Merari. 18 Gershon jlom wolo na lɛ Libni, na Shimei, na pe kɛ leele. 19 A Kohath jlom kre wolo na lɛ Amram, na Izhar, na Hebron, na Uzziel, na pe kɛ leele. 20 A Merari jlom wolo na lɛ Mahli, na Mushi, na pe kɛ leele. Kena pre na lɛ Levi jlom wolo.
21 Kena Gershon jlom wolo pre na lɛ Libni, na Shimei kɛ leele. 22 Pe kro nyu na to kagbenyi kɔɔnashin na yɔɔ, a pe pe bibilɛ mblɛ pe li nyiɛpɔ na shie. 23 A pra pe ŋga Suminyuŋgo kre krɔ haa na shie yila tohaa, a pra tni. 24 Lael pɔ Eliasaph wre wra pe pre Gershon leele pre lopom. 25 Kena pre Gershon leele pre kɛɛ pra Fninyuŋgo kre yonyi, na ki jlonwee nyu yonyi kro le. 26 Mu wru mu ya ki kagbala kpɔɔ kre yonyi, na sragbunu kre, na ki mɛnyi, na ki yirɛ bɛɛlɛ ni kro.
27 Kohath jlom wolo na lɛ Amram, na Izhar, na Hebron, na Uzziel kɛ lee pre. 28 Pe bibilɛ mblɛ pra li nyiɛpɔ na shie, a pra pe tɔɔnri pre naa kagbenyi kɔɔnatarɛ na lafɛɛ kɔɔnanu. Pre kɛɛ lawee cheche kre na nyi. 29 Pre pra tni Suminyuŋgo kre tapanhaa. 30 Uzziel pɔ Elizaphan wra pe jlom kre lopom. 31 Kena pre kɛɛ Nyiɛkpɔɔ daka kre, na tebru kre, na kania kaan kre, na sragbuɛnlɛɛ, na taahɛɛ nyjɛ ni pe tnumu tuni cheche lawee wa yire kro na nyi.
32 Kena pre Levi leele pre lopom titi na wi Aaron biblɔ srawɔfun Eleazar wre, wre pra wɔ a wraa leele mblɛ pe cheche lawee kre tnumu tuni pre le.
33 Merari jlom wolo na lɛ Mahli, na Mushi kɛ leele pre. 34 Pe bilɛ mblɛ pe li nyiɛpɔ nununu na shie pre naa kagbenyi kɔɔnanu na lafɛɛ shiin. 35 A Merari jlom kre lopom na wi Abihail pɔ Zuriel wre. Pre na tni suminyuŋgo kre nyjeerihaa. 36-37 Kena pre Merari jlom kɛ leele pre kɛɛ pra Suminyuŋgo kre kɛɛn, na ki mɛnyi, ki kɛɛn bɛɛlɛ nyjɛ pe kani tra na ki yiri, na ki lam yirɛ kro wru mu le.
38 Lawee ŋga kraa wa Suminyuŋgo kre yɛsimi na shie yila tohaa kre, kra pe Moses na Aaron na u biile lawee, mbe pe tni. Pre kɛɛ lawee cheche kre na nyi. Ŋmba we da lawee cheche kre na kro, ki fna mbe pe ufun gbo. 39 Kena Levi leele pre bilɛ mblɛ pra li nyiɛpɔ nunu na shie, a pra pe tɔɔnri pre kro nyu na to kagbenyi fulo na shiin.
Biblɔ Jlo Pe Nyiɛkpɔɔ Wo
40-41 O Tafun Nyiɛkpɔɔ na yo Moses pan mbo, “Israel ndro biblɔ jlo kro ni wo wi, kena pe ŋmba u li nyiɛpɔ nunu na shie kro mɛɛ nyunɔ. La, mbe Levi leele pre wru pe haa mbe ta. A mbe Levi leele pre yurɛ bilɛ mblɛ pe klu mu se pre wru Israel leele pre yurɛ bilɛ mblɛ pe klu mu se pre haa. Mi wi e Tafun Nyiɛkpɔɔ.” 42 Kra tia Moses na Israel bijloe bilɛ pre kro tɔɔnri imi na o Tafun Nyiɛkpɔɔ na yo kre. 43 Wra yire pe mblɛ pra li nyiɛpɔ na shie pre na mna bijloe pre tɔɔnri, pe nyu naa kagbenyi fulo na shiin, na lafɛɛ shiin na fuloe taarɛ na kɛmbɔtaarɛ.
44 Bawa o Tafun Nyiɛkpɔɔ na yo Moses pan mbo, 45 “Levi leele bijloe bibilɛ pre kro wru mu tɛɛ Israel bijloe bilɛ pre titɛɛ. Mu pe yurɛ bijloe bilɛ pre wru mu tɛɛ Israel leele yurɛ bijloe bilɛ titɛɛ. Ŋgi na hin? Ni wolo lɛ. Mi wi e Tafun Nyiɛkpɔɔ. 46 Levi leele pre na kro lafɛɛ shiin na fuloe taarɛ na kɛmbɔtaarɛ mbe chiin da Israel bijloe pre nyu, ki tia ki fna mbe Moses mblɛ pe kro pre ndra lɔ, 47 Kena ki fna mbe Moses shɔ swafinyi kunɔ kunɔ ma lafɛɛ shiin na fuloe taarɛ na kɛmbɔtaarɛ, mbe yi snam da imi na pe ki kun mu tɛɛ kre. 48 Mbe mu kre swa kre wru mbe Aaron na u biile ŋga. Kena kre ni mu Levi leele mblɛ pe kro mbe da na Israel leele pre ni kre ndra lɔ.” 49 A Moses na kre swa kre shɔ. 50 Ki nyu na pe swafiŋge biribiri kagbeŋge nunu na lafɛɛ taarɛ na fuloe taarɛ na kunɔ. 51 A Moses na ki wru mu Aaron na u biile pre ŋga imi na o Tafun Nyiɛkpɔɔ na yo kre.