Srawɔɔ Mbra
15
O Tafun wre na yo Moses pan mbo, 2 “Ti mbe Israel leele pre loo na, na e waa sɛ le tra ŋga ni e ŋga mbe e tni kre na, 3 na e waa yo ee nui na mbaala sro mbe sra ŋga ndiom ki tna wɔ mbe e Tafun Nyiɛkpɔɔ ŋga kre, na yurɛ sroo sra yi o, na daŋga sra yi o, na lewo titi chaara sra yi o, ndee blee kpɔɔ lie sra yi o, 4 e ti mbe ŋmba u paan mbe sra kre wɔ wre pan na mimi chichie ŋga snam ki da kradnɛ shiin ni, mbe olive simi kɔtuae shiin chaa ki nu, mbe tɛɛ mbe sro sra wɔ mbe ni ŋga. 5 Mbɔɔ nunu ŋmba ni ee tɛɛ mbe yurɛ sroo sra wɔ kre, ki fna e simi kɔta ya u na, mbe ki tɛɛ mbe simi woo sra wɔ. 6 Na mbaplɔ wi naa, u paanu mimi ŋga snam ki da kradnɛ jijirɛ chaa olive simi kɔtuae taarɛ nu, mbe tɛɛ mbe sro sra wɔ. Kre sra kre ndiom tna ni pan. 7 Mbe e simi kɔtua taarɛ ya, mbe yi tɛɛ mbe simi woo sra wɔ, ki ndiom tna ni pan. 8 A nablɛm pɔlɔ wa we tɛɛ mbe yurɛ sroo sra wɔ naa, ndee na danyi sra yi o, ndee na wejinyiŋge sra yi o, 9 u paanu mimi ŋga snam ki da kradnɛ jijirɛ, mbe olive simi kɔtuae jijirɛ chaa ki nu, 10 mbe simi gbɔwo kɔtuae jijirɛ tɛɛ mbe simi woo sra wɔ, mbe kanhun tɛɛ mbe sra yirɛ yire sro, ki ndion tna ni pan.11 Na nablɛm wi o, na mbaplɔ wi o, mbɔɔ pɔ wi o, sikapɔlɔ wi o, pan ki fna e pe pe. 12 Imi na yurɛ pre we nɛɛ mbe da kro, pan ki fna e yi yirɛ ya pe na. 13 Na kapɔɔ pan mbe yurɛ sroo sra wɔ kre, pan chɔɔ ki fna u pe, kre sra kre ndiom tna ni pan. 14 Hali mbakɔ leele mblɛ pie kɔɔ yire pre, lefuŋu ŋmba we paan tni pe kro, na ufun wre chaa mbe yurɛ sroo sra ŋga ndiom ki tna Nyiɛkpɔɔ pan wɔ kre, ufun wre u pe imi na e pini kre chɔɔ. 15 Mbra nunu kre ki fna mbe tnumu tun yire kabiile, na fumblɔ mblɛ pee wa mu tni e nu kro pan. Hali mbe sɛ su e mbakɔ wolo nu. Yire na fumblɔ mblɛ pe yiri waŋgra fɔŋgɔ nu mu pan mu tni e nu kro fna mbe pe nunu e Tafun Nyiɛkpɔɔ yiɛ. 16 Mbra, na kolo nunu yire na yire na fumblɔ mblɛ pee wa mu tni mu chaa e nu pre na tro.”
17 O Tafun Nyiɛkpɔɔ na yo Moses pan mbo, 18 “Ti mbe Israel leele pre loo na, ‘Na e waa le tra ŋga nu ni shie na e ni kre na, 19 na e waa tra kre sro le nyuu, e ka tɛɛ e sra wɔ e mi e Tafun Nyiɛkpɔɔ ŋga. 20 Na e waa shɔlɔ kun, maa yɛ tɛɛ mu paanu fɔ kre, e paanu jle kre tɛɛ e sra wɔ e mi e Tafun Nyiɛkpɔɔ ŋga. 21 E leele mblɛ pie kɔɔ yiri kro pre fna mbra kre sra ŋga woni e sro jle wee ni, mbra mi e Tafun Nyiɛkpɔɔ kaan.
22 Na ki pan na wa punu yire mbra nyjɛ o Tafun Nyiɛkpɔɔ Moses kaa nyjɛ ka na, a tuwi ma u tuwi kre, 23 ndee na mbakɔ na chia ka wolo waa punu yire mbra nyjɛ o Tafun Nyiɛkpɔɔ Moses ŋga nyjɛ na, 24 a tuwi ma pe tuwi kre, kena chia kre wolo pe nablɛm pɔlɔ tɛɛ mbe yurɛ sroo sra wɔ. Mbe pe mimi sra wɔ wo kre, na simi gbɔwo yire wɔ ma na. Kre sra kre ndiom tna ni pan. Na pe kɔ mbe pe kaplɔ tɛɛ mbe sisam sra wɔ. 25 Kena Srawɔfun wre sisam sra wɔ, mbe Israel leele pre kro ndra lɔ. Mbe pe sisam tinkɛɛ ta, na tuwi ma pe tuwi. A pe yurɛ sroo sra wɔ, mu ndru mu pe sisam sra wɔ. 26 Na ki pan ma, Israel leele pre, na fumblɔ mblɛ pee wa mu tni mu chaa pe nu kro we sisam tinkɛɛ ta, ŋgi na hin? Pe kro kro punu kro.
27 La, na ki pan na ndro nunu u punu, a tuwi ma u tuwi kre, ki fna mbe u pan na sikapɔlɔ ŋmba u da yɛlɛ nyu ni, mbe sisam sra wɔ. 28 Srawɔfun wre fna mbe sisam sra wɔ o Tafun Nyiɛkpɔɔ yiɛ, mbe ŋmba u n tuwi mu sisaa pe wre ndra lɔ, kena u sisam tinkɛɛ ta. 29 Mbra nunu kre kie mblɛ pe n tuwi mu mu punu pre kro li, hali na Israel ndro wi o, ndee na fuŋu wi o. 30 La na ndro waa tuwi mu jiɛnlɛ kee yo o Tafun Nyiɛkpɔɔ na, na kapɔɔ wi o, na fuŋu wi o, ufun wre fna pe u wɔ mbe yili u leele nu. 31 Ŋgi na hin? U n o Tafun Nyiɛkpɔɔ kee kre le mu nya, mu u mbra yire ka taan. Kena wre titi u kala cha mu uyɛ ŋga, ki fna e u wɔ mbe yili u leele nu.’”
32 Ŋga Israel leele pre naa wa tablɔ tra kre nu wa kre, ki ble ka pra blɔ wa nya na u kejenyi chaa Wuuble. 33 Leele mblɛ pra blɔ wre nya kre na u yii mna pan na u ni Moses, na Aaron na kapoŋgo pre yiɛ. 34 A pra u yii mu tɛɛ, mna u le leele plɛ kɛɛ. Ŋgi na hin? Pe nsra chin kee kpiki ŋga pie u pe. 35 A o Tafun Nyiɛkpɔɔ na yo Moses pan mbo, “Blɔ wre fna pe u gbo. Ki fna mbe chia poŋgo kre sɛ na u ni chia kre mbookrɔ, mbe u waari dnɛ ni mbe gbo.” 36 A chia poŋgo kre na u wru mna sɛ na u ni mbookrɔ, mna sɛ u waari dnɛ ni mu gbo, imi na o Tafun Nyiɛkpɔɔ na yo Moses pan kre.
37 O Tafun Nyiɛkpɔɔ na yo Moses pan mbo, 38 “Ti mbe Israel leele pre kro loo na, ndro kro u sɛbɛ pe mbe mbra u dodonyi jenu na, mbe maŋa mbruku wo to mbe hlu yi na mbe yira pɛli, hali mbe sɛ su e mbakɔ leele na. 39 Kena na e yiɛ waa to sɛbɛ yire na kre, mbe e mi e Tafun Nyiɛkpɔɔ mbra nyjɛ ni le yire sɔɔnri mbe taa yi na, mbe yaa laa u kro, mbe sɛ taa yire titi chaara, na e niŋge na. 40 Kena yie na e sɔɔnri, mbe e li ni mbra yire na, mbe pe cheche mbe ni ŋga. 41 Mi wi e Tafun Nyiɛkpɔɔ ŋmba wra e wɔ mu yili Egypt tra nu, mbe paan pe e Nyiɛkpɔɔ. Mi wi e Tafun Nyiɛkpɔɔ wre.”