Korah, Dathan Na Abiram//Yiri Mu Nyiɛkpɔɔ Taan
16
Korah lɛ na wi Izhar, a pra pe Levi kɛ leele, mu yiri Kohath jlom na. Pre na Eliab biile Dathan, na Abiram, na Peleth biblɔ On mblɛ pe yiri Reuben jlom na pre na ndikana pe, 2 mna yiri mna Moses taan, pre na Israel leele loplombo mblɛ pee mɛɛ ni chia kre na, mu chaa chia kre loplombo mblɛ Moses na wɔ pre nu, praa leele lafɛɛ shiin na yɔɔ. 3 Pra peyɛ nyu nya, mna sɛ Moses, na Aaron nyu kaanri mbo, “E chaa mbe pee tro, ndro wa n wa chia ŋga na a u n pe cheche, a o Tafun Nyiɛkpɔɔ wree wa o kro. Kena ŋgi ki tia e na eyɛ kpɔɔri o Tafun Nyiɛkpɔɔ wre leele pre na ma ŋga hin?” 4 Ŋga Moses na kre kee ŋga loo kre, wra to mu yiɛ juule tra. 5 Bawa wra yo Korah na u kotɔmblɔ pre pan mbo, “Baŋga bnimi, o Tafun Nyiɛkpɔɔ we o nyina ŋmba u pe u wo, na ŋmba u pe cheche. We ti mbe ufun wre mbra u na. Ŋmba wre Nyiɛkpɔɔ we wɔ kre, we ti u flo mbe da u jaara. 6 Ŋu Korah na mu kotɔmblɔ kro, baŋga bnimi e taahɛɛ nyjɛ ni pe kanhun woni wru. 7 Mbe e kanhun, na tuwe ndiom taan le yi nu, mbe sɛ yire o Tafun Nyiɛkpɔɔ yiɛ. Ndro ŋmba Nyiɛkpɔɔ we wɔ kre, kena wre u pe cheche. Yire Levi leele pre, yire e chaa mbe pee tro.”8 Bawa Moses na yo Korah pan mbo, “Fuŋgaami e loo, yire Levi leele pre, 9 kena ŋga Israel Nyiɛkpɔɔ wre e wɔ mu yili Israel leele hamblɛ pre nu, mu tia e mbra u na, mbra u tnumu tuni u Fninyuŋgo, na yire leele pre yiɛ na sumi kre, kre n eyɛ nyi tun ra? 10 U pan na yire na e wolo Levi leele pre kro ni mu mbra uyɛ na. Fuŋga rɛ, Srawɔ tnumu kre e chaa mbe ya. 11 Na e taanri Aaron na o, wre na ma e taanri, la, e Tafun Nyiɛkpɔɔ wre na ŋu na mu kotɔmblɔ pre taanri.”
12 A Moses na Dathan na Abiram yeeri na pe pan, a pra je mbo, “Waa pan. 13 Mu yiri mu o wɔ mu yili Egypt tra taan kre nu, mbe paan o gbo tablɔ tra ŋga nu finfin. Fuŋga rɛ ŋunumu mu chaa mbe li o na. 14 Tra taan ka nu ma mu pan na o ni kple, mbaa yo seele oo ta, a mu kro na o fana. Waa pan.”
15 A Moses krɔ na kun, a wra yo o Tafun Nyiɛkpɔɔ pan mbo, “Maa pe sra wɔɔ shɔ. Ni n pre leele mblɛ wa pe sisaa, a ni n pe wa bubnɔ shɔ u pan.” 16 A Moses na yo Korah pan mbo, “Ŋu na mu kotɔmblɔ lafɛɛ shiin na yɔɔ pre kro, e pan e fni o Tafun Nyiɛkpɔɔ yiɛ baŋga, Aaron we ka pan. 17 E kro e na paan na e kanhun wɔ taahɛɛ ni, mbe e tuwe ndiom tɛɛn le yi nu, mbe pan na yi ni sragbunu kre na.” 18 A pe kro na sɛ pe kanhun wɔ yirɛ yire wru wru, mna kanhun wɔ mu le le yi nu, mna tuwe ndiom tɛɛn le yi nu, a pre na Moses, na Aaron na sɛ yire Fninyuŋgo kre jlonwee nyu na wa. 19 A Korah na tia u kotɔmblɔ pre na ble pe yɛsimi Fninyuŋgo kre jlonwee nyu na wa. A o Tafun Nyiɛkpɔɔ na tia pra u yɛnyiŋge ŋga ki chiɛnri kre nya.
20 A o Tafun Nyiɛkpɔɔ na yo Moses, na Aaron pan mbo, 21 “E eyɛ kun e laa leele pre na, mbe ni pe kro gbo fuŋgaami.” 22 A Moses, na Aaron na to mu yiɛ juule tra, mna nyɛni na yuu mbo, “Ŋu Nyiɛkpɔɔ, ŋu mu lewo kro kaan ŋmaa, kena na ndro nunu sisaa pe o nu, mu krɔ wru na leele pre kro ni ra?” 23 A o Tafun Nyiɛkpɔɔ na yo Moses pan mbo, 24 “Yo leele pre pan na pe flo mbe yili Korah, na Dathan, na Abiram yonyi nyinyi yire na.”
25 A Moses na yiri mna sɛ Dathan, na Abiram pan, na Israel loplombo pree wa mu taa u kro. 26 A Moses na leele pre jaari mbo, “E flo e yili sisampefɛɛnlɛ pre yonyi nyinyi yire jaara, yaashia kɛ taa pe yaka na, na kre ma yire na pre we chaa mbe fun.” 27 A leele pre na flo mu laa Korah, na Dathan, na Abiram yonyi nyinyi yire na. Kre nyjila kre na Dathan, na Abiram, na pe chiɛlɛ, na pe biile fiɛnfiɛn yili mu pan mu yire yire yonyi nyinyi yire jlonwee nyu na wa.
28 A Moses na yo pe pan mbo, “Imi kie pe mbe e chin na nyjɛ ni piin krɛrɛ, o Tafun Nyiɛkpɔɔ u ni tun, a ki n pe na mi titi jawala ni tɛɛ na yaka piin kre, 29 na pre leele mblɛ ku imi na ndro kro kuu kre, kena o Tafun Nyiɛkpɔɔ wre ma u ni tun. 30 La na o Tafun wre kefɔŋgɔ pe kre, mu tia tra nyu nyaa mu pe jɔli, na pe yirɛ kro ni kre, a pe tii mu sɛ kuulo ndoo yiɛ kain ŋga ni kre, kre ee chin na pre leele mblɛ n Nyiɛkpɔɔ le mu nya.”
31 Ŋga u paaraa nyu na to to, a tra ŋga na pra yire kre na yɔ shiin, 32 mna pe na nyu ki nyaa, mna pe jɔli peii, pre na pe katoo leele, na Korah na u kotɔmblɔ pre, na pe yirɛ kro ni. 33 Pra le kuulo ndoo bibre, pre na pe yirɛ kro ni. Tra kre na pe tɔ, a pra fun leele pre nu. 34 Ŋga leele pre na pe nyɛni a pe nyu na to kre, Israel leele pre na flo wa, mnaa gble leni na yuu mbo, “E tio flo, tra kre paan mbe o jɔli na.” 35 A kanhun na yiri o Tafun Nyiɛkpɔɔ lawee mna pan mu leele lafɛɛ shiin na yɔɔ mblɛ praa tuwe ndiom tɛɛn sra woni pre shɔ mu gbo.
36 A o Tafun Nyiɛkpɔɔ na yo Moses pan mbo, 37 “Yo srawɔfun Aaron biblɔ Eleazar wre pan mbe u tuwe ndiom taa taahɛɛ yire koli mbe yili lawee shɔɔ kre nu, mbe kaanlɛɛ yire kna mbe wo haalee, ŋgi na hin? Yire taahɛɛ yire pe cheche. 38 Yire taahɛɛ nyjɛ ni leele mblɛ pra ku pe sisam tlo kre na tɛɛ na tuwe ndiom tɛɛn sra wɔ kre, e yi gbun mbe yi pe pɛprɛɛ mbe e ki tɛɛ mbe sragbunu kre tɔ. Ŋga pra yi tɛɛ mu sra wɔ Nyiɛkpɔɔ yiɛ kre ndra na yi pe cheche. E ti mbe yi pe sɛmbɛɛrɛ yirɛ mbe Israel leele pre ŋga.” 39 A srawɔfun Eleazar na sɛ yi wru, mna tia pra yi gbun pɛprɛɛ, a wra ki tɛɛ mu sragbunu kre tɔ, 40 imi na o Tafun Nyiɛkpɔɔ na ki yo Moses pan kre. Kre kee ŋga we na Israel leele pre sɔɔnri na, mu ta mu kɔ Aaron nanae pre na, ndro n fna mbe tuwe ndiom tɛɛn sro mbe o Tafun Nyiɛkpɔɔ wre ŋga. Na kre ma we pe na Korah, na u kotɔmblɔ pre lɛ.
41 Ŋga nyiŋge na se kre, Israel leele pre kro naa taanri Moses, na Aaron na poŋgo na yuu mbo, “E Nyiɛkpɔɔ leele gbo finfin.” 42 Ŋga leele pre na fni mnaa Moses, na Aaron nyu kaanri kre, pra kna mna Fninyuŋgo kre le, titɛɛ kre nu a tlo na pan mna ki tɔ, a pra Nyiɛkpɔɔ yiɛnyiŋge ŋga kraa chiɛnri kre nya. 43 A Moses na Aaron na flo mu da Fninyuŋgo kre yɛsimi wa. 44 Bawa o Tafun Nyiɛkpɔɔ na yo Moses pan mbo, 45 “E flo e yili leele pre nu, mbe ni pe gbo fuŋgaami.” A pe kro shiin na to mu yiɛ juule tra.
46 A Moses na yo Aaron pan mbo, “Mu tuwe ndiom taha kre wru, mu tuwe tɛɛn le ki nu, mu kanhun wɔ sragbunu kre na mu le ki nu, mu sɛ leele pre nu nyaanyaa mu sɛ sra wɔ mu pe ndra lɔ. O Tafun Nyiɛkpɔɔ krɔ kun, a yira sisaa na paan mbe pe gbo.” 47 A Aaron na pe nyaanyaa, mna ŋga Moses na yo u pan kre pe. A wra tafɛŋgɛ wru mu sɛ le leele pre lalaa. Na yira sisaa le pe nu fuŋga ma, la, Aaron na tuwe ndiom tɛɛn yire sro, mna leele pre ndra lɔ. 48 Wra yire pe gboolo, na mblɛ praa le pre lalaa, a kumu kre nyu na to. 49 Leele mblɛ pra ku pre naa kagbenyi kɛmbɔjijirɛ na lafɛɛ kɔɔnashin, mu wru mu ya mblɛ pra taa Korah na mna ku pre na. 50 Ŋga kumu kre nyu na nyjii kre, a Aaron na ndru mna sɛ Moses pan Fninyuŋgo kre jlonwee wa.