Aaron Kanyie
17
O Tafun Nyiɛkpɔɔ na yo Moses pan mbo, 2 “Yo Israel leele pre pan na pe pan na kanyie kɛmbɔshiin ni mbe mu ŋga. Pe jlom kɛmbɔshiin yire loplombo pre mɛɛ nyunɔ yi na nununu. 3 Levi leele lopom kanyie kre, Aaron mɛɛ nyunɔ ki na, kena kɛɛn yire we yire pe jlom kɛmbɔshiin yire jeelee na. 4 Mbe mu yi kro shɔ mbe tɛɛ Nyu Nunu Daka kre yɛsimi Fninyuŋgo wa. 5 Ndro ŋmba mbe wɔ wre kanyie ŋga na u mɛɛ nyi kre we wrɛ fun. Kre kolo ŋga na mbe tro mbe Israel leele pre taanraa nyjɛ pe taanri mu na kre nyu gbo.” 6 A Moses na ki yo Israel leele pre pan, a pe jlom loplombo pre na pan mu u ŋga kanyie yire. Yiraa kɛmbɔshiin, imi na pe jlom yire nyu na da. Aaron kanyie na chaa yi nu. 7 A Moses na kanyie yire kro wru mu sɛ tɛɛ Nyu Nunu Daka kre yɛsimi, Fninyuŋgo wa.8 Ŋga nyiŋge na se, a Moses na sɛ le Fninyuŋgo wa kre, na Aaron kanyie ŋga na yi Levi jlom wo kre, na ki wrɛ fun, mu kpolo, mu jiri mu almond bie sɛ. 9 A Moses na kanyie yire kro koli o Tafun Nyiɛkpɔɔ yiɛ wa, mna pan na yi ni Israel leele pre nu. A pra yi le le mna pe wie wɔ wɔ. 10 A o Tafun Nyiɛkpɔɔ na yo Moses pan mbo, “Aaron kanyie kre wru mu sɛ tɛɛ Nyu Nunu Daka kre yɛsimi wa, mbe ki tni wa mbe pe jaaraa, pe ndikana kee yire na.” 11 A Moses na kee ŋga o Tafun Nyiɛkpɔɔ na yo kre pe.