Srawɔfɛɛnlɛ Pre Na Levi Leele Pre Tnumu
18
A o Tafun Nyiɛkpɔɔ na yo Aaron pan mbo, “Ŋu na mu bibilɛ pre, na Levi leele pre ee punɔɔ ŋga wa we punu Fninyuŋgo kre na kro mapini tio. A punɔɔ ŋga wa we punu srawɔɔ tnumu kre na kro, ŋu na mu bibilɛ pre chiin ee ki mapini tio. 2 Kɛ wa mu Levi leele pre yeeri e jlom kre na, mbe pe paan na yaa ŋu na mu bibilɛ pre na, mbe e na Fninyuŋgo kre tnumu tuni. 3 Pie na yaa e na, mbra tnumu nyjɛ yi fna pe tun yire tuni Fninyuŋgo wa, la, pia shia da ki yirɛ cheche nyjɛ yii wa Cheche Ndoo wa yire na, ndee sragbunu kre na, na kre ma, yire na pre kro we ku. 4 Pie pan mbra yaa e na Fninyuŋgo wa, pie jaa ya e na mbe ki tnumu kro tun, la, lewaa wa n fna mbe paan ya e na. 5 Ŋu na mu bibilɛ pre chiin ee na tnumu tuni Cheche Ndoo kre, na sragbunu kre na. Imi kie pe mbe Nyiɛkpɔɔ krɔ wa kun na Israel leele pre ni na. 6 Mi Nyiɛkpɔɔ ni mu wolo Levi leele pre wɔ Israel leele nu mu mu kɛ pe lɛ, pe pe cheche mbe tnumu tun ni pan Fninyuŋgo wa. 7 Kena ŋu na mu bibilɛ pre chiin e fna mbe jaa srawɔɔ tnumu kre tun sragbunu kre, na Cheche Ndoo Titi kre nu. Srawɔ tnumu kre, kɛɛ ni e kɛ ki yi. Lewaa ŋmba we da Fninyuŋgo kre na kpan, u fna mbe ku.”Yirɛ Nyjɛ Srawɔfɛɛnlɛ Pre We Na Taa
8 A o Tafun Nyiɛkpɔɔ na yo Aaron pan mbo, “Srayirɛ nyjɛ Israel leele pre woni na ni kaan, a praa yi sroi yire kro, ni yi wru mu ŋu na mu nanae pre ŋga, mbe yi pe e wee nyjila kro nu. 9 Sra cheche titi yirɛ nyjɛ pe woni, a praa yi sroi yire krɛrɛ e wee yi. Yire yi shɔlɔ sra yirɛ, sisam sra yirɛ, na pimi sra yirɛ yire, ŋu na mu biile pre wee yi. 10 Cheche Ndoo wa ki fna mbe e na yirɛ nyjɛ kaa, bilɛ chiin pie jaa yi ka. E yi le na yi pe cheche. 11 Srayira ŋga Israel leele pre we wɔ mbe ni ŋga srayirɛ nyjɛ pe viŋge yire nu kro, ni yi wru mu ŋu na mu bibilɛ pre, na mu bichiɛlɛ pre kro ŋga nyjila kro nu. Pe ŋmba uu cheche paala kolo na kro, we jaa ka ka. 12 See yirɛ jle wee nyjɛ pe woni na ni kaan yɛlɛ nyini kre, ni yi wru mu e ŋga. Yire yi olive simi, na simi gbɔwo, na shɔlɔ. 13 E wee yi kro, ndro ŋmba u pe cheche paala kolo na kro we jaa ka ka. 14 Yira ŋga kii wa Israel tra nu a pe ki wɔ mu ni ŋga paala kolo na kro e wo yi. 15 Biblɔ jlo, na yurɔ blɔ jlo ŋmba pe wɔ mu ni ŋga kro, e wolo lɛ. La biblɔ jlo kro fna mbe e u ndra lɔ, mbe yurɛ mblɛ pe n pe cheche pre bijlo blɔ ndra lɔ na. 16 Na bijlo blɔ wre da nyiɛpɔ nunu, mbe e chiin u ndra lɔ na swa finyi yire kunɔ ni, imi na pe ki nyu kun mu tɛɛ kre. 17 La, yaashia nuu, ndee mbɔɔ, ndee sikaala ndra lɔ, ŋgi na hin? Pe pe cheche mu ni ŋga. E pe tɛɛ mbe sra wɔ mbe ni ŋga. Mbe e pe nyimi nyaara sragbunu kre na, mbe pe nyina yire sro e sra wɔ e ni ŋga, kre sra kre ndiom tna ni pan. 18 Pe kaara yire rɛ, e wee yi, imi na yurɔ ŋmba ni viŋge wre nyinimi, na u jele kalie wo pe e wee kre. 19 Sra cheche nyjɛ Israel leele pre we na woni yire, yi nyjɛ pe ni kaan yire, ni ŋu na mu biblɔ, na mu bichiɛlɛ pre ŋga yi yi nyjila kro nu. Ki pe nyu nunu ŋga mi na ŋu, na mu nɔɔ leele kro pini, a kia jaa kla fio.”
20 O Tafun Nyiɛkpɔɔ na yo Aaron pan mbo, “Ma krɔyira ta tra kre nu, a ma tra ta mbe ki pe mu wo. Mi e Tafun Nyiɛkpɔɔ wre, mi wi krɔ yira ŋga mu ta.
21 Ni Levi leele pre ŋga Israel leele pre yirɛ nyjɛ pie na yɔɔlɛ kɛ kɛ mbra ni kaan nunu yire, mbe yi pe pe krɔyirɛ. Yire yie pe pe tnumu ŋga pe tuni Fninyuŋgo wa kre fɔtɔɔrɔ. 22 Mu yire aŋga na, Israel leele pre n fna mbe da Fninyuŋgo kre na, na kre ma, kumu yi ki fɔtɔɔrɔ. 23 Levi leele pre chiin pie na tnumu tuni Fninyuŋgo kre nu, a na ndro waa punu ki na, pre pie ki mapini tio. Kre kee ŋga we pe mbra mu nanae kro pan. Imi na ni ki yo kre, pia krɔyira ta Israel leele pre nu. 24 Ŋgi na hin? Ni Levi leele pre ŋga yirɛ nyjɛ Israel leele pre we na yɔɔlɛ kɛ kɛ mbra ni kaan nununu yire. Kre ki tia ni yo pe pan na, pe n wa na krɔyira ka ni Israel leele pre nu kre.”
25 A o Tafun Nyiɛkpɔɔ na yo Moses pan mbo, 26 “Yo Levi leele pre pan na, na pe pe yirɛ nyjɛ yi taa kɛ kɛ wee yire shɔ Israel leele pre pan na pe krɔyirɛ yi kre, pe fna mbe pe yi kɛ mbe yi nunu tɛɛ mbe sra wɔ mbe ni ŋga. 27 Pan e srawɔɔ kre we pe na falifun sro, ndee simi fɔŋgɔ tɛɛ mu yirɛ jle wee tɛɛ mu sra wɔ. 28 Kena kre kolo ŋga na yire we na troi mbra e sra woni mbra mi e Tafun Nyiɛkpɔɔ wre kaan, mbe yili Israel leele pre yirɛ kɛ kɛ wee nyjɛ e taa yire nu. Yire sra yirɛ nyjɛ ee wɔ yire srawɔfun Aaron wee yi. 29 E yi wɔ yirɛ cheche nyjɛ e ta yire nu.
30 Na e yi chichiele nyjɛ yi pe cheche wɔ mu kɔ, mbe e hɛnyi yire wru. Pan kie pe na imi na falifun u sra woni, mbe yi hɛnyi wru mbe ta kre. 31 Yire na e chiɛlɛ na e biile we jaa yi ka lawee ŋga e ta kpan nu. Ŋgi na hin? Tnumu ŋga e tuni Fninyuŋgo wa kre fɔtɔɔrɔ yi. 32 Na e Nyiɛkpɔɔ ŋga nyjɛ yi nyu mu pe cheche kre, na e hɛnyi yire ka, yaa pimi li na, na ki pan ma kena e n Israel leele pre sra yirɛ cheche yire tɔ nɛɛrɛ ni, mbaa kɔɔ ku.”