Nyumu Ŋga Ni Pe Nɛɛrɛ Laari
19
A o Tafun Nyiɛkpɔɔ na yo Moses, na Aaron pan mbo, 2 “Mbra ŋga ni e kaan yi kre. Yo Israel leele pre pan na pe paan e ŋga napɔlɔ nyuu, ŋmba u n na fumnɔ, a tlo n wa u na, a pe n da mu u tɛɛ mu tnumu tun ni. 3 Mbe e u wru mbe srawɔfun Eleazar ŋga, mbe sɛ na u ni pe tni haa wa mbookrɔ, mbe pe sɛ u gbo u yiɛ na. 4 Mbe srawɔfun Eleazar kambɛlɛ ni nyimi yire nu, mbe yi nyaara Fninyuŋgo kre yɛsimi gbee kɔɔnashin. 5 Mbe pe yurɔ wre poŋgo sro u yiɛ na. 6 Nyjila ŋga ni yurɔ wre shio kre, mbe srawɔfun wre cedar kaan, na zeere ŋga pe yeeri hyssop kre, na maŋa nyiɛ wa kanhun kre nu. 7 Na srawɔfun wre waa kɔ, mbe u u yirɛ je, mbe weli, mbe chiin pan e tnihaa wa. La, wa pe cheche paala kolo na mbe sɛ su yilakɔŋgɔ. 8 Ŋmba we nuu wre sro wre fna mbe u yirɛ je, mbe weli na. Wre chɔɔ wa pe cheche paala kolo na mbe sɛ su yilakɔŋgɔ.9 Kena blɔ ŋmba u pe cheche u fna mbe nuu ŋmba pe sro wre tɔɔnrɔ koli, mbe sɛ yi ble pe tnihaa wa kre mbookrɔ lawee ŋga ki pe cheche paala kolo na nu. Mbe pe yi tɛɛ wa mbra yi koori mbra chaa nyumu ŋga ni pe sisam nɛɛrɛ laari kre nu. 10 Blɔ ŋmba we yurɔ wre tɔɔnrɔ yire koli wre fna mbe yirɛ je, wre chɔɔ wa pe cheche mbe sɛ su yilakɔŋgɔ. Kre kee ŋga we pe mbra mbe yire na fumblɔ mblɛ pie paan tni mbe chaa e nu kro ŋga nyjila kro nu.
11 Ndro ŋmba we da gboo na kpan, u uyɛ tɔ na nɛɛrɛ mbe sɛ su ble kɔɔnashin na. 12 Ufun wre fna mbe nyumu kre tɛɛ mbe nɛɛrɛ laa uyɛ na ble taarɛ ble, na ble kɔɔnashin ble na, mbe chiin pe cheche. La, na u n uyɛ je ble taarɛ, na ble kɔɔnashin ble na kre, kena ufun wree wa nɛɛrɛ nu tɛ. 13 Ndro ŋmba we da gboo na, a ufun n nɛɛrɛ je mu laa uyɛ na kre, we o Tafun Fninyuŋgo kre tɔ na nɛɛrɛ ni, wre ndro wre fna pe u wɔ mbe yili Israel leele nu. Ŋgi na hin? Pe n nyumu ŋga ni pe sisaa nɛɛrɛ laari kre ka nyaara mu wo u na. A ki tia uu wa nɛɛrɛ nu tɛ.
14 Na ki pan na ndro ku yoŋgo nyuŋgo ka nu. Ndro ŋmba uu wa ki nu kre nyjila kre, na ŋmba we paan le ki nu kro le nɛɛrɛ nu mbe sɛ su ble kɔɔnashin na. 15 A gbolo ŋga kii wa nyuŋgo wa, a pe n ki nyu tɔ kro, nɛɛrɛ ki tɔ. 16 Ndro ŋmba mu kɛ taa ndro ŋmba pe gbo mu wa nyaa, ndee ŋmba u ku uyɛ, ndee gboo kajle, ndee gboo faŋga na kre, kena ufun uyɛ tɔ na nɛɛrɛ ni mbe sɛ su ble kɔɔnashin. 17 Na e chaa mbe ndro wɔ nɛɛrɛ nu kre, e nanyuu ŋmba pe gbo mu u sro mu tɛɛ mu sisam sra wɔ kre tɔɔnrɔ yire yɛ ko e le chɔ nu, mbe lɔɔ nyumu ko mbe le ki nu. 18 Mbe lewo ŋmba u pe cheche hyssop zeere wru mbe ki ni nyumu kre nu mbe nyaara yoŋgo nyuŋgo kre, na ki lam yirɛ kro, na leele mblɛ praa wa ki nu pre na. Mbe ka nyaara mbe wo ndro ŋmba u kɛ taa gboo kajle, ndee ndro ŋmba pe gbo mu wa, ndee ŋmba u ku uyɛ, ndee gboo faŋga na. 19 Ndro ŋmba u pe cheche ki fna u nyumu kre nyaara mbe wo ŋmba u le nɛɛrɛ nu wre na ble taarɛ ble kre, na ki ble kɔɔnashinwo kre na, mbe u wɔ nɛɛrɛ nu ki ble kre. Ndro ŋmba pe wɔ nɛɛrɛ nu wre fna mbe u yirɛ je, mbe weli, kena ki ble kre yilakɔŋgɔ we pe cheche.
20 La, na lewo ŋmba u le nɛɛrɛ wre nsra nɛɛrɛ laa uyɛ na paala kolo na, ki fna mbe pe u wɔ mbe yili u leele nu. Ŋgi na hin? U o Tafun Nyiɛkpɔɔ Fninyuŋgo kre tɔ nɛɛrɛ ni. Ŋga pe n nyumu ŋga ni pe nɛɛrɛ laari ndro na kre nyaara mu wo u na kre ndra na, ki tia u n pe cheche paala kolo na. 21 Kre mbra ŋga ni leni e pan mbe ki tni nyjila kro nu. Ŋmba we nyumu kre nyaara wre fna mbe u yirɛ je, a ŋmba we kɛ taa nyumu ŋga pe nyaara kre na kre we uyɛ tɔ nɛɛrɛ ni mbe sɛ su yilakɔŋgɔ. 22 A yira ŋga lewo ŋmba le nɛɛrɛ nu wre we da kpan, ki kaari nɛɛrɛ yira. A ŋmba we da ki na kpan le nɛɛrɛ nu mbe sɛ su yilakɔŋgɔ.”