2 Nyumu nsraa wa pe tnihaa wa mbe leele pre ta mbe yaka pe, a leele pre na peyɛ nya, mna sɛ Moses na Aaron pan, 3 mna sɛ na taanri na yuu pe pan mbo, “Na o na ku mu chaa o wolo mblɛ pra ku o Tafun Nyiɛkpɔɔ Fninyuŋgo kre yiɛ wa pre nu kuraa, kaa ki prɔ. 4 Mni a e o Tafun Nyiɛkpɔɔ leele koli mu pan mu wa tablɔ tra ŋga nu, mbe wre na o yurɛ paan kun finfin ŋga hin? 5 Mni a e o wɔ mu yili Egypt tra nu, mu pan na o ni kre dɔɔya lawee ŋga nyini nu ŋga hin? Shɔlɔ ma yii wa mna, a fig n wa mna, a tre sɛnyi n wa mna, mbaa yo pomegranate, ndee nyumu oo taa mbe gbɔ kple.” 6 A Moses na Aaron na yili leele pre lawee, mna sɛ pe yiɛ juule Fninyuŋgo kre jlonwee nyu na. A o Tafun wre yɛnyiŋge ŋga kraa chiɛnri kre na pan wa a pra ki nya. 7 A o Tafun Nyiɛkpɔɔ na yo Moses pan mbo, 8 “Mu kanyie ŋga kii wa Nyu Nunu Daka kre yɛsimi wa kre wru mu yii, mbe ŋu na Aaron Israel leele pre kro yeeri mbe fni, mu paara dnɛ kpɔɔ ŋga pe yɛsimi wa kre pan, nyumu we yili ki nu mbe pan, mbe pre na pe yurɛ kro ta mbe gbɔ.”

9 A Moses na kanyie kre wru o Tafun Nyiɛkpɔɔ yiɛ wa, imi na wra ki yo kre. 10 A wre na Aaron na leele pre kro yeeri, a pra pan mu fni dnɛ kpɔɔ kre lawee, a Moses na yo pe pan mbo, “E loo, yire ndikambla, o ti mbe nyumu yili dnɛ ŋga nu mbe pan mbe e taa gbɔ ra?” 11 A Moses na kaan kre yire nyjeeri, mna dnɛ kpɔɔ kre fɔɔri na ki ni gbee shiin, a nyumu na gbun mu yili ki nu na paan, a leele pre na ta mu gbɔ, pre na pe yurɛ ni kro.

12 A o Tafun Nyiɛkpɔɔ na yo Moses na Aaron pan mbo, “Ŋga e n dankna ni na, mu ni ŋga ni buuro, mu le na ni pe cheche Israel leele pre yiɛ na kre ndra na, yaa le na leele mblɛ ni tra ŋga ni pe ŋga kre na.” 13 Kre kee ŋga na pe Meribah lawee kre nu.^a Bawa Israel leele pre naa taanri o Tafun Nyiɛkpɔɔ na, a bawa wra pe nyina na u pe cheche.

14 Moses na yire Kadesh na mna leele wɔ mu tun Edom ŋunu pan mbo, “Mandiɛ ŋga ki yiri mu sele wolo Israel leele pan, mu chin kanyana nyjɛ yi o da, 15 Pra o tolɛɛlɛ yii mu sɛ Egypt tra nu a o na sɛ tni wa yɛlɛ tataara. A Egypt leele pre na wre na o tolɛɛlɛ pre fiŋge chichie. 16 La, ŋga o na nyɛni mu o Tafun Nyiɛkpɔɔ wre yeeri kre, wra loo o pan, mna nyjeeri bituŋu, a wra pan mu o wɔ mu yili Egypt tra nu wa. Fuŋgaami ŋga oo wa Kadesh na mu mbra mu tra nyu na mna. 17 Kena jande, o ŋga kolo mbe o tro mu tra ŋga nu. Waa le ndro see, ndee mbe ndro tre sɛnyi kun mbe li. A waa gbɔ wa kɔlɔ nu. Ŋunu kokpɔɔ kre na oo tro, waa yɔ mbe tro kalie ndee kamɛŋɛ mbe sɛ su na o kro we tro mbe sɛ.”

18 A Edom ŋunu wre na kna mbo, “Yaashia tro tra ŋga nu, na e waa je, oo pan mbe wi na e ni.”

19 A bitumblɔ pre na kna mbo, “Kokpɔɔ kre, kre oo yii. A na ki pan na o yurɔ waa e nyumu gbɔ kuraa kre, oo ki fɔlɔ tɔ. Ŋga o chaa kro yi na oo nyaari mbe tro tra kre nu.”

20 A pra ndru mna yo mbo, “Kolo n wa mbe e tro.”

A Edom leele pre na yili ŋunɔ wifɛɛnlɛ faŋgafɛɛnlɛ tataara ni mbe sɛ wi na pe ni. 21 Ŋga pra nya na Edom leele pre n na chaa mbe pe tro pe tra nu kre, a pra klɛ mu sɛ kolo fɔŋgɔ wru.

22 Israel leele pre kro na yili Kadesh na wa, mna sɛ da nyua ŋga pe yeeri Hor kre na. 23 Nyua kre naa wa Edom sam na, bawa o Tafun Nyiɛkpɔɔ na paara Moses na Aaron pan mbo, 24 “Aaron, we ku mbe u tolɛɛlɛ kɔŋgɔ ni. Wa le tra ŋga ni Israel leele ŋga kre nu. Ŋgi na hin? E kro shiin na yiri mna ni nyu kee taan Meribah nyumu lawee kre nu. 25 Aaron na u biblɔ Eleazar wru mu sɛ nyua Hor ndra na. 26 Na e waa da wa, mbe mu Aaron srawɔ dodonyi yire wɔ u na, mbe u biblɔ Eleazar le. Ŋgi na hin? Bawa Aaron we ku mbe u tolɛɛlɛ kɔŋgɔ ni.” 27 A Moses na taa o Tafun nyu kee kre na, a pra Hor nyua kre nduu Israel leele pre kro yiɛ na. 28 A Moses na Aaron srawɔ dodonyi yire wɔ u na, mna u biblɔ Eleazar le. A Aaron na ku nyua kre ndra na. A Moses na Eleazar na tii tra. 29 Ŋga kra kpali na Aaron ku kre, Israel leele kro na kumu pe ble fulo na kɛ.