Jethro Na Sɛ Moses Shaari
18
Moses nafun blɔ ŋmba praa yeeri Jethro, a wra pe srawɔfun Midian na wre na kee nyjɛ Nyiɛkpɔɔ na pe mu Moses, na Israel leele pre ŋga yire kro loo, mna imi na o Tafun Nyiɛkpɔɔ na Israel leele pre wɔ mna yili Egypt na yire kro loo. 2 Jethro na Moses chɔ Zipporah ŋmba wra tia wra ndru mu sɛ katoo wre wru mu ya uyɛ na. 3 Pre na Moses bibilɛ shiin pra sɛ u shaari haa. Wra u bibilɛ pre nunu mɛɛ tɛɛ Gershom. Ŋgi na hin? Moses na yo mbo, “Ni pan mu kaari fuŋu tra fɔŋgɔ nu.” 4 A haŋu wre mɛɛ na yi Eliezer. Ŋgi na hin? Wra yo mbo, “Ni lɛ Nyiɛkpɔɔ wre wi ni yafun, wre wra ni shɔ mu yili Pharaoh brɔfiɛn ŋunu kɛɛ.” 5 Jethro, Moses nafun blɔ wre, na Moses bibilɛ pre, na pe lo, na Moses kɔŋgɔ ni fimi lawee kre nu, lawee ŋga nu pra sɛ tni mu mbra Nyiɛkpɔɔ nyua kre na kre. 6 Jethro na klu mna tia pra sɛ yo Moses pan mbo, “Mi mu nafun blɔ Jethro, ni paan na mu chɔ, na mu bibilɛ shiin pre ni mu pan.”7 Ki tia Moses na sɛ u nafun blɔ wre fni haa, mna sɛ kosie kan, u yiɛ, mna yiri mu u gbeŋge shiun. Pra peyɛ shaari wa mna kna mu sɛ u yoŋgo nyuŋgo nu. 8 Moses na Jethro bɔ mandiɛ kee ŋga o Tafun Nyiɛkpɔɔ wre na pe Pharaoh, na Egypt leele pre na, Israel leele pre ndra na, na ŋga pe paan, kanyana nyjɛ nyini yi pe da kolo, na imi o Tafun Nyiɛkpɔɔ wre pe shɔ mu da. 9 Jethro yiɛ na shɔ kee chichiele nyjɛ o Tafun Nyiɛkpɔɔ na pe mu Israel leele ŋga yire kro na, imi na wra pe shɔ mna yili Egypt leele pre kɛɛ kre. 10 A wra yo mbo, “O Tafun Nyiɛkpɔɔ wre wo yi mɛɛ, wre wra e shɔ mu yili Egypt leele, na Pharaoh kɛɛ.
11 Fuŋga ni chin na o Tafun Nyiɛkpɔɔ wre kpɔɔ mu wɛ sɛɛnlɛ yire kro na. Ŋgi na hin? Wra yire kee nyjɛ krɛrɛ pe nyjila ŋga ni wra nya na Egypt leele pre Israel leele pre pini ndra shelee kee.” 12 A Jethro, Moses nafun blɔ wre na yurɔ wɔ mna u sro, yire na yirɛ yɛ ni, mna sra wɔ mu Nyiɛkpɔɔ ŋga. A Aaron na Israel loplombo pre kro na Moses nafun Jethro na sɛ chaa mu sra sro kre li Nyiɛkpɔɔ yiɛ.
Pra Kalalifɛɛnlɛ Wɔ
13 Ŋga ki nyiŋge na se kre, Moses na sɛ tni na leele pre kalɛɛ lii, a leele pre na yire mu fɛ mu u kun mu yire bnimi mu sɛ su yilakɔŋgɔ. 14 Ŋga u nafun blɔ Jethro na kee nyjɛ Moses naa pini na leele pre kaan yire nya kre, a wra kna mu yo Moses pan mbo, “Yira ŋgi kee mu pini leele mblɛ na ŋga hin? Yira ŋgi ki tia ŋu nunu tni na kpra kunfun wi, a leele pre yire mu mu fɛ mu kun mu yire bnimi mu sɛ su yilakɔŋgɔ ŋga hin?”
15 A Moses na kna mbo, “Pan ki fna ni pe. Ŋgi na hin? Mi pan leele pre paan ndaa pe nyina kee ŋga Nyiɛkpɔɔ chaa. 16 Na leele pre plɛ kakrɔ ta kpan, mi pan pe paan na ki ni mbe ni ki yo, mbe pe nyina Nyiɛkpɔɔ mbra yire.”
17 A Moses nafun blɔ Jethro na kna mbo, “Kee ŋga mu pini kre n nyu. 18 Ŋu na leele mblɛ pe paan na kaalɛɛ ni mu pan pre kro, fna e fnai finfin. Tnumu kre kpɔɔ mu wɛ mu na, ŋu nunu waa ja mbe ki yii.
19 Kena ndie tɛɛ ni pan mbe ni mu ŋga jawala, a Nyiɛkpɔɔ we ya mu na. Ŋu mu yire leele pre na Nyiɛkpɔɔ lalaa rɛ, mna pe kakrɔɛ yire kee shio mna yuu u pan.
20 Ta pe nyina mbra yire, mna pe nyina kolo ŋga na pie tro mbe tni, na kaalɛɛ nyjɛ pe fna mbra pini. 21 La, bilɛ mblɛ pe fna, mu na Nyiɛkpɔɔ fiɛ wɔ leele pre nu, bilɛ mblɛ pe pe kprafɛɛnlɛ, a pe yiɛ n nyina swa na, mbe mu pe wɔ loplombo. Leele pre yɔɔlɛ kagbenyi, kagbenyi, na lafaa lafaa, na fuloe shiin shiin na kɛ kɛ, mbe mu plɛ yɔɔlɛ kɛ kɛ, mbe loplombo pre tɛɛ tɛɛ pe nyu na kro. 22 Ti mbe pre pe leele pre kpra kunfɛɛnlɛ nyjila kro nu, la, kala ŋga kie sheli mbe wɛ pe na kre, mbe pra paan na ki ni mu pan. Yi fiɛn fiɛn yire mbe praa yire yuu peyɛ na. Kre kie ti mbe mu tnumu kre pe foofoo mu pan. Ŋgi na hin? Ŋu na pre we tnumu kre yɔ mbe eyɛ ŋga. 23 Na mu ki pe ma, a Nyiɛkpɔɔ waa li ki na, kie ti mbe ma fna ma na, a pie leele pre krɛrɛ kakrɔɛ kee li, mbe pe kolo ta mbe sɛ katoo wejinyiŋge ni.”
24 Moses na ndie tɛɛ u nafun blɔ Jethro kee kre na, mna kee nyjɛ wra yo yire kro pe. 25 Wra bilɛ mblɛ pe fna le mu wɔ Israel leele pre nu, mna pe pe loplombo leele pre na, wra leele pre yɔɔlɛ kagbenyi kagbenyi, na lafaa lafaa, na fuloe shiin shiin na kɛ kɛ, mna plɛ yɔɔlɛ kɛ kɛ, mna loplombo pre tɛɛ tɛɛ pe nyu na. 26 Loplombo pre na pe leele pre kpra kunfɛɛnlɛ nyjila kro nu. A praa paan na kalɛɛ nyjɛ yi sheli yire ni Moses pan, la, nyjɛ yira pe pe pan yiɛyiɛ yire, a praa yire lii peyɛ na. 27 A Moses na u nafun blɔ Jethro na peyɛ kla, a wra u wa kolo, a Jethro na ndru mu sɛ u tra nu.