Nyumu Na Yili Dnɛ Nu
17
Israel leele pre kro na yiri Sin fimi tra kre nu, na pe sɛ tni mna, mbe pe yiri mbe sɛ lawee fɔŋgɔ nu, imi na o Tafun Nyiɛkpɔɔ wre na yo pe pan kre. Pra sɛ tni lawee ŋga praa yeeri Rephidim kre nu, la, nyumu nsraa wa wa mbe pe ta mbe gbɔ. 2 A leele pre naa taanri Moses na mbo, “O ŋga nyumu mbe o gbɔ.” A Moses na kna mbo, “Mni a e na taanri ni na ma hin? Mni a e na o Tafun Nyiɛkpɔɔ wre pini na le hin?”3 La, gbɔɔ kre na wɛ leele pre na kpɔɔ, a kra tia pra kro na taanri Moses na. Praa yuu mbo, “Mni a mu wre na o biile, na o yurɛ wɔ mu yili Egypt tra nu, mbe gbɔɔ pan mbe o gbo ŋga hin?”
4 A Moses na nyɛni mna o Tafun Nyiɛkpɔɔ wre yeeri mbo, “Mni mbe leele mblɛ pe hin? Kre yi ŋga, pe chaa mbe ni waari na dnɛ ni.”
5 O Tafun Nyiɛkpɔɔ na yo Moses pan mbo, “Nyaari mu sɛ yiɛklu leele pre pan. Israel loplombo pre plɛ wɔ mu ya muyɛ na, na e shie mu mu kanyie ŋga ni mna Nile lɔɔ kre yiɛ fɔɔri kre wru. 6 Mbe sɛ yire dnɛ kpɔɔ ka na yiɛ, Sinai nyua kre jaara. Na maa da ki na, ki fɔɔri na kanyie kre ni, nyumu we yili ki nu mbe pan, mbe leele pre ta mbe gbɔ.” A Moses na kre kee kre pe Israel loplombo pre yiɛ na.
7 A wra lawee kre yeeri Massah na Meribah.a Ŋgi na hin? Israel leele pre na taan wa, a ŋga pra o Tafun Nyiɛkpɔɔ wre pe mu le, mna yo mbo, “Kena o Tafun Nyiɛkpɔɔ wree wa o nu ndee mni wo?”
Pra Wi Na Amalek Leele Ni
8 Amalek leele na pan mna Israel leele pre tɔ Rephidim lawee kre nu wa. 9 A Moses na yo Joshua pan mbo, “O bilɛ pre plɛ wɔ mbe e sɛ wi na Amalek leele pre ni. Baŋga mbe sɛ yire nyambie kre na, mbe kaan ŋga Nyiɛkpɔɔ yo ni wru kre yii kɛɛ.” 10 Joshua na sɛ wi na Amalek leele pre ni imi na Moses na yo kre, a Moses, na Aaron, na Hur na sɛ nduu nyambie kre ndra na. 11 Na Moses kɛnyii wa nyjeeri, mbe Israel leele pre na leele pre jani, la, na waa na kɛnyi trei tra, mbe leele pre na Israel leele pre jani. 12 Ŋga Moses kɛnyi yire na fna u na kre, a pra dnɛ wru mna pan mu tɛɛ Moses tapan a wra tni ki na. A Aaron na Hur na u kɛnyi yii mna yi yire nyjeeri, ndro nunu naa wa kokoo ŋga na, a haŋu wre naa wa kokoo ŋgaa na, kra tia u kɛnyi yire na kro mu fraka nyjeeri mna sɛ su na yila na to. 13 Kra tia Joshua na Amalek ŋunɔwifɛɛnlɛ pre ja mna pe gbo brɔfiɛn yiɛshiin ni.
14 A o Tafun Nyiɛkpɔɔ na yo Moses pan mbo, “Kre ŋunɔ ŋga e wi mu yili ŋga kee nyunɔ mu tɛɛ, mbe ki ti e na ki sɔɔnri. Yo Joshua pan na, mbe Amalek leele pre kro kla, mbe ndro wa pe kee sɔɔnri na tra na.” 15 Moses na sra gbunu sin wa mna ki mɛɛ tɛɛ mbo, “O Tafun Nyiɛkpɔɔ wre wi ni flaŋgaa.” 16 A Moses na yo mbo, “O Tafun Nyiɛkpɔɔ wre da na we wi na Amalek leele ni nyjila kro nu.”