2 Fimi tra kre nu wa Israel leele pre kro naa taanri Moses na Aaron na. 3 Pra yo pe pan mbo, “Na o Tafun Nyiɛkpɔɔ wre na o gbo Egypt tra nu kuraa kaa kre prɔ. Bawa o naa kaara taa na kaa imi na o chaa, mnaa sro nyjɛ o naa chaa lii. A e sɛ o wɔ mu pan na o ni tablɔ tra ŋga nu, mbe ti mbe klo paan o gbo.”

4 A o Tafun Nyiɛkpɔɔ na yo Moses pan mbo, “Mbe ti mbe sro yiri nyjeeri mbe wo e pan. Leele pre pe yili mbe sɛ nyjɛ pie jaa ka ki ble kre lam chiin yoori. Kre kolo ŋga na mbe yire mbe pe pe mbe le, na pie jaa li ni nyu kee na. 5 Ble kɔɔnanu ble kre na rɛ, pe yoori nyjɛ pie jaa ka ble shiin, mbe yi gbeele mbe tɛɛ.”

6 A Moses na Aaron na kee yire kro yo Israel leele pre pan mbo, “Yila kɔŋgɔ ŋga, ee chin na o Tafun Nyiɛkpɔɔ wre wra e wɔ mu yili Egypt tra nu. 7 A baŋga bnimi ee o Tafun Nyiɛkpɔɔ wre kanhun kre nya. Ŋgi na hin? Ŋga e taanri u na kre u ki loo. Na e taanri mi na Aaron na o, leele mblɛ lɛ wre hin?” 8 A Moses na kna mbo, “Ee chin na o Tafun Nyiɛkpɔɔ wre we jaa e ŋga kaara mbe e ka yila kɔŋgɔ, na paanu nyjɛ e chaa mbe ka bnimi. Ŋgi na hin? Ŋga e taanri u na kre u ki loo. A mblɛ lɛ wre hin? Wre na ma e taanri, la, o Tafun Nyiɛkpɔɔ wre na e taanri.”

9 A Moses na yo Aaron pan mbo, “Yo Israel leele pre kro pan na pe pan mbe yire o Tafun Nyiɛkpɔɔ wre yiɛ. Ŋgi na hin? U e taanraa kre loo.” 10 Ŋga Aaron naa paara leele pre kro pan kre, pe kro na yiɛ kna na le fimi tra lawee kre nu, mna o Tafun Nyiɛkpɔɔ kanhun nya tlo kre nu. 11 A o Tafun Nyiɛkpɔɔ na yo Moses pan mbo, 12 “Ni Israel leele pre taanraa loo. Kena yo pe pan na yila kɔŋgɔ ŋga pie kaara ta mbe ka, mbe sro ta mbe li bnimi mbe yɔɔ imi na pe chaa. A ee chin na mi wi e Tafun Nyiɛkpɔɔ.”

13 Ki ble kre yilakɔŋgɔ siichookrurue tataara plɛ na yiri mu pan mu wo mu lawee ŋga nu leele pre na nyi kre nu, mna ki tɔ poŋgo, a ŋga nyiŋge na se bnimi kre, a mɛŋɛ na wo titi mu pe tnihaa kre fɛ mu kun. 14 Ŋga mɛŋɛ kre na yuwa kre, a pra yirɛ bɛɛlɛ yɛ nya tra kre yiɛ na, a yira pe na bentɔ yi. 15 Ŋga Israel leele pre na yi nya kre, pe nsra yi chin, a praa yuu pe yɛ pan mbo, “Yirɛ nyi nyini yi nyjɛ hin?” A Moses na yo pe pan mbo, “Sro ŋga o Tafun Nyiɛkpɔɔ wre e kaan mbe e li yi. 16 Kee ŋga o Tafun Nyiɛkpɔɔ wre yo yi kre mbo, ‘Ndro kro u yoori imi yie u da, la, ndro kro fna mbe ta galɔm yɔɔ kalonyi yire nu kro.’”

17 Israel leele pre na pe imi Moses na yo pe pan kre. Pe plɛ na koli nɛɛrɛ, a plɛ na koli fiɛn fiɛn. 18 Ŋga pra kɔ mna yi kra galɔm ni kre, mblɛ pra koli nɛɛrɛ pre nsra ta mu tro, a mblɛ pra koli fiɛn fiɛn pre wee nsra pe klo. Leele pre kro na ta imi na yie pe da. 19 A Moses yo pe pan mbo, “Ndro waa shia yɛ tɛɛ mbe nyiŋge se yi na.” 20 La, pe plɛ nsra li Moses kee kre na, a pra je mna yɛ tɛɛ a nyiŋge na se yi na. La, ŋga nyiŋge na se bnimi kre, na yi fiɛlɛ yilii, mnaa ndio. Kra tia Moses krɔ na kun na pe ni. 21 Na nyiŋge se bnimi kpan, leele pre kro we sɛ yoori imi na yie pe da, na yila waa yili mu wɛɛri mbe nyjɛ yi kro tra yire nya.

22 Ble kɔɔnanu wo kre na, pra yoori imi pe yoori kre ma gbee shiin. Pra yoori ndro nunu pan galɔm nyini. A Israel leele pre loplombo pre na pan mu mandiɛ bɔ Moses pan. 23 A Moses na yo pe pan mbo, “Wuuble yi baŋga, a ki pe ble cheche o Tafun Nyiɛkpɔɔ wre pan. Kena e nyjɛ e chaa mbe fɔ yire fɔ, e nyjɛ e chaa mbe sɔɔ yire sɔɔ, kena e hɛnyi yire tɛɛ baŋga bnimi.

24 Ki tia pra yɛ tɛɛ a nyiŋge na se bnimi, imi na Moses na yo kre, a yi nsra ndio, a yi nsra fiɛlɛ le.” 25 A Moses na kna mbo, “E yire ka aŋga. Ŋgi na hin? Wuuble yi aŋga o Tafun Nyiɛkpɔɔ pan. Yaa yi yɛ nya tra yiɛ na aŋga. 26 Ble kɔɔnanu ee yi yoori, la, kɔɔnashin wo kre pe Wuuble, a yi yɛ wa wo.”

27 Ble kɔɔnashin ble kre na kre, leele pre plɛ na je mna yili fimi na mbe sɛ sro yire yɛ yoori, la, pe nsra ta. 28 A o Tafun Nyiɛkpɔɔ na yo Moses pan mbo, “Nyjila ŋgi nu leele mblɛ we ni kee nyjɛ ni yuu pe pan yire je mbe sɛ su hin? 29 E Sɔɔnri na e Tafun Nyiɛkpɔɔ wre wra Wuuble kre le e pan, kre ki tia ble kɔɔnanu ble na wra e kaan paanu nyjɛ yie e da ble shiin. Kena ble kɔɔnashin ble kre na, wa n fna mbe yili u katoo mbe sɛ haka.” 30 Kena leele pre na wuu ble kɔɔnashin ble kre na.

31 Israel leele pre naa sro yire yeeri manna.^a Pan yira nyi na bentɔ yi, mna fniŋge, a pan yi tnamu na nyi na pe mimi na srɛ chaa mu yi kla. 32 A Moses na kna mbo, “O Tafun Nyiɛkpɔɔ yo o pan na, ‘E manna yire yɛ koli e tɛɛ, mbe e yi ta mbe kɔɔ e nanae nyina, na ŋga ndaa e wɔ mu yili Egypt na kre, sro nyjɛ ndaa e ŋga a e na ka tablɔ tra kre nu yi.’”

33 A Moses na yo Aaron pan mbo, “Chɔ cha, mu manna yire galɔm yɔɔ koli mu le ki nu, mu tɛɛ O Tafun Nyiɛkpɔɔ yiɛ, Suminyuŋgo wa mbe yi tni wa mbe o nanae kɔɔ yi ta mbe nya.” 34 Aaron na sɛ manna yire tɛɛ Nyu Nunu Danka kre yiɛ, imi na o Tafun Nyiɛkpɔɔ na yo Moses pan kre. 35 Israel leele pre na manna yire ka yɛlɛ fuloe shiin, mna sɛ su na pra da Canaan tra kre na praa shie mbe sɛ tni kre sam na. 36 Yira ŋga ni praa yirɛ kra, a praa yeeri omer kre we pe galɔm yɔɔ.