Moses Mɛɛ Ŋga Wra Kɔ
15
A Moses na Israel leele pre na kre mɛɛ ŋga kɔ mna o Tafun Nyiɛkpɔɔ wre ŋga mbo,“Mbe mɛɛ kɔ mbe
o Tafun Nyiɛkpɔɔ wre ŋga,
Ŋgi na hin? U wi mu yili.
Soolo na pe nduufɛɛnlɛ kro,
u pe ŋunɔ mu le epo nu.
2 O Tafun Nyiɛkpɔɔ wre wi
ni faŋga, na ni mɛɛ ŋga mbe kɔ,
a wre wi ni ŋmaashɔfun.
Wre wi ni Nyiɛkpɔɔ,
ki tia mbe u ŋga mɛɛ.
Ni lɛ Nyiɛkpɔɔ wi,
ki tia mbe u kpɔɔ.
3 O Tafun Nyiɛkpɔɔ wre,
blɔ wi ŋunɔ,
a u mɛɛ yi, Mi Wi.
4 Wre u Pharaoh ŋunɔwifɛɛnlɛ,
na pe sookɛɛ ŋunɔ mu le epo nu.
U tia epo nyiɛ kre Pharaoh wifɛɛnlɛ
loplombo titie li.
5 Epo latɛɛ na pe li peii,
a pra tii mu sɛ tni tapan
na dnɛ pe wa lɔɔ.
6 O Tafun Nyiɛkpɔɔ,
mu jaŋga kpɔɔ, a kii fiɛrɛ ni.
O Tafun Nyiɛkpɔɔ,
mu jaŋga kpɔɔ kre tɛɛ
mu loŋgo wre pile brobro.
7 Mu jaŋga ŋga ki kpɔɔ
kre ni mu tɛɛ mu mblɛ pe yiri
mu mu taan pre kɔ mu wa.
Mu tia mu krɔkuɔn kpɔɔ kre nyi
na kanhun yi,
a ki pe sro na yua kpakpɛɛ yi.
8 Mu maweele fuflɛ ni mu tɛɛ
mu epo nyumu yii mu yire titɛɛ.
Nyumu kre na yire mna pe na
mboo yi,
a latɛɛ nyumu na sheli na dnɛ yi.
9 Loŋgo wre na uyɛ kpɔɔ mbo,
‘Mbe pe kɔŋgɔ ni mbe sɛ pe yii.
Mbe pe yirɛ shɔ mbe yi yɔ
mbe nyjɛ ni chaa wru,
mbe ni brɔfiɛn ŋunu tini
mbe yire pe na
mbe pe yirɛ kro shɔ pe pan.’
10 La, mna fuflɛ ŋga mu ŋuni fɔ,
a kra tia epo na pe li.
Pan pra tii na prim pe wa epo nu.
11 O Tafun Nyiɛkpɔɔ,
sɛɛnlɛ yire ŋgi haa
ki da na mu ni hin?
Ŋmbi u pe cheche u jaŋga nu,
a u kee fiɛrɛ ni u yɛnyiŋge nu,
a wra kawako kee pini
na ŋu wi hin?
12 Mna mu jaŋga kpɔɔ kre nyina,
a kra tia tra na pe jɔli.
13 Mu koroo ŋga kii wa
nyjila kro nu kre ndra na,
mu yiɛ klu leele mblɛ
ndra mu lɔ pre pan.
Mu faŋga kre ni mu pe le mbe sɛ
na pe ni mu tra cheche kre nu.
14 Waŋgrɛ leele we ki loo
mbra seeri,
a fiɛrɛ kpɔɔ we Philistine yii.
15 Tutom we wo Edom ŋulo na,
a Moab yɛkulo we na jijawi,
mbe Canaan leele
dankna kro kɔ pe nu,
16 fiɛrɛ kpɔɔ we wo pe na.
O Tafun Nyiɛkpɔɔ,
mu jaŋga kpɔɔ kre we ti
pe yire titɛɛ na dnɛ yi,
mbe sɛ su na mu leele mblɛ mu lɔ
pre we pe wa mbe tro.
17 Mu pan na pe ni
mbe paan pe luwi mu nyua
ŋga yi mu krɔyira kre na,
lawee ŋga ŋu
o Tafun Nyiɛkpɔɔ wɔ
na mu tnihaa yi kre,
cheche ndoo ŋga ŋu titi kɛ tɛɛ
mu sin kre nu.
18 O Tafun Nyiɛkpɔɔ we ŋunumu
li nyjila kro nu.”
Miriam Mɛɛ Ŋga Wra Kɔ
19 Israel leele pre na nyaari mna tro epo lam tra waara na. La, ŋga Egypt leele pre soolo, na pe sookɛɛ, na soolo nduufɛɛnlɛ pre na le epo kre nu kre, o Tafun Nyiɛkpɔɔ na tia nyumu kre na gbun mna chaa, mna pe li pei.
20 A Aaron jaa Nyiɛkpɔɔ kee nyanyofun ŋmba praa yeeri Miriam wre na u biŋge ble wru, a chiɛlɛ pre kro na yiri mu taa u kro, na binyi bɛɛlɛ gbuun na yoo. 21 A Miriam naa mɛɛ koni na yuu mbo, “E mɛɛ kɔ,
e o Tafun Nyiɛkpɔɔ wre ŋga.
Ŋgi na hin? U wi mu yili,
mu soolo na pe nduufɛɛnlɛ ŋunɔ,
mu wa epo nu.”
Nyumu Susrom Kre
22 A Moses na yiɛklu na Israel leele pre ni a pra yiri epo nyiɛ kre lawee mna sɛ Shur fimi tra kre nu. Pra nyaari ble taarɛ ni mna tro tablɔ tra kre nu na pra nyumu nya. 23 Ŋga pra sɛ da lawee ŋga praa yeeri Marah nu kre, pe nsra ja mbe bawa nyumu gbɔ. Ŋgi na hin? Na bawa nyumu kre sro. Kre ki tia pra lawee kre yeeri Marah.a 24 Ki tia leele pre na taan Moses na mna yo mbo, “Yira ŋgi oo ta mbe gbɔ lawee ŋga nu hin?” 25 A Moses na nyɛni mu o Tafun Nyiɛkpɔɔ wre yeeri, a o Tafun Nyiɛkpɔɔ na u nyina tiŋge pre ka, a wra ki wru mu wa nyumu kre nu, a kra tia nyumu kre na tna. Bawa o Tafun Nyiɛkpɔɔ na pe ŋga mbra nyjɛ na pie taa, a bawa wra pe pe mu le. 26 Wra yo pe pan mbo, “Na e ndie tɛɛ mi e Tafun Nyiɛkpɔɔ wre pan chiriri, na ŋga ki fraka ni yiɛ pini, mu na lii ni mbra yire kro na, mba ti mbe yira nyjɛ ni ndaa Egypt leele gbun yire yɛ to e na. Ŋgi na hin? Ni mɛɛ yi Mi Wi, a mi ni e trai.”
27 A pra yiri wa mna sɛ lawee ŋga praa yeeri Elim kre nu. Bawa bloe kɛmbɔshiin yɛ, na shuɛ tinyi fuloe taarɛ na kɛ yɛ na nyi, a pra sɛ tni mu mbra nyumu kre na.