5 Ŋga Egypt ŋunu Pharaoh wre na loo na Israel leele pre sɛ kre, wre na u loplombo na pe jawala chinɛ mna yo mbo, “Yira ŋgi kee o pe ŋga hin? O tia Israel leele pre sɛ mbe o pe la tnumu tun haa.” 6 A ŋunu wre na sɛ to u sookaa na, mna u ŋunɔ wifɛɛnlɛ wru mu ya uyɛ na. 7 Wra u soo kɛɛ chichiele lafɛɛ kɔɔnanu wɔ, mna ya Egypt sookɛɛ kro na, a ŋunɔ wifɛɛnlɛ loplombo na nduu pe na. 8 O Tafun Nyiɛkpɔɔ na tia Egypt ŋunu Pharaoh loloŋgo na sheli, a wra Israel leele mblɛ pra gbuntitirem tɛɛ na shie pre kɔŋgɔ ni. 9 Egypt leele pre wifɛɛnlɛ, na pe soolo kro, na pe sookɛɛ kro, na yi nduufɛɛnlɛ pre kro, na Israel leele pre kɔŋgɔ ni mna sɛ pe da lawee ŋga nu pra sɛ tni chiɛri epo nyiɛ ŋga kra mbra Pi-Hahiroth na, mu yiɛ kan Baal-Zephon na kre nu.

10 Ŋga Israel leele pre na nya na Egypt ŋunu na u leele pre pe kɔŋgɔ nini kre, fiɛrɛ kpɔɔ na pe yii, a pra nyɛni mu o Tafun Nyiɛkpɔɔ wre yeeri. 11 A pra yo Moses pan mbo, “Kena fanyi yi nsraa wa Egypt tra nu, kre ki tia mu pan na o ni tablɔ tra ŋga nu mbe o paan kun ree? Yira ŋgi kee mu pe o na, mu o wɔ mu yili Egypt tra nu ŋga hin? 12 O nsra ki yo mu pan Egypt tra nu na, ‘Laa o na mbe o pe Egypt leele pre tinlɛ?’ Na o na kro mna pe pe tinlɛ, kaa ki prɔ ŋga o paan mbe ku tablɔ tra ŋga nu ŋga na.”

13 A Moses na kna mu yo leele pre pan mbo, “Yaa fiɛ! E yire gbiŋmbi. Aŋga ee nya kolo ŋga na o Tafun Nyiɛkpɔɔ we tro mbe e shɔ. Egypt leele mblɛ e nyaa aŋga ŋga, yaa pe nya na fio. 14 O Tafun Nyiɛkpɔɔ we wi mbe e ŋga, la, ŋga ki fna e pe yi na ee yire gbrum mbra le.”

15 A o Tafun Nyiɛkpɔɔ na yo Moses pan mbo, “Mni a mna nyɛni na ni yeeri hin? Yo leele pre pan na pra shie yiɛ. 16 Mu kanyie kre tini mu ki nyini epo kre na. Kie peeri mbe Israel leele pre nyaari tra waara na mbe lɔɔ kre kun. 17 Mbe ti mbe Egypt leele pre lolonyi sheli, mbe pe taa Israel leele pre kro mbe le epo kre nu na. A mbe yire Pharaoh, na u wifɛɛnlɛ pre, na u sookɛɛ, na u soolo nduufɛɛnlɛ pre na mbe yɛnyiŋge ta. 18 Na mbaa yire Pharaoh, na u sookɛɛ, na u soolo nduufɛɛnlɛ pre na maa yɛnyiŋge ta kre, Egypt leele pre kro we chin na mi wi Tafun Nyiɛkpɔɔ.”

19 Bawa Nyiɛkpɔɔ nyjeeri bituŋu ŋmba wraa yiɛklu Israel leele pre wifɛɛnlɛ pan wre na kna mna sɛ yire pe kro. A tlo gedeŋge ŋga kra yiɛklu pe pan kre na kna mna sɛ yire pe kro. 20 Kraa wa pre na Egypt ŋunɔwifɛɛnlɛ pre, na Israel leele pre lalaa. Na ble wɔ mbe tlo kre ti ndram wɔ kokoo ŋga na Egypt leele pre nyi kre na, la, Israel leele pre we na nyaa kokoo ŋga na pe nyi kre na chasi. Kra tia leele pre kro shiin wifɛɛnlɛ nsra ja mbe da pe yɛ na blee kre.

21 Moses na u kɛ kre tini mu kan epo kre na, a ki ble kre blee, o Tafun Nyiɛkpɔɔ na tia fuflɛ kpɔɔ ka na yire yila finhaa mu gbun mna pan mu nyiŋge se, kra tia epo kre na mɔŋɔ mna ndru kro, a nyumu kre na peeri shiin, a epo kre lam na yuwa gbeŋglen. 22 A Israel leele pre na nyaari tra waara na epo kre lam mna ki kun, nyumu kre na yire na mboo yi kamɛŋɛ na kalie. 23 Egypt leele pre na pe kɔŋgɔ ni, a Pharaoh soolo, na u sookɛɛ, na u soolo nduufɛɛnlɛ pre na le epo kre nu mu taa pe na. 24 Kie pe nyisee nyu na, a o Tafun Nyiɛkpɔɔ na yire tlo gedeŋge ŋga kraa nyini kanhun kre nu, mna Egypt ŋunɔwifɛɛnlɛ pre le, mna tia tutom na wo pe na. 25 Wra tia pe sookɛɛ yire jeelee na foli foli, a kra tia pe nsra ja na shie. A Egypt leele pre na kna mbo, “E ti mbe o laa Israel leele mblɛ kro. Pe Tafun Nyiɛkpɔɔ wre u yire pe kro na wii na o ni.”

26 A o Tafun Nyiɛkpɔɔ na yo Moses pan mbo, “Mu kɛ tini mu nyini epo kre na, mbe ki ti nyumu kre fo mbe chaa mbe Egypt leele pre, na pe soo kɛɛ, na pe soolo nduufɛɛnlɛ pre kro li.” 27 A Moses na kɛ tini mu nyini epo kre na. Ŋga nyiŋge naa sii kre, epo kre na gbun mu chaa imi na kra nyi fa. Egypt leele pre na gbeŋmba na pie wi mbe yili, la, o Tafun Nyiɛkpɔɔ na pe ŋunɔ mu le epo kre nu. 28 Nyumu kre na fo mu chaa, mna soo kɛɛ yire, na soolo nduufɛɛnlɛ pre, na Pharaoh ŋunɔwifɛɛnlɛ mblɛ praa Israel leele pre kɔŋgɔ ni ni mna sɛ le epo kre nu pre kro li. Hali ndro nunu kuraa nsra kro pe nu. 29 La, Israel leele pre na nyaari tra waara na mna epo kre kun, ŋga nyumu kre na yire na mboo yi, kamɛŋɛ na kalie kre ndra na.

30 Kre ble kre o Tafun Nyiɛkpɔɔ na Israel leele pre shɔ mu yili Egypt leele pre kɛɛ, a Israel leele pre na Egypt leele pre nya na pe ku ku mu sni epo kre nyu na. 31 Ŋga Israel leele pre na jaŋga kpɔɔ ŋga ni o Tafun Nyiɛkpɔɔ na tɛɛ mu Egypt leele pre ja kre nya kre, leele pre na o Tafun Nyiɛkpɔɔ wre fiɛ. A kra tia pra o Tafun Nyiɛkpɔɔ wre na u sumifun Moses shɔnli.