3 A Moses na yo leele pre pan mbo, “E ble ŋga na e na yili Egypt tra nu kre sɔɔnri, tinlɛ na lɛ yire wa, a o Tafun Nyiɛkpɔɔ na e wɔ wa na u jaŋga kpɔɔ kre ni. Kena yaashia paanu ŋga nu yiisi nyi ka yire ble yire nu. 4 Aŋga ble ŋga, Abib nyiɛpɔ ŋga nu e yili Egypt tra nu. 5 Na o Tafun Nyiɛkpɔɔ waa da na e ni Canaan leele, na Hittite, na Amora, na Hivite, na Jebusite leele tra nu, kre tra ŋga nyu mu tna, a kre na wra da mna e tolɛɛlɛ ŋga na we e ŋga ki yi kre. E na yire ble yire lii kre nyiɛpɔ ŋga nu. 6 Ble kɔɔnashin yire nu, e na paanu ŋga nu yiisi n wa kaa, a ble kɔɔnashin ble kre nu mbe e ble yire kpɔɔ li mbe o Tafun Nyiɛkpɔɔ ŋga. 7 E paanu ŋga nu yiisi n wa ka yire ble kɔɔnashin yire nu, yaashia yiisi, ndee paanu ŋga nu yiisi nyi tɛɛ e lawee e tra kre kro nu. 8 Na yire ble yire nyu waa to, e yo e bibilɛ pan na, ‘Kee ŋga o Tafun Nyiɛkpɔɔ na pe mna o ŋga mna o wɔ mu yili Egypt na kre ki tia o na yire kee nyjɛ pini.’ 9 Ble yire lie we na e sɔɔnri, mbe pe na yira e pɔ kɛ, ndee e nduwe na, yie na e sɔɔnri mbe e na o Tafun Nyiɛkpɔɔ mbra yire kee paara. Ŋgi na hin? O Tafun Nyiɛkpɔɔ wre wra u jaŋga kpɔɔ tɛɛ mna e wɔ mu yili Egypt tra nu. 10 E na yire ble yire lii yi nyjila nu yɛlɛ nyini.

11 Na o Tafun Nyiɛkpɔɔ wre waa sɛ na e ni Canaan leele tra nu, maa e ŋga ki yi, imi na wra da mna nyu yo yire na e tolɛɛlɛ pre pan kre, 12 ki fna mbe e bijloe bibilɛ mblɛ ee se pre wru mbe o Tafun Nyiɛkpɔɔ wre ŋga. E yurɛ bibilɛ jloe kro, o Tafun Nyiɛkpɔɔ wre wolo lɛ. 13 Bubnɔ ŋmba we pe o Tafun Nyiɛkpɔɔ wo wre, e mbɔɔ pɔ tɛɛ e u ndra lɔ. La, na yaa u ndra lɔ naa, kena e u yulɔ ka. E e bijloe bilɛ kro ndra lɔ ma na. 14 Kena na e bibilɛ waa e wie mbakɔ na, ‘Kee nyjɛ e pini nyjɛ nɔɔ yi ŋgi hin?’ E yo pe pan na, O Tafun Nyiɛkpɔɔ wre wra u jaŋga kpɔɔ kre tɛɛ mna o wɔ Egypt tra nu, nyjila ŋga ni o na pe tinlɛ wa kre. 15 Ŋga Pharaoh na ndie kan mna je na wa ti mbe o sɛ kre, o Tafun Nyiɛkpɔɔ wre na yurɛ, na leele bijloe kro gbo Egypt tra nu. Kre ki tia o na sra woni na yurɛ bijloe bilɛ ni na o Tafun Nyiɛkpɔɔ wre kaan, na o bijloe bibilɛ ndra loni. 16 Yire ble lie ŋga ki o sɔɔnri, mbe pe na yira ŋga o pɔ kɛ, ndee o nduwe na, na o sɔɔnri na o Tafun Nyiɛkpɔɔ wra u jaŋga kpɔɔ tɛɛ mna o wɔ mu yili Egypt tra nu.”

17 Ŋga Pharaoh na kolo ŋga mbe Israel leele pre sɛ kre, Nyiɛkpɔɔ nsra tro na pe ni kolo ŋga kra tro Philistine tra nu kre na, la, na kre kii gbru ya. Ŋgi na hin? Nyiɛkpɔɔ na yo mbo, “Na ki waa pan na Philistine leele pre we tun na pe ni, pie kɔɔ pe jawala chinɛ mbe ndru mbe sɛ Egypt tra nu.” 18 Ki tia Nyiɛkpɔɔ na yiɛklu na pe ni, mna tia pra vile mu kun mna tro kolo ŋga kraa wa tablɔ tra nu, na shie epo nyiɛ kre nu kre na. Israel leele pre na peyɛ kna mna yili Egypt tra nu na wihaa pe shie.

19 Ŋga praa shie kre, Moses na Joseph kajle koli. Ŋgi na hin? Joseph na tia Israel leele pre na da mu u ŋga, a wra chin mu ku, na pan pie u kajle pe. A wra yo pe pan mbo, “Na Nyiɛkpɔɔ waa e wɔ mu yili Egypt tra nu, e ni kajle koli e yili tra kre nu.”

20 Israel leele pre na yili Succoth na, mna sɛ tni Etham na chiɛri, mu mbra tablɔ tra kre nyu na. 21 Na nyiŋge se, mbe o Tafun Nyiɛkpɔɔ yiɛklu pe pan tlo kpɔɔ nu. Tlo kre we gede mbe yiɛklu mbra pe nyina kolo, a na ble wɔ, mbe ki kaari kanhun mbe praa nyaa ki na, mbe ki ti mbe pe jaa nyaari lafo na blee. 22 Nyjila kro nu tlo gedeŋge kre naa wa pe yiɛ lafo na, na ble wɔ mbe ki kaari kanhun pe yiɛ.