Klɛntro Ble Kre
12
O Tafun Nyiɛkpɔɔ wre na yo Moses na Aaron pan Egypt tra nu mbo, 2 “Nyiɛpɔ ŋga nu e nyi ŋga, kre kie pe nyiɛpɔ yire kro ndra, mbe yiɛklu yɛlɛ kre nu e pan. 3 Kena yo Israel leele pre kro pan na, nyiɛpɔ ŋga ble kɛ ble na kpan, blɔ kro fna mbe yire u katoo leele jeelee na mbe mbapɔlɔ, ndee sikapɔlɔ wɔ, sele yire kro fna mbe wa wɔ. 4 Na ki pan na katoo ka leele n nɛɛ mbe jaa mbapɔlɔ ka kre, kena pre na pe chaminae pe chaa mbe u yɔɔlɛ. Ki fna pe u yɔɔlɛ mbe peyɛ ŋga imi na pe nɛɛmu da, na imi na ndro kro we jaa ka. Imi leele pre kro we jaa ka mbe da ee le, mbe chiin mbapɔlɔ wre wɔ. 5 Yurɔ ŋmba ee wɔ wre fna mbe pe mbapɔlɔ blɔ, ndee sikapɔlɔ blɔ ŋmba u da yɛlɛ nyu, a u n na fumnɔ. 6 E pe le e sɛ su nyiɛpɔ kre ble kɛmbɔjijirɛ ble na, ki yilakɔŋgɔ, mbe Israel leele pre kro yurɛ pre gbo. 7 Mbe leele pre yurɔ ŋmba pie gbo wre nyimi yire yɛ ko mbe katoo ŋga nu pie yurɔ wre ka kre krɔɛ jeelee, na yi ndrɛ kɛɛn yire mana na yi ni. 8 Ki ble kre blee, ki fna mbe pe kaara yire fɔ mbe ka, pe kaara yire na wrɛ sisrom, na paanu ŋga nu yiisi n wa chaa mbe ka. 9 Pia shia kaara yire ka bibre, ndee mbe ka sɔɔ nyumu ni, la, pe yurɔ wre fɔ kro, u ndra, na u jeelee, na u lɛɛ kro, pe yi fɔ pe ka. 10 Pia shia ti mbe nyiŋge se ka na, na ki waa pan na nyiŋge ka se, ki fna pe ki sro. 11 Kolo ŋga na pie tro mbe kaara yire ka yi kre. E grere, e e kpawrɛ le, e e kanyie wru e yii kɛɛ. E fiɛlɛ e yi ka, kre yi o Tafun wre Klɛntro ble kre. 12 Ki ble kre lam blee, mbe tro Egypt tra kre nu, mbe leele na yurɛ bijloe kro gbo mbe tro, a mbe Egypt sɛɛnlɛ yire kro ndie tini, Ni mɛɛ yi Mi Wi. 13 Nyimi yire yie pe sɛmbɛɛrɛ yirɛ e kalonyi nyjɛ nu e nyi yire nu, a na ni nyimi yire nya, mbe e klɛ mbe tro. A ndie tiniɛ ŋga ni ni paan mbe Egypt leele kla kre wa da e na. 14 Kre ble ŋga fna e ki sɔɔnri mbra ki lii ble kpɔɔ, mbe e ki le mbra mbe tɛɛ, mbe e kro leele mblɛ pie kɔɔ yiri baŋga pre na kre ble kre lii, mbra o Tafun Nyiɛkpɔɔ kaan nyjila kro nu.
Paanu Ŋga Nu Yiisi N Wa Ka Ble Yire
15 E paanu ŋga nu yiisi n wa ka ble kɔɔnashin. Mu yire ble ŋga ki yiɛklu kre na, e yiisi wɔ e kalonyi yire nu, ŋmba we yira ŋga nu pe yiisi le ka yire ble kɔɔnashin yire nu kpan, ufun wre wa pe ni ndro na.
16 Ble ŋga ki yiɛklu kre nu ki fna e fni mbe ni sumi, a ble kɔɔnashin ble kre nu, mbe e fni mbe ni sumi na. A yire ble yire nu ndro waashia tnumu tun, fɔna sro ŋga ee pe mbe leele li chiin bɔkɔ. 17 E na paanu ŋga nu yiisi n wa ble yire lii. Ŋgi na hin? Kre ble ŋga ki yiɛklu kre nu ndaa e sele leele pre wɔ mu yili Egypt tra nu. Kena e na ble yire lii nyjila kro nu, mbe yi kro ma mbe mblɛ pie kɔɔ yiri mbakɔ pre ŋga. 18 Mu yire nyiɛpɔ jle kre ble kɛmbɔjijirɛ ble kre yilakɔŋgɔ nyu na, mu sɛ su ki ble fulo na nunu ble kre yilakɔŋgɔ nyu na, e na paanu ŋga nu yiisi n wa kaa. 19 Ble nununu kɔɔnashin, ki n fna pe yiisi nya e kalonyi nu. A ŋmba we yira ŋga nu yiisi nyi ka kpan, na fuŋu wi o, na Israel ndro wi o, ufun n fna mbe pe ni leele pre wa na. 20 Wa waa shia yira ŋga nu yiisi nyi le nyuu. Lawee ŋga nu e nyi mu tni kpan, e na paanu ŋga nu yiisi n wa kaa.”
Klɛntro Ble Ŋga Ki Yiɛklu
21 A Moses na kɛ wa mna Israel leele pre loplombo pre kro yeeri, mna yo pe pan mbo, “E sɛ nyaanyaa e sɛ mbaala, na sikaala wɔ e yurɛ pre nu e e sele yire ŋga, mbe pe pe gbo mbe klɛntro ble yire li. 22 E zeere nyjɛ pe yeeri hyssop yire yɛ cha, e yi ni yirɛ nyjɛ nu e nyimi yire le le yire nu, e nyimi yire tɛɛ e e krɔɛ jeelee, na yi ndrɛ kɛɛn yire mana. Ndro wa waashia yili u nyuŋgo mbe sɛ haka mbe sɛ su bnimi. 23 Na o Tafun Nyiɛkpɔɔ wre waa pan mbe Egypt leele pre gbo kre, we nyimi yire nya e krɔɛ yire na, kena u yire krɔɛ yire klɛ mbe tro, wa ti mbe nyjeeri bituŋu ŋmba u leele kuu wre le e katoo mbe ndro gbo e nu. 24 Yire na e nanae fna mbe li yire kee nyjɛ na nyjila kro nu. 25 Na e waa le tra ŋga o Tafun Nyiɛkpɔɔ we e ŋga kre nu, imi na wra nyu yo kre, e yire kee nyjɛ kro sɔɔnri e na yi pini. 26 Na e biile waa e wie na, ‘A yire kee nyjɛ o pini ŋga nɔɔ yi ŋgi hin?’ 27 E yo pe pan na, ‘Klɛntro ble sra yi mu o Tafun Nyiɛkpɔɔ ŋga. Ŋgi na hin? Wra Israel leele pre kalonyi klɛ mu tro Egypt na, mna Egypt leele pre gbo, la, u nsra wre pe yaka.’” Ŋga Moses na paara ma mu kɔ kre, a Israel leele pre na kosie kan mna o Tafun Nyiɛkpɔɔ wre sumi. 28 Israel leele pre na taa kee nyjɛ o Tafun Nyiɛkpɔɔ na yo Moses na Aaron pan yire kro na.
Bijloe Pre Kumu
29 Kie pe ndroo kɛmbɔshiin, a o Tafun Nyiɛkpɔɔ na pan mna bijloe mblɛ praa wa Egypt tra nu kro gbo, mu yire Pharaoh ŋmba wra jɔɔn li bijlo na, hali mna sɛ su ndro ŋmba pe yii mu le nyuŋgo bijlo na, na pe yurɛ bijloe kro ni. 30 Pharaoh na u loplombo, na Egypt leele pre kro na yiri ndroo kre, mna nyɛni kpɔɔ Egypt tra nu. Ŋgi na hin? Katoo ka nsraa wa a ndro nsra ku ki nu. 31 Ki ble kre blee kre, Pharaoh na Moses na Aaron yeeri mna yo pe pan mbo, “Yire na Israel leele pre e sɛ e laa ni leele pre na, e sɛ e Tafun Nyiɛkpɔɔ wre sumi imi na e yo kre. 32 E e yurɛ wru e sɛ imi na e yo kre, la, mbe e dwan mbe ni ŋga.”
33 A Egypt leele pre na yiri na yuu Israel leele pre pan na pe yili tra kre nu nyaanyaa mbe sɛ, na yuu mbo, “Na e n yili nyaanyaa mu sɛ oo ku mbe kɔ.”
34 A Israel leele pre na yiri mna pe mimi nyjɛ nu pe nsra yiisi le, a pra yi bri mu tɛɛ yire wru, mna le le yirɛ nyjɛ nu praa paanu tuŋgo nu, mna yi pɔ pɔ yonyi ni mna yi wru mu taa taa pe patiɛ na. 35 Israel leele pre na taa kee ŋga Moses na yo pe pan kre na, mna sɛ Egypt leele pre tali swafiŋge, na swanyiɛ yirɛ, na yonyi. 36 O Tafun Nyiɛkpɔɔ wre na tia Egypt leele pre na nyu pe na, a yirɛ nyjɛ pra pe tali kro, pra pe ŋga yi yi, kra tia Israel leele pre na Egypt leele pre yirɛ ta mna sɛ.
Pra Yili Egypt Na
37 Israel leele pre na yili Rameses na mna nyaari mu sɛ Succoth na. Pe bilɛ bribri naa kagbenyi lafɛɛ kɔɔnanu, pe chiɛlɛ na pe biile nsra tɔɔnri mu chaa, a pe kro naa nyaari tra. 38 Lewaala plɛ na chaa Israel leele pre nu mna sɛ, pan pe mbaala, na pe sikaala, na pe nui na nɛɛ mna ya pe na. 39 Pra pe mimi nyjɛ ni pra yiri Egypt na yire yɛ pe paanu mna yi fɔ ma, pe nsra yiisi le yi nu. Mimi nyjɛ pra bri mu tɛɛ yire pe nsra yiisi le yi nu, a ŋga pra pe ni mu yili Egypt na kre ndra na, pe nsra daje ta mna pe mimi nyjɛ pra bri mu tɛɛ yire shie a yira tin.
40 Israel leele pre na li yɛlɛ lafɛɛ jijirɛ na fulo na kɛ Egypt tra nu. 41 Ble ŋga na yɛlɛ lafɛɛ jijirɛ na fulo na kɛ yire nyu na to kre, ki ble kre o Tafun wre leele pre na yili Egypt na. 42 Ŋgi na hin? Ki ble kre blee kre o Tafun Nyiɛkpɔɔ na kɛ tɔ u leele pre na mna pe wɔ Egypt tra nu. A kre ble kre blee kre fna na ki da, mbe Israel leele wa sni, kena pe o Tafun Nyiɛkpɔɔ wre ŋga mɛɛ blee kre, mbe leele mblɛ pie kɔɔ yiri mbakɔ pre ki le mbra pini ma.
Klɛntro Ble Kre Mbra
43 O Tafun Nyiɛkpɔɔ wre na yo Moses na Aaron pan mbo, “Klɛntro ble yire mbra nyjɛ ni e kaan yi kre. Yaashia ti mbe ndro ŋmba u n pe Israel ndro Klɛntro ble yire sro yire ka le nyuu. 44 La, na e swa tɔɔnri mu tnu lɔ, a e u fɛŋgɛ kun rɛ, we jaa sro kre ka li. 45 La, fuŋu ŋmba u pan mbe tni e nu nyjila chiɛri, ndee ndro ŋmba e wru mbe u tnumu tun e pan n fna mbe ka li. 46 Katoo ŋga nu sro kre we pe kre, bawa ki fna mbe sro kre li, yaashia yili na sro kre ka ni fimi na. A yaashia yurɔ wre kajle ka ja. 47 Kre ble kpɔɔ ŋga, Israel leele kro fna mbe ki li. 48 Na fuŋuu wa mu tni e nu, na chaa mbra o Tafun wre Klɛntro ble yire lii kre, ki fna mbe u u bibilɛ mblɛ pee wa u katoo kro fɛnyi knumu tun, kre we chiin jaa ble yire li na Israel ndro ŋmba pe se tra kre nu wi. Biblɔ ŋmba fɛŋgɛ pe n kun n fna mbe sro kre ka li. 49 Israel ndro ŋmba pe se tra kre nu, na fuŋu ŋmba u pan mu tni e nu kro, mbra nunu kre na ki fna mbe e kro taa.” 50 Israel leele pre kro na taa kee nyjɛ o Tafun Nyiɛkpɔɔ na yo Moses na Aaron pan yire kro na. 51 A kre ble kre na o Tafun Nyiɛkpɔɔ na Israel leele pre wɔ mu yili Egypt tra kre nu.