Moses Na Yo Na Pe Bijloe We Ku
11
Bawa o Tafun Nyiɛkpɔɔ na yo Moses pan mbo, “Mbe pan na ndie tiniɛ nunu ka ni Pharaoh, na Egypt tra nu. Kre kɔkro, we ti mbe e yili mna mbe sɛ, a na waa yo we ti mbe e sɛ, we e ni poŋgo mbe e sɛ. 2 Kena yo Israel leele pan na, bilɛ na chiɛlɛ kro pe sɛ pe tnifɛɛnlɛ pan mbe sɛ pe tali swanyiɛ, na swafiŋge yirɛ.” 3 O Tafun Nyiɛkpɔɔ wre na tia Egypt leele pre na nyu Israel leele pre na, a kra tia Pharaoh sumifɛɛnlɛ pre, na Egypt leele pre kro na Moses kpɔɔ.4 A Moses na yo Pharaoh pan mbo, “Kee ŋga o Tafun Nyiɛkpɔɔ yo yi kre, ‘Mbe tro Egypt na ndroo. 5 Biblɔ jlo ŋmba pe se Egypt na kro we ku, mu yire Pharaoh biblɔ jlo ŋmba we jɔɔn li na, mbe sɛ su letaa bichable ŋmba u shɔlɔ trei biblɔ jlo na, mbe sɛ su pe yurɛ bijloe na kro, pie ku peii. 6 Leele we nyɛni kpɔɔ Egypt tra nu, ŋga ka ki n da mu pe tun, a ki ka waa da mbe pe ma na. 7 La, Israel leele pre nu, hali nyukuan wa tuanri lewo, ndee yurɔ na. Bawa ee chin na o Tafun Nyiɛkpɔɔ wre u kaan le Egypt leele pre na Israel leele pre lalaa. 8 A mu sumifɛɛnlɛ pre kro we pan mbe kosie kan ni yiɛ mbra yuu na, E sɛ, ŋu na mu kotɔmblɔ pre kro e yili e sɛ. Na ki waa pan ma, mbe yili mbe sɛ.’” A Moses na krɔ sisaa tɛɛ mna flo Pharaoh lawee wa.
9 O Tafun Nyiɛkpɔɔ na klu mu yo Moses pan mbo, “Pharaoh we je, wa ti mbe leele pre sɛ, mbe ki ti ni kawako kee tataara pe Egypt tra nu.” 10 Moses, na Aaron na yire kawako kee nyjɛ krɛrɛ pe Pharaoh yiɛ na. La, o Tafun Nyiɛkpɔɔ na tia u loloŋgo na sheli, a u nsra tia Israel leele pre na yili u waŋgra kre nu.