3 Ki tia Moses na Aaron na sɛ Pharaoh pan mna sɛ yo u pan mbo, “Kee ŋga wre Hebrew leele Tafun Nyiɛkpɔɔ wre yo yi kre, ‘Nyjila ŋgi nu mu muyɛ nyjii mbe ni ŋga hin? Ti mbe ni leele pre sɛ mbe sɛ ni sumi. 4 Na mu je na ma ti mbe pe sɛ kre, mbe ti mbe kpatɔ pan mu waŋgra ŋga nu baŋga. 5 Pie nɛɛ mbe tra yiɛ tɔ mbe kia na nyaa. Yirɛ chiɛri nyjɛ yi kro, a nyiɛsubie yire nsra yi kla yire, pie pan mbe yi ka peii, yire na tinyi nyjɛ yi wrɛ funi seele nu kro. 6 Pie pan mbe ŋu, na mu sumifɛɛnlɛ pre, na Egypt leele pre kalonyi kro nyi, kre kee ŋga e lɛɛlɛ, na e tolɛɛlɛ n da mu ki ka nya, mu yire ŋga pe pan mu tni tra ŋga nu mu pan mu su aŋga.’” A Moses na krɔ kna mna sɛ mu Pharaoh ti.

7 A Pharaoh sumifɛɛnlɛ pre na kna mna yo u pan mbo, “Tolɛɛ, nyjila ŋgi nu blɔ ŋmba we o tɔɔra mbe sɛ su hin? Ti mbe leele pre sɛ pe Tafun Nyiɛkpɔɔ wre sumi. Mu n nya imi Egypt kla mu daa?”

8 A pra ndru mu sɛ Moses na Aaron yeeri mu pan Pharaoh lawee. A wra yo pe pan mbo, “E sɛ e Tafun Nyiɛkpɔɔ wre sumi, la, ni chaa mbe chin leele mblɛ pe shie.”

9 A Moses na kna mbo, “Wre na o biile, na o blɛlɛɛlɛ, na o chalɛɛlɛ kro o shie. O bibilɛ na o bichiɛlɛ, na o yurɛ kro, o shie na pe ni. Ŋgi na hin? Ki fna o sɛ ble kpɔɔ li mbe o Tafun Nyiɛkpɔɔ wre ŋga.”

10 A Pharaoh na kna mbo, “Nyiɛkpɔɔ we ni kisi na mbe ti mbe yire na e biile na e chiɛlɛ sɛ, fuŋga ni chin na e jawala fɔɔn le. 11 Mba ki ta, e bilɛ pre chiin wru e sɛ e Tafun Nyiɛkpɔɔ wre sumi, na pan e chaa mbe pe.” A pra Moses na Aaron ni mu flo Pharaoh yiɛ wa.

12 A o Tafun Nyiɛkpɔɔ na yo Moses pan mbo, “Kɛ tini mu nyini Egypt tra na, mbe ki ti kpatɔ pan tra kre nu, mbe yirɛ nyjɛ nyiɛsubie yire nsra kla yire kro ka.” 13 A Moses na u kanyie kre nyini Egypt na, a o Tafun Nyiɛkpɔɔ na tia fuflɛ ka na gbun mu yiri yila finhaa mna tro tra kre nu. Fuflɛ kre na gbun ble kre kro nu, mna ndru mu gbun blee. Nyiŋge naa yo kie se bnimi kre, na fuflɛ kre pan na kpatɔ pre ni. 14 Pra Egypt tra kre kro shɔ mu ta. Lawee ŋga nu mu tro tra kre nu kpan, mu pe nya tataara. Imi na kpatɔ wre na nɛɛ mu da kre, ki ka n da mu pe tun, a ki ka waa da mbe pe ma na. 15 Pra pan mna tra kre yiɛ tɔ, a ki yiɛ naa woo poŋgo. Pra yirɛ nyjɛ yira kro a nyiɛsubie yire nsra kla yire ka peii, yirɛ nyjɛ yiraa wa see, na tinyi sɛnyi kro, pra yi ka peii. Hali pe nsra wrɛ nyiŋge ka ti tiŋge, ndee wrɛ sro ka ti Egypt tra nu.

16 A Pharaoh na tia pra Moses na Aaron yeeri nyaanyaa mu u ŋga, a wra yo pe pan mbo, “Ni sisaa pe mu e Tafun, e Nyiɛkpɔɔ wre, na yire titi taan. 17 Kena e ni sisam ti e ni kɛ na, e e Tafun Nyiɛkpɔɔ wre tali, mbe u kre kumu kanyana ŋga laa ni na.” 18 A Moses na flo Pharaoh lawee mna sɛ o Tafun Nyiɛkpɔɔ wre tali. 19 A o Tafun Nyiɛkpɔɔ wre na tia fuflɛ kre na saŋga, mna kna na gbuun badaaŋga mu yiri yila tohaa. Fuflɛ kre na kpatɔ wre mɔŋɔ mna se le epo nyiɛ kre nu, hali nunu chom kuraa nsra kro Egypt tra nu. 20 La, o Tafun Nyiɛkpɔɔ na tia Pharaoh loloŋgo na sheli, a u nsra tia Israel leele pre na sɛ.

21 A o Tafun Nyiɛkpɔɔ na yo Moses pan mbo, “Mu kɛ yire mu nyini nyjeeri, mbe ki ti wɔmu kprikpri Egypt tra kre tɔ.” 22 A Moses na kɛ yire mna nyini nyjeeri, a kra tia wɔmu kprikpri na Egypt tra kre tɔ ble nununu taarɛ. 23 Lewo nsraa u ŋmbrɔ nyaa, ble nunu taarɛ na ndro wa ja mbe yili mbe sɛ haka. La, Israel leele pre lawee nyjɛ nu pra nyi mu tni kre rɛ, ndram naa nyaa wa.

24 A Pharaoh na Moses yeeri mna yo u pan mbo, “Fuŋga rɛ, e sɛ e Tafun Nyiɛkpɔɔ wre sumi. E sɛ na e chiɛlɛ na e biile kro ni, la, e yurɛ pre rɛ, e sɛ e pre ti.”

25 La, Moses na kna mbo, “Ki fna mu ti o sɛ na yurɛ mblɛ oo sɛ gbo mbe sra wɔ, na mblɛ oo sro mbe sra wɔ mbe o Tafun Nyiɛkpɔɔ wre ŋga pre ni. 26 Kena ki fna o sɛ na o yurɛ pre ni na, waa nunu chom kuraa ti mna. Pe plɛ ni oo tɛɛ mbe sra wɔ mbe o Tafun Nyiɛkpɔɔ wre ŋga. A na o n le wa waa chin yurɛ mblɛ ni oo tɛɛ mbe sra kre wɔ.”

27 O Tafun Nyiɛkpɔɔ wre na tia Pharaoh loloŋgo na sheli, u nsra chaa mbe pe ŋga kolo mbe pe sɛ. 28 A Pharaoh na yo Moses pan mbo, “Flo ni yiɛ mu sɛ, maa shia pan ni yiɛ na. Ble ŋga na mu ni yiɛ nya na, mu ku.”

29 A Moses na kna mbo, “Imi na mu yo kre, ni loo, mba yili mu yiɛ na na yɛŋgɛ.”