Pe Yurɛ Na Ku
9
O Tafun Nyiɛkpɔɔ na yo Moses pan mbo, “Sɛ yo Pharaoh pan na, kee ŋga wre Hebrew leele Tafun Nyiɛkpɔɔ wre yo yi kre, ‘Ti mbe ni leele pre sɛ mbe sɛ ni sumi. 2 Na maa je na ma ti mbe pe sɛ, mu kro mu pe yii mu tɛɛ kre, 3 o Tafun Nyiɛkpɔɔ wre jaŋga kpɔɔ kre we ti mbe yira le mu yurɛ kro nu, mu soolo, na mu bubunlɔ, mu nyuuma, na mu nui, na mu mbaala, na mu sikaala kro, yira kre we le pe nu. 4 La, o Tafun Nyiɛkpɔɔ wre wa ti Israel leele pre yurɛ pre ku, la, we ti mbe Egypt leele pre wolo pre ku.’” 5 O Tafun Nyiɛkpɔɔ wre na nyjila tɛɛ mbo, “Baŋga mbe ti mbe kre kee ŋga pe tra ŋga nu.”6 Ŋga nyiŋge na se kre, o Tafun Nyiɛkpɔɔ na kee ŋga wra yo kre pe. Egypt leele pre yurɛ mblɛ praa poorii kro na ku, la, Israel leele pre yurɔ nunu chom nsra ku. 7 Pharaoh na leele wɔ mu tun, a pra sɛ le na yɛŋgɛ yi na Israel leele pre yurɛ pre nunu chom kuraa n ku rɛ. La, na kii wa u nu na wa ti mbe leele pre sɛ.
Laŋmbɛɛ Na Pe Waari Poŋgo
8 A o Tafun Nyiɛkpɔɔ na yo Moses na Aaron pan mbo, “E sɛ tɔɔnrɔ wɔ chɔɛ fɔ haa, nyjɛ yie kɛnyi nyi, mbe Moses yire Pharaoh yiɛ na mbe yi wa fuflɛ na. 9 Yie pe na bloŋgo yi mbe wo Egypt tra kre kro nu, a laŋmbɛɛ we leele na yurɛ tin mbe pe klɛ tra kre nu poŋgo.” 10 A pra sɛ tɔɔnrɔ yire yɛ wɔ chɔɛ fɔ haa ka nu, mna sɛ yire Pharaoh yiɛ na, a Moses na yi nyina fuflɛ na, a laŋmbɛɛ na leele, na yurɛ tintin mna kaari klɛ. 11 Befɛɛnlɛ pre nsra ja mu yire Moses yiɛ na, laŋmbɛɛ yire yira pre na Egypt leele pre kro tintin kre ndra na, befɛɛnlɛ pre nsra ja mu yire Moses yiɛ na. 12 La, o Tafun Nyiɛkpɔɔ na tia Pharaoh loloŋgo na sheli, a u nsra ndie tɛɛ Moses na Aaron pan, wra ndie kan imi na o Tafun Nyiɛkpɔɔ na ki yo Moses pan kre.
Nyiɛsubie Na Wo
13 A o Tafun Nyiɛkpɔɔ na yo Moses pan mbo, “Baŋga bnimi pupu, mu sɛ yo Pharaoh pan na, ‘Kee ŋga wre Hebrew leele Tafun Nyiɛkpɔɔ wre yo yi kre. Ti mbe ni leele pre sɛ mbe sɛ ni sumi. 14 Na kre ma, mbe ti mbe ŋu na mu loplombo, na mu leele pre kanyana titi nya, mbe ki ti e chin na wa n wa mu da na ni ni tra na. 15 Ŋgi na hin? Ki fna ndaa ni jaŋga kpɔɔ kre nyina, mbra ti yira fuɛn na ŋu, na mu leele pre gbun, mbra e kro nɔɔ pɔ mbe laa tra yiɛ na. 16 La, kee ŋga na ni yila mu mu ti yi na, ni chaa mbe mu ni jaŋga nya, mbe ki ti mbe ni mɛɛ kpali tra kro nu. 17 A nde mu je na muyɛ nyina, mu n na chaa mbe ni leele pre ŋga kolo mbe pe sɛ. 18 Le, baŋga imi nyu, mbe ti mbe nyiɛsubie wo titi, nyjɛ yɛ yi n da mu wo Egypt tra nu tun, mu yire nyjila ŋga ni pe tra wa. 19 Kena ti mbe pe pan na e leele, na e yurɛ kro ni mbe paan le nyinyi nu, ŋgi na hin? Nyiɛsubie yire we wo leele, na yurɛ mblɛ pie kro fimi na pre kro na mbe pe gbo.’”
20 Pharaoh sumifɛɛnlɛ mblɛ praa o Tafun Nyiɛkpɔɔ kee kre fiɛ pre na pe nyaanyaa mna sɛ pe tinlɛ, na pe yurɛ wru mu pan katoo. 21 La, mblɛ pe nsra o Tafun Nyiɛkpɔɔ kee kre wru pre, na pe tinlɛ, na pe yurɛ ti fimi na.
22 A o Tafun Nyiɛkpɔɔ na yo Moses pan mbo, “Mu kɛ yire mu nyini nyiɛ yiɛ na, mbe ki ti nyiɛsubie wo Egypt tra nu poŋgo, yie wo leele, na yurɛ, na yira ŋga kii wa see kro na.” 23 Ŋga Moses na u kanyie kre nyini nyiɛ yiɛ na kre, a o Tafun Nyiɛkpɔɔ na tia nyiɛ na twanri, na nyini plipli tra yiɛ na, a nyiɛsubie naa woni. A o Tafun Nyiɛkpɔɔ na tia nyiɛsubie yire na wo Egypt tra kre nu kro. 24 Nyiɛsubie yire naa woni, a nyiɛ kre na nyini na shie na paan. Yira wo titi, mu yire ŋga pe Egypt kun ndro n da mu ki ka nyini nya ma tun. 25 Yirɛ nyjɛ yiraa wa fimi na Egypt tra kre nu kro, nyiɛsubie yire na wo yi na mna yi kla kro, leele na yurɛ kro na chaa. Yira wo mna pe yirɛ nyjɛ pra luu seele nu kro kla, hali mna tinyi kuari mu wo peii. 26 Goshen tra ŋga nu Israel leele pre na nyi mu tni kre chiin nu nyiɛsubie yire nsra wo.
27 A Pharaoh na leele tun Moses, na Aaron pan a pra pan, a wra yo pe pan mbo, “Fuŋga ni chin na ni sisaa pe. O Tafun Nyiɛkpɔɔ wre u fraka, a mi na ni leele pre, wre punu. 28 Kena jande e e Tafun Nyiɛkpɔɔ wre tali, mbe u nyiɛtwanraa, na nyiɛsubie yire ti ma. Mbe ti mbe e sɛ, yaa tni mna na.”
29 A Moses na kna mbo, “Na mbaa yili chia kre na na shie, mbe kɛ yire mbe o Tafun Nyiɛkpɔɔ wre tali. Nyiɛtwanraa kre we ti, a nyiɛsubie yire wa wo na, mbe ki ti e chin na O Tafun Nyiɛkpɔɔ wre wo yi tra. 30 La, ni chin na ŋu na mu sumifɛɛnlɛ pre n na o Tafun Nyiɛkpɔɔ wre fiɛ tun.”
31 Nyiɛsubie yire na wo mna shɔlɔ na kɔdɔli kla. Ŋgi na hin? Na yua yire bie leni, a kɔdɔli yire na toto pini. 32 Fifiire rɛ, yaka nsra yire ta. Ŋgi na hin? Na yi n bie le tun.
33 A Moses na yili Pharaoh pan wa, mna yili chia kre mbookrɔ, mna sɛ u kɛnyi yire nyjeeri mna o Tafun Nyiɛkpɔɔ tali, titɛɛ kre nu to, a nyiɛtwanraa, na nyiɛsubie yire, na nyiɛ yire kro na kun. 34 Ŋga Pharaoh na nya na nyiɛ kre, na nyiɛsubie yire, na nyiɛtwanraa yire kun kre, wra ndru mu sisaa pe na, a wre na u sumifɛɛnlɛ pre na ndru mu pe lolonyi sheli. 35 Pharaoh nsraa chaa mbe Israel leele pre sɛ, kra tia wra ndie kan imi na o Tafun Nyiɛkpɔɔ na yire Moses na mu yo kre.