Kpanhɔɔnlɔ Na Tra Kre Tɔ
8
A o Tafun Nyiɛkpɔɔ wre na yo Moses pan mbo, “Sɛ yo Pharaoh pan na, ‘Kee ŋga o Tafun Nyiɛkpɔɔ wre yo yi kre, mbo ti mbe ni leele pre sɛ, mbe sɛ ni sumi. 2 Na maa je a mu n shiaa tia pe sɛ, mbe ti mbe kpanhɔɔnlɔ pan mbe mu waŋgra kre tɔ poŋgo. 3 Nile lɔɔ kre, kpanhɔɔnlɔ we ki shɔ mbe ta. Pie pan mbe le mu pan katoo, mbe le mu pan mu sni nyuŋgo, mbe sɛ nduu mu pan dɛŋglɛ na. Pie sɛ le mu loplombo, na mu leele pre kro pan katoo, mbe sɛ le pe paanu fɔ hɛɛ, na yirɛ nyjɛ nu pe paanu tuŋgo kro nu. 4 Kpanhɔɔnlɔ pre we na yeni mbra ndru ŋu na mu leele, na mu loplombo kro na.’”5 O Tafun Nyiɛkpɔɔ wre na yo Moses pan mbo, “Yo Aaron pan mbe u kɛ tini mbe u kanyie kre nyini lɔɛ, na lɔɛ nyjɛ pre titi tuulo, na lawee nyjɛ nu nyumu yire kro nu, mbe ki ti kpanhɔɔnlɔ pan mbe Egypt tra kre tɔ poŋgo.” 6 A Aaron na u kɛ tini mna ki nyini lawee nyjɛ nu nyumu nyi Egypt na, a kpanhɔɔnlɔ na pan mu tra kre tɔ poŋgo. 7 La, befɛɛnlɛ pre na pan mna bemu kee pe, a kpanhɔɔnlɔ na pan Egypt tra kre nu na.
8 Bawa Pharaoh, na Moses na Aaron yeeri mna yo pe pan mbo, “Jande e e Tafun Nyiɛkpɔɔ wre tali mbe u ti kpanhɔɔnlɔ pre laa mi na ni leele pre na, fuŋga rɛ, mbe ti mbe e leele pre sɛ sra wɔ mbe e Tafun Nyiɛkpɔɔ wre ŋga.”
9 A Moses na kna mu yo Pharaoh pan mbo, “Tolɛɛ mu saara na, nyjila le, mbe ni paan nyiɛtali mbe ŋu na mu loplombo, na mu leele pre ŋga, mbe ki ti mbe kpanhɔɔnlɔ pre laa e na, mbe yili e kalonyi yire nu, fɔna mblɛ pie kro Nile lɔɔ kre nu pre chiin bɔkɔ.”
10 A Pharaoh na kna mbo, “Nyiɛtali mu ni ŋga baŋga,” A Moses na kna mbo, “Kie pe imi na mu yo ŋga, mbe ki ti mu chin na wa n wa haka mu da na o Tafun Nyiɛkpɔɔ wre ni. 11 Kpanhɔɔnlɔ pre we yili mu pan katoo. Pie laa ŋu na mu loplombo, na mu leele pre kro na, yaa pe nya na. Nile lɔɔ kre chiin nu pie kro.” 12 Ŋga Moses na Aaron na yili Pharaoh lawee kre, Moses na sɛ nyɛni mu o Tafun Nyiɛkpɔɔ wre tali kpanhɔɔnlɔ mblɛ u tia pe pan Pharaoh na pre kee na. 13 O Tafun Nyiɛkpɔɔ na kee ŋga Moses na u wie kre pe, mna tia kpanhɔɔnlɔ pre kro na ku pe kalonyi, na pe mbookrɔɛ, na pe seele nu peii.
14 A Egypt leele pre na pe koli mu ble ble titɛɛ, a pe ndiom na tra kre tɔ poŋgo. 15 La, ŋga Pharaoh na nya na fuflɛ u wa kre, wra ndru mu u loloŋgo sheli, u nsra ndie tɛɛ Moses na Aaron pan. Pan wra ndie kan imi na o Tafun Nyiɛkpɔɔ na ki yo kre.
Napɔɔnlɔ Na Tra Kre Tɔ
16 O Tafun Nyiɛkpɔɔ na yo Moses pan mbo, “Yo Aaron pan mbe u u kanyie kre fɔɔri tra, mbe tablɔ ŋga kii wa tra kre nu kro kaari napɔɔnlɔ, mbe Egypt tra kre tɔ poŋgo.” 17 Aaron na u kanyie kre tɛɛ mna tra kre fɔɔri, a tablɔ ŋga kraa wa tra kre nu kro na kaari napɔɔnlɔ mna pan mu leele, na yurɛ kro tɔ. 18 La, ŋga befɛɛnlɛ pre naa chaa mbe bemu kee pe mbe yurɛ pre plɛ pan kre, pe nsra ki ja. Napɔɔnlɔ pre na leele, na yurɛ tɔ poŋgo. 19 A befɛɛnlɛ pre na yo Pharaoh pan mbo, “Nyiɛkpɔɔ titi u ŋga pe.” La, Pharaoh na je mu u loloŋgo sheli, u nsra ndie tɛɛ, pan wra pe to, imi na o Tafun Nyiɛkpɔɔ yo kre.
Shunshɔɔnlɔ Na Tra Kre Tɔ
20 A o Tafun Nyiɛkpɔɔ na yo Moses pan mbo, “Yiri baŋga bnimi pupu, mu sɛ Pharaoh fni nyjila ŋga ni we na shie lɔɔ kre nu kre, mu yo u pan na, Kee ŋga o Tafun Nyiɛkpɔɔ wre yo yi kre mbo, ‘Ti mbe ni leele pre sɛ mbe sɛ ni sumi. 21 Na mu je na ma ti mbe ni leele pre sɛ kre, mbe ti mbe shunshɔɔnlɔ tataara pan mbe ŋu na mu sumifɛɛnlɛ, na mu leele tɔ e kalonyi nu. Egypt leele kalonyi yire kro we nyi shunshɔɔnlɔ, a pie tra kre tɔ poŋgo. 22 La, ki ble kre, Goshen tra ŋga na ni leele pre nyi mu tni kre, mba ti mbe shunshɔɔnlɔ pre da wa. Kre kie ti e chin na mi, Israel leele Tafun Nyiɛkpɔɔ wre, nii wa tra ŋga nu. 23 Mbe ni leele pre wɔ peyɛ, na mu leele pre ni. A baŋga lam mbe ti mbe kre kawako kee ŋga pe.’” 24 O Tafun Nyiɛkpɔɔ wre na tia kra pe ma. Shunshɔɔnlɔ tataara na pan mna Pharaoh katoo, na u sumifɛɛnlɛ kalonyi, na Egypt tra kre shɔ mu ta poŋgo, mna tra kre kla.
25 Bawa Pharaoh na Moses na Aaron yeeri mna yo pe pan mbo, “E sɛ sra wɔ o tra ŋga nu mna e e Nyiɛkpɔɔ wre ŋga.”
26 La, Moses na kna mbo, “Na o ki pe ma, kia kolo wru. Sra ŋga oo wɔ mbe o Tafun Nyiɛkpɔɔ wre ŋga kre we pe afuŋgo yira Egypt leele pre pan. A na o sra ŋga ki pe afuŋgo yira wɔ pe yiɛ na, pia o waari na dnɛ ni mbe gboo?
27 Ki fna mbe o nyaari ble taarɛ mbe sɛ fimi tra kre nu, mbe sɛ sra wɔ mbe o Tafun Nyiɛkpɔɔ wre ŋga, imi na u ki yuu o pan kre.”
28 A Pharaoh na yo mbo, “Mbe ti mbe e sɛ sra wɔ mbe e Tafun Nyiɛkpɔɔ wre ŋga tablɔ tra kre nu. La, yaashia sɛ haalee ya. Kena e nyiɛtali e ni ŋga.”
29 A Moses na kna mbo, “Na mbaa yili mna to, mbe o Tafun Nyiɛkpɔɔ wre tali, a baŋga shunshɔɔnlɔ pre we sɛ mbe laa ŋu, na mu sumifɛɛnlɛ, na mu leele pre kro na. La, le na ma o fana na, mbe ma ti leele pre sɛ sra wɔ mbe o Tafun Nyiɛkpɔɔ wre ŋga.”
30 A Moses na Pharaoh ti mna sɛ o Tafun Nyiɛkpɔɔ wre tali, 31 A o Tafun Nyiɛkpɔɔ wre na kee ŋga Moses u wie kre pe. A shunshɔɔnlɔ pre na laa Pharaoh, na u sumifɛɛnlɛ, na u leele pre kro na, hali shunshun nunu chom kuraa nsra kro. 32 La, kre nyjila ŋga nu chɔɔ, Pharaoh na ndru mu je mna u loloŋgo sheli. U nsra leele pre ŋga kolo mbe pe sɛ.