7
A o Tafun Nyiɛkpɔɔ wre na yo Moses pan mbo, “Le, ni mu pe na Mi Nyiɛkpɔɔ wi Pharaoh yiɛ, a mu nyjɔ Aaron we pe mu keenyanyofun. 2 Kee nyjɛ ni yo mu pan yire kro yo mu nyjɔ Aaron pan, mbe u yi kro yo Pharaoh pan, mbe u ti mbe Israel leele pre yili u waŋgra kre nu. 3 La, mbe Pharaoh loloŋgo sheli, hali na ni kawako na fiɛrɛ kee tataara pe Egypt tra nu, 4 wa ndie tɛɛ e pan. A mbe Egypt tra kre leele ndie tini kpɔɔ, mbe Israel leele pre wɔ jlom jlom mbe yili tra kre nu. 5 Na mbaa ni jaŋga nyina Egypt leele pre na, maa Israel leele pre wɔ mu yili pe nu, kre Egypt leele pre we chin na ni mɛɛ yi Mi Wi.” 6 Moses, na Aaron na kee ŋga o Tafun Nyiɛkpɔɔ na yo pe pan kre pe. 7 Ŋga Moses na Aaron na sɛ paara Pharaoh pan kre, na Moses li yɛlɛ fuloe jijirɛ, a na Aaron li yɛlɛ fuloe jijirɛ na taarɛ.Aaron Kanyie Kre
8 O Tafun Nyiɛkpɔɔ na yo Moses na Aaron pan mbo, 9 “Na Pharaoh waa yo e pan mbo, ‘E kawako kee ka pe mbe ni le.’ Kena mbe mu yo Aaron pan na, ‘Mu kanyie kre viŋge mu wa tra Pharaoh yiɛ.’ Kie kaari wɔɔ.” 10 A Moses na Aaron na sɛ Pharaoh pan mna sɛ kee ŋga o Tafun Nyiɛkpɔɔ na yo pe pe kre pe. Aaron na u kanyie kre viŋge mu wa tra Pharaoh na u sumifɛɛnlɛ yiɛ, a kra kaari wɔɔ. 11 A Pharaoh na u kachimblɛ, na u befɛɛnlɛ yeeri, a pra pan mu bemu kee pe, mna kee nyjɛ Aaron na pe yire chɔɔ pe na. 12 Pra pan mna pe kanyie viŋge viŋge mu wa tra a yira kaari wɔɔlɔ. La, Aaron kanyie kre na pe kanyie yire jɔli. 13 A na Pharaoh loloŋgoo wa mu sheli tɛ, wra je mu ndie kan, imi na o Tafun Nyiɛkpɔɔ na yo kre.
Nyumu Na Kaari Nyimi
14 A o Tafun Nyiɛkpɔɔ na yo Moses pan mbo, “Pharaoh loloŋgoo wa mu sheli, u je, u n na chaa mbe leele pre sɛ. 15 Baŋga bnimi, sɛ Pharaoh fni nyjila ŋga ni u shie Nile lɔɔ kre nu kre. Sɛ u shie Nile lɔɔ kre nyu na, na mu shie mu kanyie kre kra kaari wɔɔ kre wru mu yii. 16 Na e waa fni, mbe mu yo u pan na O Tafun, Hebrew leele Nyiɛkpɔɔ wre u ni tun na ni paan yo mu pan na. Ti mbe ni leele pre sɛ ni sumi tablɔ tra kre nu. La, mu pan mu su aŋga na, muu wa na ndikana pini tɛ. 17 Kee ŋga o Tafun Nyiɛkpɔɔ wre yo yi kre mbo, ‘Kre kee ŋga mbe pe ŋga we ti mbe mu chin na ni mɛɛ yi Mi Wi.’ Mi Moses we kanyie ŋga ni kɛɛ ŋga tɛɛ mbe Nile lɔɔ kre yiɛ fɔɔri, mbe ki kaari nyimi. 18 A mbroe mblɛ pee wa Nile lɔɔ nu kre we ku, mbe lɔɔ kre na ndio, a Egypt leele pre wa jaa ki nyumu ko mbe gbɔ.”
19 A o Tafun Nyiɛkpɔɔ wre na yo Moses pan mbo, “Yo Aaron pan mbe u kanyie kre nyini Egypt lɔɛ kro na, lafoelee, na lɔɛ nyjɛ pre titi tuulo, na lawee nyjɛ nu nyumu yire kro nu, yi kro we kaari nyimi. Nyimi we pe Egypt tra kre nu kro, hali pe yirɛ nyjɛ pe tɛ tinyi ni na nyumu leni yi nu, na dnɛ yirɛ nyjɛ pe pe na nyumu leni na teeri kro we kaari nyimi.”
20 A Moses na Aaron na kee ŋga o Tafun Nyiɛkpɔɔ yo pe pe kre pe. A Aaron na yire Pharaoh na u loplombo pre yiɛ, mna u kanyie kre yire mu Nile lɔɔ kre yiɛ fɔɔri, a lɔɔ kre nyumu na kaari nyimi kro. 21 A mbroe mblɛ praa wa lɔɔ kre nu na ku, a kra tia nyumu kre naa ndio titi, a Egypt leele pre nsra ja mbe ki gbɔ. Nyimi naa wa lawee kro nu Egypt tra kre nu. 22 La, Egypt befɛɛnlɛ pre na pe bemu kee pe mna pe ma na, Pharaoh loloŋgo naa wa mu sheli ma tɛ, a u nsra ndie tɛɛ Moses na Aaron pan, pan wra ndie kan imi na o Tafun Nyiɛkpɔɔ na yo kre. 23 A Pharaoh na krɔ kna mna sɛ u katoo, u nsra kee yire pe keshian kee. 24 Kra tia Egypt leele pre na sɛ na Nile lɔɔ kre mbɛɛlɛ tuulo imi kie pe mbe pe nyumu gbɔwo ta. Ŋgi na hin? Na pia jaa lɔɔ kre nyumu gbɔ. 25 Ŋga o Tafun Nyiɛkpɔɔ na tia Nile nyumu kre na kaari nyimi kre, wra tia ble kɔɔnashin na tro tun.