Nyiɛkpɔɔ Na Nyu Yo Moses Pan
6
A O Tafun Nyiɛkpɔɔ na yo Moses pan mbo, “Fuŋga mu kee ŋga mbe pe Pharaoh na nya. Ni jaŋga ŋga mbe nyina u na kre we ti mbe u ti ni leele pre sɛ, wre titi we pe ni na pe yili u waŋgra nu mbe sɛ.”2 A Nyiɛkpɔɔ na ndru mu yo Moses pan mbo, “Ni mɛɛ yi Mi Wi. 3 Mi ndaa ni yɛ wɔ mna Abraham, na Isaac, na Jacob nyina na mi wi Jaŋgafun Nyiɛkpɔɔ wre kre. La, ni nsra tia pra chin na ni mɛɛ Mi Wi. 4 La, ndaa nyu nunu pe na pe ni, na mbe pe ŋga Canaan tra ŋga nu pra nyi mu tni na fumblɔ lɛ kre. 5 Fuŋga rɛ, ni Israel leele pre jiɛn loo, na imi Egypt leele pre pe pe tinlɛ mu da. A ki tia ni ni nyu nunu kre sɔɔnri. 6 Kena Moses, yo Israel leele pre pan na, ‘Ni mɛɛ Mi Wi, a mbe e shɔ e kanyana tnimu ŋga nu e nyi Egypt tra nu kre nu. Mbe e shɔ mbe wa, ŋga pe e pe tinlɛ kre ndra na, a mbe ni jaŋga kpɔɔ kre tɛɛ mbe e ndra lɔ, mbe pe ndie tini. 7 Mbe e wru mbe pe mi titi leele, a mbe pe e Nyiɛkpɔɔ. Kre kie ti mbe e chin na Ni mɛɛ Mi Wi, a Mi wi e Nyiɛkpɔɔ. A Mi ni e woni mbe yili e kanyana nu Egypt leele kɛɛ kre. 8 Mbe sɛ na e ni tra ŋga ndaa kɛ yire mna da mu yo na mbe Abraham, na Isaac, na Jacob ŋga kre nu. Mbe e ŋga ki yi mbe e ta. Ni mɛɛ yi Mi Wi.’”
9 Moses na yire kee nyjɛ yo Israel leele pre pan kro, la, pe nsra ndie tɛɛ u pan. Ŋgi na hin? Pe sɔɔnrɔ na ku, ndrashelee fiŋgee ŋga praa pe fiŋge kre ndra na.
10 A o Tafun Nyiɛkpɔɔ na yo Moses pan mbo, 11 “Sɛ yo Egypt ŋunu Pharaoh wre pan na u ti mbe Israel leele pre yili u waŋgra kre nu.”
12 A Moses na kna mu yo o Tafun Nyiɛkpɔɔ pan mbo, “Na Israel leele pre titi kuraa n shiaa ni kee yire loo, kena mni ŋunu Pharaoh we pe mbe li ni kee na hin? A mi wi ŋmba, ndaa ja mu paara chiriri kple.”
13 A o Tafun Nyiɛkpɔɔ wre na yo Moses na Aaron pan mbo, “E sɛ yo Israel leele pre, na Egypt ŋunu Pharaoh pan na ni yo na e Israel leele pre wɔ mbe yili Egypt na.”
Moses Na Aaron Sele Leele
14 Israel leele pre sele yire loplombo mɛɛ yi kre, Jacob bijlo na wi Reuben, a Reuben bibilɛ na lɛ, Hanoch, na Pallu, na Hezron, na Carmi. Pre biile mblɛ na lɛ Reuben jlom leele.
15 Simeon bibilɛ na lɛ Jemuel, na Jamin, na Ohad, na Jakin, na Zohar, na Shaul Canaan chlɔ wre biblɔ wre. Pre biile mblɛ na lɛ Simeon jlom leele. 16 Levi bibilɛ mɛɛ nyjɛ pra nyunɔ mu tɛɛ yire yi kre, Gershon, na Kohath, na Merari. Levi na li yɛlɛ lafaa na fulo na kɛmbɔkɔɔnashin. 17 Gershon bibilɛ na lɛ Libni, na Shimei, a pra tni jlom jlom. 18 A Kohath bibilɛ na lɛ Amram, na Izhar, na Hebron, na Uzziel. Kohath na li yɛlɛ lafaa na fulo na kɛmbɔtaarɛ. 19 Merari bibilɛ na lɛ Mahli, na Mushi. Pre leele mblɛ krɛrɛ Levi jlom leele na lɛ, a pra pe mɛɛ nyunɔ mu tɛɛ.
20 Amram na yiri mna u lɛ jaa leŋge, u mɛɛ na yi Jochebed, a pra Aaron na Moses se. Amram na li yɛlɛ lafaa na fulo na kɛmbɔkɔɔnashin. 21 Izhar bibilɛ na lɛ Korah, na Nepheg, na Zicri. 22 Uzziel bibilɛ na lɛ Mishael, na Elzaphan, na Sithri.
23 Aaron na Elisheba Amminadab pɔ chlɔ ŋmba lɛm na wi Nahshon wre leŋge. A Aaron na Elisheba bibilɛ na lɛ Nadab, na Abihu, na Eleazar, na Ithamar.
24 Korah bibilɛ na lɛ Assir, na Elkanah na Abiasaph, pre biile na lɛ Korah jlom leele. 25 Aaron biblɔ Eleazar wre na Putiel bichiɛlɛ pre wa leŋge, a pra Phinehas se. Pre leele mblɛ kee pe yo mblɛ kro Levi sele yire loplombo na lɛ, a pra tni jlom jlom.
26 Aaron na Moses chɔɔ pan o Tafun Nyiɛkpɔɔ na yo mbo, “E sɛ Israel jlom yire kro leele pre wɔ e yili Egypt tra nu.” 27 A pre chɔɔ pra sɛ paara Egypt ŋunu Pharaoh pan na pie Israel leele pre wɔ mbe yili Egypt tra nu.