2 A Pharaoh na kna mu pe wie mbo, “Ŋmbi wi e Tafun Nyiɛkpɔɔ wre, mbe ni li u nyu kee na, mbe ti Israel leele pre yili ni kɛɛ hin? Ni n e Tafun Nyiɛkpɔɔ wre chin, a mba ti mbe Israel leele pre sɛ.”

3 A Moses, na Aaron na kna mbo, “Hebrew leele ^a Nyiɛkpɔɔ wre u uyɛ wɔ mu o nyina. Kena o ŋga kolo mbe o nyaari ble taarɛ mbe sɛ tablɔ tra kre nu, mbe sɛ sra wɔ mbe o Tafun Nyiɛkpɔɔ wre ŋga. Na kre ma, waa oyɛ ndra ta, we ti mbe yira to o na mbe o gbo, ndee mbe o to ŋunɔ.”

4 La, Egypt ŋunu Pharaoh na kna mbo, “Moses, na Aaron, mni e na leele mblɛ laari pe tnumu na hin? E ti mbe pe sɛ pe tnumu tun.” 5 A Pharaoh na ndru mu kna mbo, “E le imi na e leele pre nɛɛ tra kre nu mu da, a e na chaa mbe paan pe laa tnumu nyjɛ pe tuni na.”

6 Ki ble kre lam Pharaoh na mbra fɔŋgɔ le tinlɛ lefɛɛnlɛ pre, na Israel leele mblɛ praa yiɛ klu na pe wolo pre ni pra tnumu tuni pre pan mbo, 7 “Yaa shia leele pre ŋga yua kpakpɛɛ nyjɛ pe chaai pooro nu na tofa kuun yire yɛ na, imi na e naa pe kɛɛn yi yi fa kre, e ti mbe pre titi sɛ yi cha fuŋga. 8 La, e ti mbe praa tofa nyjɛ nyu o kun mu pe ŋga yire chɔɔ kuun, hali yaashia nunu chom kuraa kun yi na. Gbashiafɛɛnlɛ lɛ, kre ki tia pra nyɛni na yuu na, ‘Ti mbe o sɛ sra wɔ mbe o Nyiɛkpɔɔ ŋga kre.’ 9 Kena e ti mbe tnumu kre sheli mbe ya, mbe pe tnumu tun, mbe kafinɛ kee yire loo ti.”

10 A tinlɛ lefɛɛnlɛ pre, na Israel leele mblɛ praa yiɛklu pe wolo pre pan pra tnumu tuni pre na sɛ yo pe wolo pre pan mbo, “Kee ŋga Pharaoh yo yi kre mbo, ‘Mba e ŋga yua kpakpɛɛ na. 11 Yire titi e sɛ e yua kpakpɛɛ cha mna ee yɛ ta kpan, la, ka wa kun e tofae nyjɛ e kuun yire na fiɛn kuraa.’” 12 Ki tia leele pre na nyina Egypt tra kre nu poŋgo na yua kpakpɛɛ chaa. 13 Ble nyini ŋga pan tinlɛ lefɛɛnlɛ pre we yire pe na mbo, “Ble nyini tnumu ŋga e naa tuni, nyjila ŋga ni praa e kaan yua kpakpɛɛ kre, pan ki fna e tun mbe da.” 14 Tinlɛ lefɛɛnlɛ mblɛ Pharaoh na wɔ pre naa Israel leele mblɛ praa yiɛklu na pe wolo pre ni, a praa tnumu tuni pre gbuun fwɛ ni, na pe wie mbo, “Yira ŋgi ki tia aŋge na aŋga, e n ja mu tofa kun mu da na fa wee yire ni hin?”

15 A Israel leele pre yɛkulo mblɛ pra wɔ a praa pe le pra tnumu tuni pre na sɛ Pharaoh yiɛ mna sɛ u tali mbo, “Tolɛɛ, mni a mna mu sumifɛɛnlɛ fiŋge ma hin? 16 Fuŋga pe n na o kaan yua kpakpɛɛ na, wre titi o shie na yi chaa, a pe je na yuu o pan mbo, ‘E tofa yire kun mbe yi da imi e kuun na dani fa kre.’ Na o n ja mu kun mu da ma, mbe pra o gbuun, la, o kɛɛ kee ma, mu leele pre pan ki yire.”

17 A Pharaoh na kna mbo, “Gbashia kii wa e na, kre ki tia e kro mu na yuu na, ‘Ti mbe o sɛ sra wɔ mbe o Tafun Nyiɛkpɔɔ wre ŋga.’ 18 E ndru e sɛ tnumu tun. Ndro wa yua kpakpɛɛ cha mbe e ŋga na, a ki fna e jaa tofa kun mbe da imi na e kuun na dani fa kre.”

19 Israel leele pre yɛkulo mblɛ praa pe le pre na chin na kalaa wa pe na. Ŋga ŋunu wre na yo na, “Yaashia ka kun pe tofae yire pe kuun ble nunu yire na,” kre ndra na. 20 Ŋga pra yili Pharaoh lawee wa na shie to, mna Moses, na Aaron fni, na pee wa mu yire na pe sri. 21 A Israel leele pre yɛkulo pre na kna mu yo Moses, na Aaron pan mbo, “O Tafun Nyiɛkpɔɔ wre we e gbun na pimi ni. E pan mu tia o kee Pharaoh na u loplombo bin, a e ndra na pe chaa mbe o gbo.”

22 A Moses na ndru mu sɛ yo o Tafun Nyiɛkpɔɔ pan mbo, “Nyiɛkpɔɔ mni a mu tia mu leele mblɛ na kala nyaa imi ma hin? Kena kre na mna yila mu ni tun mna ŋgaa? 23 Mu yire ble ŋga na ndaa sɛ paara Pharaoh pan na mu mɛɛ ni, mu pan mu su aŋga na, pan u kro mu tia pra kala nyaa suwi, a mu pieri mu pe hla, ma pe shɔ.”