2 A O Tafun Nyiɛkpɔɔ na yo u pan mbo, “Yira ŋgi yi mu kɛɛ ŋga hin?” A Moses na kna mbo, “Kanyie yi.”

3 A O Tafun Nyiɛkpɔɔ na yo mbo, “Ki wa tra.” A Moses na ki wa tra, a kra kaari wɔɔ, a wra fɛ mu nyaa ki nu. 4 A O Tafun Nyiɛkpɔɔ na yo Moses pan mbo, “Kɛ tini mu u yii naa na.” A Moses na kɛ tini mu wɔɔ wre yii u naa na, titɛɛ kre nu to, a wɔɔ wre na ndru mu kaari kanyie u kɛɛ. 5 O Tafun Nyiɛkpɔɔ wre na yo Moses pan mbo, “Na mu sɛ, kre kee ŋga ki fna mu pe, mbe ki ti pe shɔ mbe li na pe tolɛɛlɛ Nyiɛkpɔɔ wre, Abraham, na Isaac, na Jacob Nyiɛkpɔɔ wre u uyɛ wɔ mu mu nyina yɛŋgɛ.”

6 A o Tafun Nyiɛkpɔɔ wre na ndru mu yo Moses pan mbo, “Kɛ le mu dodoŋgi kre nu.” A wra kɛ le u dodoŋgi kre nu. Ŋga wra ki wɔ kre, na kokue ki knumu, a ki fniŋge na nyiɛ subie yi. 7 A o Tafun Nyiɛkpɔɔ na ndru mu yo u pan mbo, “Ndru mu mu kɛ kre le mu dodoŋgi kre nu.” A wra ki pe ma. Ŋga wra ki wɔ kre, na kokue yire laa u kɛ kre na, a ki ndru mu pe na u wejiŋge haŋa kre yi. 8 A o Tafun Nyiɛkpɔɔ wre na yo mbo, “Na pe n shiaa mu shɔ mu li, ndee na maa kawako kejle wo kre pe, a pe n shiaa ndie tɛɛ mu pan kre, na maa shiinwo ŋga pe kie ti pe mu shɔ mbe li. 9 La, na pe n shiaa yire kawako kee shiin nyjɛ shɔnli, ndee mu ndie tɛɛ mu pan kre, mu sɛ Nile lɔɔ kre nyumu ka ko, mu pan mu ki wo tra waa na. Nyumu ŋga mu ko lɔɔ mbe ki kna mbe wo tra kre we kaari nyimi.”

10 A Moses na kna mbo, “Ɔɔhɔn ni Tafun Nyiɛkpɔɔ, ni n paara mu chin. Mu yire nyjila ŋga ni mu paara na ni ni mu pan mu su fuŋgaami, ŋu titi nya na ni nyu n saan paaraa na, a ni ndile sna ni nyuu.”

11 A o Tafun Nyiɛkpɔɔ na yo u pan mbo, “Ndro ŋmbi u lewo kaan nyu hin? A ŋmbi u lewo pini ndikaŋu, ndee kpo hin? Ndee ŋmbi u tii mbe lewo na nyaa, ndee na tii mbe u fun nyiɛlɛ na hin? Mi e Tafun Nyiɛkpɔɔ wre ma ni yi kee nyjɛ pini kree? 12 Kena sɛ, mbe ya mu na mbe mu jaa paara, a mbe mu nyina ŋga mu yo.”

13 A Moses na kna mbo, “Ɔɔhɔn ni Tafun Nyiɛkpɔɔ, jande lefuŋu tun mbe u sɛ kre kee ŋga pe.” 14 Bawa Nyiɛkpɔɔ krɔ na kun na Moses ni, a wra kna mbo, “A mu nyjɔ Aaron Levi ndro wre hin? Ni chin na wre paara mu chin. Hali ŋga ni paara ŋga, u paan mbe mu fni, a na u mu nya u yiɛ we shɔ. 15 Kena Moses, paara u pan, mu u nyina kee nyjɛ we yo, mbe ya e kro shiin na mbe e jaa paara, a mbe e nyina ŋga ee pe. 16 Wre we mu nyu kee shɔ mbe yo leele pre pan, wre wi mu nyu, a mu pe u pan na ŋu wi Nyiɛkpɔɔ. 17 La, kanyie ŋga wru mu sɛ, kre ni mu sɛ tɛɛ mbe kawako kee yire pe.”

18 A Moses na ndru mu sɛ yo u nafun blɔ Jethro pan mbo, “Jande ti mbe ni ndru mbe sɛ ni leele pan Egypt tra nu, mbe sɛ le, na pe plɛɛ wa ŋmaa ni tɛ.” A Jethro na yo mbo, “Sɛ na wejinyiŋge ni.”

19 Na o Tafun Nyiɛkpɔɔ klu mu yo Moses pan Midian tra nu mbo, “Ndru mu sɛ Egypt tra nu. Ŋgi na hin? Leele mblɛ pe mu chaa mbe gbo pre kro ku.”

20 A Moses na u chɔ, na u bibilɛ pre wru, mna tia pra tni bubnɔ na, a pra ndru na shie Egypt tra nu. A wra kanyie ŋga Nyiɛkpɔɔ na yo u wru mbe yii kre wru mu yii kɛɛ.

21 A o Tafun Nyiɛkpɔɔ wre na yo Moses pan mbo, “Na maa le Egypt tra nu, le na mu kawako kee nyjɛ jaŋga ni mu ŋga, na mu yi pe Pharaoh yiɛ na. La, mbe ti mbe u ndie kan, mbe u je na wa ti mbe leele pre sɛ. 22 Kena na maa yire kee nyjɛ krɛrɛ pe a waa je kre, mu yo Pharaoh pan na, ‘Kee ŋga O Tafun Nyiɛkpɔɔ yo ni yo mu pan yi kre. Ni biblɔ jlo wi Israel. 23 Kre ndra na ndaa yo mu pan na, Ti mbe ni biblɔ wre sɛ, mbe sɛ ni sumi. La, mu je na ma ti mbe u sɛ, kena mbe mu biblɔ jlo gbo.’”

24 Ŋga Moses na u leele pre naa shie Egypt tra nu kre, pra ŋunu kolo. Bawa o Tafun Nyiɛkpɔɔ na yili Moses yiɛ na, mna chaa mbe u gbo. 25 La, u chɔ Zipporah na dnɛ ŋga nyu ki tna wru, mna u pɔ blɔ fɛŋgɛ nyu dɔlidɔli kre kun, mna ki taa Moses jewrɛ na, mu kna mbo, “Ni nyimi bijɔplɔ wi ŋu.” 26 Ŋga kra pan ma kre, a o Tafun Nyiɛkpɔɔ na laa Moses na mna sɛ. Nyjila ŋga nu Zipporah na yo mbo, “Ni nyimi bijɔplɔ kre, fɛkɔɔnrɔ kee wraa yuu.”

27 A o Tafun Nyiɛkpɔɔ na yo Aaron pan mbo, “Sɛ Moses pan tablɔ tra kre nu.” A wra yili mna sɛ Moses fni Nyiɛkpɔɔ nyua kre na, mna u gbeŋge shiun.^a 28 Bawa Moses na kee nyjɛ o Tafun Nyiɛkpɔɔ na tɛɛ mu u tun na u sɛ yo yire, na kawako kee nyjɛ wra yo u paan pe yire kro kee yo Aaron pan.

29 A Moses na Aaron na chaa mu sɛ Egypt tra nu, mna sɛ Israel loplombo pre yeeri mu ble, 30 a Aaron na kee nyjɛ o Tafun Nyiɛkpɔɔ wre yo Moses pan yire kro bɔ pe pan, a Moses na kawako kee yire kro pe leele pre yiɛ na. 31 Ŋga kra pan ma kre, pra shɔnli, a ŋga pra loo na pe kee o Tafun Nyiɛkpɔɔ wre shian, a u pe fooro kee nyjɛ nu pe nyi yire nya kre, pra kosie kan mna u sumi.