Nyiɛkpɔɔ Na Moses Yeeri
3
Ki ble ka Moses na sɛ na u nafun Jethro Midian srawɔfun wre mbaala, na sikaala ni nyaa. Wra sɛ na yurɛ pre ni haalee tablɔ tra kre nu, mna sɛ da Nyiɛkpɔɔ nyua Horeb kre na. 2 Bawa o Tafun Nyiɛkpɔɔ nyjeeri bituŋu wa na uyɛ wɔ mu u nyina, na kanhun nyini tiŋge jɛkrɛɛ ka lawee. Moses na nya na kanhun kre nyini, la, tiŋge kre nsraa shio. 3 Ki tia Moses na paara u jawala nu mbo, “Mbe sɛ kawako kee ŋga nyini le, ŋga ki tia kanhun kre na nyini, a tiŋge kre n na shio.” 4 Ŋga o Tafun Nyiɛkpɔɔ na nya na Moses flo mu da wa kre, a Nyiɛkpɔɔ na yire kra yire nu mu u yeeri mbo, “Moses, Moses,” a wra kna mbo, “Mi wi kre.”
5 A Nyiɛkpɔɔ na kna mbo, “Yire wa, maa shia flo mbe da mna, la, mu kpawrɛ yire wɔ. Ŋgi na hin? Tra ŋga na mu yire kre pe cheche.” 6 A wra yo mbo, “Mi wi mu tolɛɛlɛ Nyiɛkpɔɔ wre, Abraham, na Isaac, na Jacob Nyiɛkpɔɔ wre.” Titɛɛ kre nu, a Moses na yiɛ tɔ. Ŋgi na hin? Wraa fiɛ na we Nyiɛkpɔɔ nya.
7 Bawa o Tafun Nyiɛkpɔɔ na yo u pan mbo, “Ni ni leele pre fooro ŋga pe lii Egypt tra nu kre nya, a ni loo na pe nyɛni tinlɛ lefɛɛnlɛ pre kɛɛ, a pe kanyana kre ni shian. 8 A ki tia ni tii mbe pan mbe pe shɔ Egypt leele pre kɛɛ, mbe pe wɔ mbe yili Egypt tra kre nu, mbe sɛ na pe ni lawee ŋga nu tra nyi, mu nyu, mu vala nu. Kre tra kre nyu mu tna. Canaan leele, na Hittite leele, na Amora leele, na Perizzite leele, na Hivite leele, na Jebusite leele tra yi. 9 Kpra na, ni leele pre nyɛnɛɛ le ni ndie, a ni nya imi na Egypt leele pre pe fiŋge mu da. 10 Kena sɛ, ni mu tuni Egypt ŋunu Pharaoh pan, mbe mu sɛ ni leele Israel leele pre wɔ Egypt tra nu.”
11 La, Moses na kna mu yo Nyiɛkpɔɔ pan mbo, “Ndro ŋmbi wi mi, mbe ni sɛ Pharaoh pan, mbe sɛ Israel leele wɔ mbe yili Egypt tra nu hin?”
12 A Nyiɛkpɔɔ na yo u pan mbo, “Nii wa mu kro. Sɛmbɛɛrɛ kee ŋga kie nyina na mi ni mu tun yi kre, na maa leele pre wɔ Egypt tra nu, ee pan mbe ni sumi kre nyua ŋga na.”
13 A Moses na kna mu yo Nyiɛkpɔɔ pan mbo, “Na ni waa sɛ Israel leele pre pan mu sɛ yo na, ‘E lɛɛlɛ Nyiɛkpɔɔ wre u ni tun e pan.’ A pe waa ni wie na, ‘U mɛɛ ŋgi hin?’ Kena kee ŋgi mbe yo pe pan hin?”
14 A Nyiɛkpɔɔ na yo Moses pan mbo, “Ni mɛɛ Mi Ŋmba Wi Mi. Kre kee ŋga ki fna mu yo Israel leele pre pan yi na, ŋmba pe yeeri Mi Wi wre u ni tun e pan.” 15 Nyiɛkpɔɔ na ndru mu yo Moses pan mbo, “Na mu sɛ, yo Israel leele pre pan na, ‘Mi e Tafun Nyiɛkpɔɔ wre, e tolɛɛlɛ Abraham, na Isaac, na Jacob Nyiɛkpɔɔ wre u ni tun e pan. A kre mɛɛ ŋga yi ni mɛɛ nyjila kro nu, a kre mɛɛ ŋga ni mbakɔ leele mblɛ pie yiri chɔɔ we na ni yeeri.’ 16 Sɛ Israel leele pre loplombo ble mu yo pe pan na, ‘O Tafun Nyiɛkpɔɔ wre, e tolɛɛlɛ Abraham, na Isaac, na Jacob Nyiɛkpɔɔ wre u uyɛ wɔ mu ni nyina, mu yo ni pan na, u nya kee ŋga Egypt leele pre e pini.’ 17 A u u nyu yo na, ‘Mbe e wɔ mbe yili fooro ŋga e lii Egypt tra nu kre nu, mbe sɛ na e ni Canaan leele, na Hittite, na Amora, na Perizzite, na Hivite, na Jebusite tra nu. Kre tra kre nyu mu tna.’
18 Israel leele pre loplombo pre we ndie tɛɛ mu pan. Kena mbe ŋu na pe loplombo pre sɛ Egypt ŋunu wre pan, mbe sɛ yo u pan na, ‘O Tafun Nyiɛkpɔɔ wre, Hebrew leele Nyiɛkpɔɔ wre uyɛ wɔ mu o nyina. Kena o ŋga kolo mbe o nyaari ble taarɛ mbe sɛ tablɔ tra kre nu mbe sɛ sra wɔ mbe o Tafun, na o Nyiɛkpɔɔ wre ŋga.’ 19 La, ni chin na Egypt ŋunu wre wa ti mbe e sɛ, fɔna ni ki wru jaŋga na. 20 Kena mbe ni jaŋga nyina, mbe Egypt leele ndie tini kawako kee nyjɛ mbe pe wa yire ni. Yire kee yire kɔkro we ti mbe e sɛ.
21 Mbe ti mbe e kee Egypt leele pre yiɛ nyi, kena na e waa yilii wa na shie kre, yaa sɛ kɛ waara. 22 Israel chiɛlɛ pre we sɛ Egypt chiɛlɛ mblɛ pre na pree wa katoo, na pe chaminae pan mbe sɛ yonyi, na swanyiɛ, na swafiŋge yirɛ tali, mbe e bibilɛ, na e bichiɛlɛ le le yi yi. Kre kolo ŋga na ee yire mbe Egypt leele pre yirɛ ta mbe sɛ na yi ni.”