Moses Semu
2
Kre nyjila kre nu blɔ wa na yiri Levi sele nu, mna chlɔ wa leŋge Levi sele kre nu chɔɔ, 2 chlɔ wre na siire ta, mna pɔ blɔ se. Ŋga chlɔ wre na nya na pɔ wre nyu titi kre, a wra u ndra nyiɛpɔ taarɛ. 3 La, ŋga kra pan na wa jaa u ndra na kre, wra yurɔwɛ kakɛɛ wlɔ na kotari ni mbe nyumu wa jaa le ki lam, mna pɔ wre le ki lam, mna sɛ u le nyaa gedenyi yɛ ndoolo Nile lɔɔ kre nu, mbɛɛ ka na. 4 Bifiun wre jaa na sɛ yire haalee ka nu na dɔɔ taa, na le kee ŋga kie u ta. 5 A ŋunu Pharaoh pɔ bichable na sɛ weli haa Nile lɔɔ kre nu, a u sumifɛɛnlɛ chiɛlɛ na sɛ na kila lɔɔ kre mbɛɛ na. Ŋga ŋunu bichlɔ wre na yo we le to, na kakɛɛ yi ŋga nyaa nu, a wra u sumifɛɛnlɛ chiɛlɛ pre wa tun na u sɛ ki wru mbe pan. 6 Ŋunu bichlɔ wre na kakɛɛ kre nyaa mna biblɔ nya ki nu, na u nyɛni, a fooro na chlɔ wre yii. A wra yo mbo, “Hebrew leele pre wa pɔ wi kre o.”7 A bifiun wre jaa wre na flo mu da pe jaara mna kna mbo, “Ni sɛ Hebrew chiɛlɛ pre wa yeeri mbe u paan u shɔ mbe sɛ u pɔɔri mu pan ra?”
8 A ŋunu pɔ chlɔ wre na kna mbo, “Jande sɛ wa cha mu pan mu ni ŋga.” A bichable wre na sɛ pɔ wre lo titi wre yeeri mu pan. 9 A ŋunu Pharaoh pɔ chlɔ wre na yo pɔ wre lo wre pan mbo, “Pɔ ŋmba shɔ mu sɛ u pɔɔri ni pan, mbe mu fɔlɔ tɔ.” A chlɔ wre na pɔ wre shɔ mna sɛ u pɔɔri. 10 Ŋga pɔ wre na lɛ chiɛri kre, a wra u wru mna sɛ Pharaoh bichlɔ wre ŋga, a wra u wru mu pe u biblɔ. Mna u mɛɛ tɛɛ Moses.a
Moses Na Fɛ Mu Sɛ Midian Na
11 Ŋga Moses na lɛ mu da lopom kre, ki ble ka wra sɛ u leele Hebrew pre nu, mna sɛ nya imi na praa pe fiŋge, mna tia praa tnumu tuni jaŋga na. Bawa wra nya na Egypt leele pre wa u wolo Hebrew leele pre wa gbuun. 12 Ŋga wra kna mu le, a u nsra ndro nya kre, a wra Egypt ndro wre gbun mu gbo, mna tablɔ waari mna u ndra mu le. 13 Ŋga ki nyiŋge na se, wra yili mna Hebrew leele shiin nya na pe tuni. A wra ŋmba u u ŋmbrɔ pe sisaa wre wie mbo, “Mni a mna mu ŋmbrɔ gbuun imi hin?”
14 A blɔ wre na kna mbo, “Ŋmbi u mu tɛɛ o lefun, na o kprakunfun hin? Mu chaa mbe ni gbo imi na mna Egypt ndro wre gbo kre ra?” Ŋga Moses na kee kre loo kre, fiɛrɛ na u yii, a wraa yuu u jawala nu mbo, “Ni shɔnli na leele kee ŋga ndaa pe kre chin.”
15 Ŋga ŋunu Pharaoh na kee kre loo kre, wraa Moses chaa mbe gbo, la, Moses na fɛ Pharaoh katoo wa, mna sɛ Midian tra nu. Ŋga wra da wa kre, wra sɛ tni kɔlɔ ka mbɛɛ na. 16 Bawa wra Midian srawɔfun ŋmba praa yeeri Jethro wre bichiɛlɛ kɔɔnashin plɛ nya, na pe sɛ nyumu ko haa mbe le yirɛ nu mbe pe lɛ yurɛ gbɔ. 17 A mbaala lefɛɛnlɛ plɛ na pan mna pe ni. La, Moses na yiri mna ya bichabɛɛlɛ pre na, mna nyumu kre ka ko mna pe yurɛ pre ŋga a pra gbɔ. 18 Ŋga bichabɛɛlɛ pre na ndru mu sɛ katoo kre, a pe lɛ Reuel (ŋmba praa yeeri Jethro) wre na pe wie mbo, “Mni a e ndru mu pan yaari aŋga ma hin?”
19 A pra kna mbo, “Egypt blɔ wa u o shɔ mbaala lefɛɛnlɛ pre kɛɛ. Wre titi kuraa u nyumu ko mu o yurɛ pre ŋga a pe gbɔ.”
20 A pe lɛ wre na kna mu bichiɛlɛ pre wie mbo, “A sena blɔ wre nyi hin? A mni a e u ti wa hin? E sɛ u yeeri mbe u paan li.”
21 A pra sɛ Moses yeeri. Ŋga wra da wa kre, wra u jawala pe na we tni Jethro pan. Wra tni wa, mbakɔ a Jethro na u pɔ bichable Zipporah yii mu u ŋga a wra leŋge. 22 A Zipporah na biblɔ se, a Moses na u mɛɛ tɛɛ Gershom.
23 Yɛlɛ yɛ kɔkro kre, Egypt ŋunu wre na ku. A na Israel leele pree wa na taanri na nyɛni, ŋga pra pe pe tinlɛ kre ndra na. Ŋga praa nyɛni na ndro chaa mbe u ya pe na kre, kra le Nyiɛkpɔɔ ndie. 24 Nyiɛkpɔɔ na pe taanraa kre loo, mna u nyu nunu ŋga wre na Abraham, na Isaac, na Jacob na pe kre sɔɔnri. 25 Nyiɛkpɔɔ na Israel leele pre le, a pe kee na u shian.