Israel Leele Pre Na Da Sinai Nyua Na
19
Ŋga Israel leele pre na yili Egypt na kre, ki nyiɛpɔ taarɛ wo kre kumu nu pra da Sinai fimi tra kre lawee. 2 Ŋga pra yili Rephidim lawee kre nu kre, a pra sɛ le Sinai fimi tra kre nu, a Israel leele pre na tni wa, Sinai nyua kre jaara.3 A Moses na sɛ nduu nyua kre na mbe wre na Nyiɛkpɔɔ sɛ paara. A o Tafun Nyiɛkpɔɔ na u yeeri nyua kre na mna yo u pan mbo, “Sɛ kre kee ŋga yo Israel leele, Jacob nanae pre pan na, 4 ‘Yire titi na nya kee ŋga ndaa pe Egypt leele na. Imi na nyuu u biile tru kuɛn na kre, pan ndaa e tio mna pan ni jaara. 5 Fuŋgaami ŋga, na ee ndie tɛɛ ni pan, mbe li ni nyu nunu kee kre na, waŋgrɛ leele kro nu, ee pe ni krɔ leele mblɛ ni wɔ waŋgrɛ leele kro nu. Ni wo yi waŋgra ŋga kro, 6 a yire rɛ, ee pe leele cheche mbe ni ŋga, mbe pe srawɔfɛɛnlɛ mbra ni sumi.’”
7 A Moses na ndru mna tii mna pan mu Israel leele pre loplombo pre yeeri mu ble, mna kee nyjɛ o Tafun Nyiɛkpɔɔ na yo u pan yire kro bɔ pe pan. 8 A leele pre kro na kna mbo, “Oo kee nyjɛ o Tafun Nyiɛkpɔɔ wre yo yire kro pe.” A Moses na ndru mu sɛ pe nyu kee kre bɔ o Tafun Nyiɛkpɔɔ wre pan.
9 A o Tafun Nyiɛkpɔɔ wre na yo Moses pan mbo, “Mbe pan mu pan tlo ŋga ki wɔ kprikpri nu, mbe ki ti na ni paara na mu ni, mbe leele pre ni mana loo, mbe ki ti praa kaan mu na nyjila kro nu.”
A Moses na leele pre kee nyjɛ pra yo yire kro bɔ o Tafun Nyiɛkpɔɔ pan. 10 A o Tafun Nyiɛkpɔɔ na yo Moses pan mbo, “Sɛ yo leele pre pan na pe peyɛ pe cheche aŋga na baŋga, mbe pe yonyi je, 11 mbe pe peyɛ kna mbra ni sri ble taarɛ ble kre na. Ŋgi na hin? Mbe tii nyua Sinai na mbe pan, mbe leele pre ni nya. 12 Lawee kaanri mu tro nyua kre jaara, mbe mu yo leele pre na, ‘E dɔɔta mbe wa waashia da nyua kre na, ndee mbe nduu ki na. Ŋmba we da nyua kre na kpan, ki fna mbe pe u gbo. 13 Ki fna e ufun waari dnɛ ni, ndee mbe u waari snimi ni mbe gbo, ndro waa shia kɛ taa u na. Na lewo ndee yurɔ waa da nyua kre na, yaashia ti mbe u ŋmaa li.’ La, na e waa loo na mbaplɔ nyambɛ bnɔ tini kre, kena ee jaa nduu nyua kre na.”
14 A Moses na tii mna pan leele pre pan, mna yo pe pan na pe peyɛ kna mbe Nyiɛkpɔɔ sumi. A pra pe yonyi je. 15 A wra yo leele pre pan mbo, “E eyɛ kna ble taarɛ yire nu, wa waa shia sni chlɔ ni.”
16 Ble taarɛ wo kre bnimi nyu na nyiɛ naa tuanri, na nyini, a tlo wɔɔ kprikpri ka na yili nyua kre na, a bnɔ kpɔɔ ka na tin. Ndro ŋmba wraa wa leele pre tni haa wa kro na fiɛ. 17 A Moses na yiɛklu na leele pre ni mna yili pe tni haa wa, mbe sɛ Nyiɛkpɔɔ fni, a pra sɛ yire nyua kre tapan. 18 Wree na Sinai nyua kre tɔ. Ŋgi na hin? Nyiɛkpɔɔ na yire kanhun nu mna tii ki na. Wree kre naa shie nyjeeri na wree ki yilii fnunu nu, a nyua kre naa seeri poŋgo, 19 a bnɔ kre mana naa kpɔɔri na yaa. Na Moses paara mbe Nyiɛkpɔɔ u nyu wɔ nyiɛtwanraa kre nu. 20 Nyiɛkpɔɔ na yiri nyjeeri mna tii Sinai nyua kre ndra na, mna Moses yeeri na u pan nyua kre ndra na, a Moses na nduu mu sɛ wa, 21 a o Tafun Nyiɛkpɔɔ wre na yo u pan mbo, “Tii mu sɛ leele pre jaari na pia shia lawee ŋga mu kaanri mu tro kre tro mbe pan ni lehaa, na pe waa je, pe nɛɛrɛ we ku. 22 Hali srawɔfɛɛnlɛ mblɛ pie da ni na pre fna mbe peyɛ pe cheche, na kre ma pie ni nyibinyiɛ nya.”
23 A Moses na yo o Tafun Nyiɛkpɔɔ wre pan mbo, “Leele pre wa nduu mbe pan nyua kre na. Ŋgi na hin? Mu o jaari na nyua kre pe cheche, a mu tia o lawee kaanri mbe ndro wa ki tro.”