22
Israel leele pre na yili wa mna sɛ Moab tra mbrɛrɛ ŋga kraa wa Jordan lɔɔ kre yila finhaa, mu yiɛ kan Jericho na kre nu. 2-3 Ŋga Zippor biblɔ Balak na Israel leele pre kee nyjɛ pe pe Amora leele na yire loo, mna loo imi na pe nɛɛ mu da kre, fiɛrɛ na wre na u leele pre kro yii, a praa jijawi. 4 A Moab leele pre na sɛ yo Midian loplombo pre pan mbo, “Leŋunɔ mblɛ we pan mbe o lala mbe tro, imi na nui nyaa lala na kaa kre.” Bawa Moab ŋunu Balak, 5 na leele tun a pra sɛ Beor biblɔ ŋmba pe yeeri Balaam wre yeeri na u pan, uu wa tni chia ŋga pe yeeri Pethor, a kii wa Euphrates lɔɔ mbɛɛ na kre na, u wolo tra nu. Ŋunu Balak mandiɛ ŋga ni wra pe tun na yi mbo, “Ni chaa mbe e loo na, leŋunɔ plɛ yiri Egypt tra nu na paan, pe tra kre yiɛ tɔ poŋgo, na wii na trɛ shio. 6 Kena pan mu pe sun ni pan, ŋgi na hin? Pe faŋga wɛ ni na. Aada kre kolo ŋga na mbe yire mbe pe ja, mbe pe ni mbe laa niyɛ na. Ni chin na mblɛ mu dwan pre dwamu taa, a mblɛ mu suni kre ki pe nyaa.”7 Bawa Moab na Midian loplombo na swa wru ŋga ni pie sɛ chlɛ, mna to kolo mna sɛ chlɛfun ŋmba praa yeeri Balaam wre pan, mna sɛ ŋunu Balak mandiɛ bɔ u pan. 8 A Balaam na yo pe pan mbo, “E sni mna aŋga, baŋga mbe kee ŋga mbe ta o Tafun Nyiɛkpɔɔ pan kro yo e pan.” A Moab loplombo pre na sni. 9 Nyiɛkpɔɔ na pan mu Balaam wie mbo, “Leele mblɛ lɛ mu katoo ŋga hin?” 10 A Balaam na kna mbo, “Zippor biblɔ ŋmba pe yeeri Balak, a u pe Moab ŋunu wre u u loplombo tun ni pan mbo, 11 Leŋunɔ plɛ yiri Egypt tra nu, mu tra kre shɔ mu ta poŋgo na paan, kena pan mu pe sun ni pan, aada mbe jaa wi na pe ni, mbe pe ni mbe yili tra kre nu.” 12 Bawa Nyiɛkpɔɔ na yo Balaam pan mbo, “Maashia sɛ, a maa shia pre leele mblɛ sun, ŋgi na hin? Ni pe dwan.” 13 Ŋga nyiŋge na se bnimi, a Balaam na yiri mna yo ŋunu Balak loplombo pre pan mbo, “E ndru e sɛ e waŋgra nu, o Tafun Nyiɛkpɔɔ je na mi na yire waa sɛ.” 14 A ŋunu Balak loplombo pre na ndru mna sɛ yo ŋunu Balak pan mbo, “Balaam je na wa pan.”
15 Ŋunu Balak na ndru mu u loplombo titie plɛ wɔ mu tun. Pra nɛɛ mu yiɛnyi mu wɛ jlewolo pre na. 16 A pra wru mna sɛ Balaam pan mbo, “Zippor biblɔ Balak yo na o paan yo mu pan na maa ti mbe yaka mu tɔ kolo, 17 ŋgi na hin? Yira ŋga mu chaa kro we mu ŋga ki yi, we mu fɔlɔ tɔ mbe ki mu yiɛ nyi. Kena jande pan mu leele pre sun u pan.” 18 A Balaam na kna mbo, “Hali na Balak ni ŋga u ŋunu katoo kre, mu swafiŋge, na swanyiɛ le ki nu a ki nyi, mba jaa kee fiɛn, ndee kekpɔɔ ka pe mbe ŋga o Tafun Nyiɛkpɔɔ yo kre tro. 19 E sni mna imi na e wolo pre na pe kre, mbe ni o Tafun Nyiɛkpɔɔ wre wie, na we kefɔŋgɔ ka yo rɛ.” 20 Blee kre, Nyiɛkpɔɔ na pan mu yo Balaam pan mbo, “Na pe ndru mu pan mu pan waa, ŋu na pre e sɛ, la, kee ŋga mbe yo mu pan chiin ki fna mu pe.”
21 A Balaam na yiri bnimi kre mna tni u bubnɔ na, a wre na Moab ŋunu loplombo pre na sɛ. 22 La, Nyiɛkpɔɔ krɔ na kun titi na Balaam shie, a wra tia u nyjeeri bituŋu na sɛ yire kolo lalaa, mu u tɔ kolo. Na Balaam wa u bubnɔ na, wre na u sumifɛɛnlɛ shiin ni. 23 Ŋga bubnɔ wre na o Tafun Nyiɛkpɔɔ nyjeeri bituŋu wre nya na uu wa mu yire kondala, mu brɔfiɛn yiɛshiin yii kre, a bubnɔ wre na kna mna yiɛ le nyaa. A Balaam na u frɔ mbe u knaa to kolo na. 24 Na o Tafun wre bituŋu wree wa mu yire kolo foo ka na tre seele shiin yɛ lalaa, a pe dnɛ tɛɛ mu mboe sin mu seele yire fɛ mu kun, a bawa kolo kre sɛ pe foo. 25 Ŋga bubnɔ wre na o Tafun Nyiɛkpɔɔ nyjeeri bituŋu wre nya kre, wra sɛ mbra mboe yire ka na, mna Balaam jewrɛ kunɔ mboo kre na. A wra fwa le u nu. 26 A o Tafun Nyiɛkpɔɔ bituŋu wre na flo mna sɛ yire lawee foo titi kre nu, lawee nsraa wa mbe yurɔ wre jaa kna sɛ kalie, ndee kamɛŋɛ. 27 Ŋga bubnɔ wre na o Tafun Nyiɛkpɔɔ nyjeeri bituŋu wre nya ma kre, a wra lɛɛlɛ mu sni tra, a Balaam krɔ na kun, a wra u kanyie tɛɛ mna u fɔɔri. 28 Bawa o Tafun Nyiɛkpɔɔ na tia bubnɔ wre na nyu nyaa mna paara Balaam ni mbo, “Ŋgi ni pe mu na, a mu kro na ni gbuun ma hin? Hali gbee taarɛwo yi ŋga?” 29 A Balaam na kna mna yo bubnɔ wre pan mbo, “Ŋga mu kro na jijiere prɛ na ni ni kre, na brɔfiɛn ŋunu naa wa ni kɛɛ, kaa ni mu gbo fuŋga ma.” 30 A bubnɔ wre na kna mu yo Balaam pan mbo, “Mu bubnɔ wi mi, a mna ni ndru nyjila kro nu, ni da mu mu pe imi tuu?” A Balaam na yo mbo, “Ɔɔhɔn.”
31 Bawa o Tafun Nyiɛkpɔɔ na Balaam nyiɛlɛ nyaa, a wra nyjeeri bituŋu wre nya, na uu wa mu yire kondala wa, mu u brɔfiɛn ŋunu yii kɛɛ, a wra to mu yiɛ juule tra. 32 A o Tafun Nyiɛkpɔɔ nyjeeri bituŋu wre na u wie mbo, “Mni a mu mu bubnɔ wre gbun gbee nununu taarɛ ma ŋga hin? Ni pan mbe mu tɔ kolo, ŋgi na hin? Mu n fna mbe kre kolo kre sɛ. 33 Mi bubnɔ wre nya mu vile na kuun kre. Na u n na pe ma, mbe na mu gbo, mbra u ti.” 34 A Balaam na yo o Tafun Nyiɛkpɔɔ nyjeeri bituŋu wre pan mbo, “Ni sisaa pe, na mu yiɛ n shɔ kolo ŋga ni kuun kre na naa, kena mbe ndru.” 35 Bawa nyjeeri bituŋu wre na yo Balaam pan mbo, “Ŋu na pre e sɛ, la, kee ŋga mbe yo mu pan yo.” A Balaam na taa ŋunu Balak loplombo pre kro, a pra sɛ ŋunu Balak pan.
36 Ŋga ŋunu Balak na loo na Balaam paan kre, a wra sɛ u fni chia ŋga kraa wa Arnon lɔɔ kre mbɛɛ na Moab sam na. 37 A Balak na yo Balaam pan mbo, “Mni a ni mu yeeri a mna jee hin? Mu jawa na mba mu fɔlɔ tɔ chiriri ree?” 38 A Balaam na kna mbo, “Fuŋga rɛ ni pan. A la mba jaa kee ŋga ka chiin yo, fɔna ŋga Nyiɛkpɔɔ we le ni nyu na.”
39 A pe kro na yiri wa mna sɛ chia ŋga pe yeeri Kiriath-Huzoth kre na. 40 Bawa ŋunu Balak na nui, na mbaala tɛɛ mna sra wɔ, mna Balaam ŋga kaara yire yɛ, na ŋunu loplombo mblɛ praa wa wa pre kro ni.
41 Ŋga nyiŋge na se kre, a ŋunu Balak na Balaam wru a pra sɛ chia ŋga pe yeeri Bamoth Baal kre na, mna Balaam we jaa yire mbra Israel leele pre plɛ nyaa.