Balaam Paaraa Jle
23
A Balaam na yo ŋunu Balak pan mbo, “Ti mbe pe sragbuɛnlɛɛ kɔɔnashin sin ni pan, mbe mu nablɛm kɔɔnashin, na mbapilɛ kɔɔnashin cha mbe ni ŋga.” 2 A ŋunu Balak na nyjɛ Balaam na yo u pe yire kro pe, a pe kro shiin pre na yurɛ pre tɛɛ mna sra wɔ sragbuɛnlɛɛ yire kro na nununu. 3 A Balaam na yo ŋunu Balak pan mbo, “Tni mu sra yirɛ yire jaara mu shie, mbe ni yili mbɛɛ na chiɛri, aada o Tafun Nyiɛkpɔɔ we pan mbe mi na wre fni. Kee ŋga we wɔ mbe ni nyina kpan, mbe pan mbe ki yo mu pan.” A wra yili wa mna nyambie gbeŋglen ka nduu mna sɛ ki ndra na.4 Bawa Nyiɛkpɔɔ na pan mu u fni. A Balaam na yo Nyiɛkpɔɔ pan mbo, “Ni Tafun Nyiɛkpɔɔ, ni sragbuɛnlɛɛ kɔɔnashin sin, mu nablɛm na mbaplɔ mbra shiin shiin, mu pe tɛɛ mu sra wɔ sragbuɛnlɛɛ yire na kro.” 5 A o Tafun Nyiɛkpɔɔ na paara Balaam pan mbo, “Ndru mu sɛ kre kee ŋga yo ŋunu Balak pan.”
6 A wra ndru u kro, ŋga wra sɛ kre, na uu wa mu yire u srayirɛ yire jaara, wre na u loplombo pre kro ni. 7 A Balaam na nɔɔhle na paara mbo,
“Ŋunu Balak u sɛ ni wru
Syria nyambie,
nyjɛ yii wa yila finhaa lawee
yire nu mu pan,
na ni paan Jacob nanae
mblɛ lɛ Israel leele pre
sun u pan.
8 Kena mni mbe pe,
mbe leele mblɛ
Nyiɛkpɔɔ n sun,
ŋga sun hin?
Ndee mni mbe pe,
mbe kee sisaa yo,
mbe leele mblɛ na Nyiɛkpɔɔ
n kɛ laa mblɛ sun hin?
9 Ni leele nyaa,
nyua ndra na wa.
Ni yire mna,
na pe nyaa.
Ni pe nya a pe yili peyɛ,
a pe n pe na waŋgrɛ yire
leele lɛ.
10 Jacob nanae lɛ,
pe nɛɛ a ndro wa jaa
pe tɔɔnri.
Ti mbe ni ble nyjɛ mbe li
pe na Nyiɛkpɔɔ leele mblɛ
pe fraka mblɛ lɛ,
mbe ni ku wejinyiŋge nu na pre lɛ.”
11 A Ŋunu Balak na yo Balaam pan mbo, “Yira ŋgi kee mu ni piin ŋga hin? Ni pan na mu ni mbe mu paan ni loŋgoolo sun ni pan, kre ma mu pan na piin, a mna pe dwan na yaa.”
12 A Balaam na kna mbo, “Ŋga o Tafun Nyiɛkpɔɔ le ni nyu na chiin mbe jaa yo.”
13 A ŋunu Balak na kna mna yo u pan mbo, “Pan mbe o sɛ lawee fɔŋgɔ nu, mna mu jaa pe nya chiriri. Mu jaa yire wa mbe pe sun.” 14 A wra Balaam wru mna sɛ Zophim see ka nu nu, nyua Pisgah ndra na, mna sɛ sragbuɛnlɛɛ kɔɔnashin sin wa, mna nablɛm, na mbaplɔ mbra shiin shiin mna pe tɛɛ mu sra wɔ sragbuɛnlɛɛ kɔɔnashin na. 15 A Balaam na yo ŋunu Balak pan mbo, “Tni mna mu srayirɛ yire mbɛɛ na, mbe ni sɛ Nyiɛkpɔɔ fni mnaa wa mbe pan.” 16 Bawa o Tafun Nyiɛkpɔɔ na pan mu u fni, mna kala le u nyu na mbo, “Ndru mu sɛ kre kee ŋga yo ŋunu Balak pan.” 17 A wra wru mna sɛ u da na uu wa mu yire u srayirɛ yire jaara, wre na u loplombo pre ni. A ŋunu Balak na u wie mbo, “Mni o Tafun Nyiɛkpɔɔ wre yo hin?”
18 A wra kee ŋga u wɔ mu nyina kre yo mbo,
“Balak yiri mu loo,
Zippor biblɔ ndie tɛɛ ni pan.
19 Nyiɛkpɔɔ n pe na lewo wi,
mbe u kala fnɛ,
ndee na u kala yo,
mbe u u jawala chinɛ,
mbe wa ki pe.
U nyu yuu,
mbe wa li ki na ree?
20 Ŋga u yo ni pe yi na,
ni pe dwan,
a ni pe dwan,
a mba jaa ki chinɛ.
21 Ni n ndrapɛɛnrɛ
kee ŋga kie kɔɔ
Israel leele da nya.
Pe Tafun Nyiɛkpɔɔ
wree wa pe kro.
Nyiɛkpɔɔ mɛɛ pe yeeri,
na wre wi pe ŋunu.
22 Nyiɛkpɔɔ wra pe wɔ
mu yili Egypt tra nu.
Wra wi mu pe ŋga,
na nyaalam nuu,
faŋgafun wi.
23 Kre dobodobo kee,
na tiprɛm kee ka n wa,
mbe Israel leele ja.
Ndro kro we na pe kee yuu na,
e le kee ŋga Nyiɛkpɔɔ,
pe mu pe ŋga.
24 Israel leele pre yiri sholo
na jira wi,
pe peyɛ nyaara na blɛkpɔɔ
u loŋgo nya,
a wa jaa tni titɛɛ,
fɔna u u gbo,
mu u nyimi gbɔ tun.”
25 Bawa ŋunu Balak na yo Balaam pan mbo, “Maashia pe sun, a maashia pe dwan na.”
26 A Balaam na kna mbo, “Ni n yo mu pan na ŋga o Tafun Nyiɛkpɔɔ le ni nyuu mbe yo mu pan kree?”
27 A Balak na yo Balaam pan mbo, “Pan mbe o sɛ lawee fɔŋgɔ nu, aada bawa, kie tna Nyiɛkpɔɔ pan mbe u ti mu pe sun mbe ni ŋga.” 28 A Balak na Balaam wru, a pra sɛ nyua ŋga pe yeeri Peor kre na, na mu yire wa to pan mu tablɔ tra kre nyaa.