24
Ŋga Balaam na nya na ki tna o Tafun wre pan na we Israel leele dwan kre, u n sra sɛ dobodobo kee ka pe na, la, yiɛ wra kna mna tɛɛ tablɔ tra kre nu. 2 Ŋga wra yiɛ wa mna Israel leele pre nya na pee wa mu ble ble jlom jlom kre, titɛɛ kre nu a Nyiɛkpɔɔ ŋumu na pan mu le u nu, 3 a wraa kee nyaa na yuu mbo,“Yirɛ nyjɛ mi Beor biblɔ
Balaam nya,
yirɛ nyjɛ lewo ŋmba,
u nyaa chasi nyiɛlɛ na
wre nya,
4 yirɛ nyjɛ ŋmba,
u Nyiɛkpɔɔ nyu kee ndru,
ŋmba u Jaŋgafun
wre kee nyaa na yuu,
ŋmba u sni mbrɔrɔ,
mbe nyiɛlɛ na le wre,
u kee nyjɛ u nyaa yire yi kre.
5 Jacob nanae,
e Yonyi Nyinyi yire nyu nyu titi.
6 Pan yi tɛni yi yɛ na,
na tinyi wa nyuɛ landɛɛ nu,
pan yi nyi to,
na pe tinyi luu lɔɔ mbɛɛ na.
E pe na tiŋge liwo
ŋga o Tafun Nyiɛkpɔɔ
wre luu yi.
Pan e pe to
na cedar tiŋge
ŋga kii wa lɔɔ mbɛɛ na yi.
7 Na pe yirɛ luu seele nu,
nyjeeri nyiɛ we pan,
mbe wo yi na chichie.
A pe ŋulo we mɛɛ shɔ,
mbe wɛ Amalek,
ŋunu Agag na,
mbe pe ŋunumu kpɔɔ.
8 Nyiɛkpɔɔ wra pe wɔ,
mu yili Egypt tra nu.
Pee faŋga ni na nui lɛ.
Pie waŋgrɛ nyjɛ
nyibie yi sheli yii,
mbe pe kajle juari bujibuji.
Pie pe snimi tɛɛ
mbe pe suulo.
9 Pan pie lɛɛlɛ
mbe sni sni na jirae lɛ.
Pan pie pe na,
jira chahoo sni na ŋunu,
ŋu wi ŋmbi,
mbe mu sro mbe da u na.
Ŋmba we Israel leele
dwan kpan,
u wo yi dwamu,
a ŋmba we pe sun kpan,
suŋgɔ we u yii.”
10 Bawa ŋunu Balak krɔ na kun na Balaam ni kpɔɔ, a wra kɛnyi shiin koori mna yo u pan mbo, “Yeeri ni mu yeeri na mu paan leele mblɛ sun, a mu pan na dwan na pe kaan. 11 Yili mna fuŋgaami mu sɛ mu chia. Ndaa yo na mbe mu kɛ yira badaaŋga, a la, o Tafun Nyiɛkpɔɔ wre n tia mu ŋga ni chaa pe, ki tia ma ki ta.”
12 A Balaam na kna mna yo ŋunu Balak pan mbo, “Ndaa yo mu loplombo mblɛ mna tun ni pan pre pan na, 13 hali, na ŋunu Balak ni ŋga u ŋunu katoo, mu swafiŋge na swanyiɛ le ki nu a ki nyi kuraa kre, mba jaa ŋga ni chaa pe. Mba jaa chichie, ndee sisaa pe, fɔna ŋga Nyiɛkpɔɔ wre we yo, kre mbe yo. 14 Fuŋgaami ŋga ni ndru na shie ni leele pan, la, ti mbe ni mu nyina kee ŋga leele mblɛ we kɔɔ taa mu leele na mbakɔ.”
15 Bawa wra nyu nyaa na ŋga u nya yuu mbo, “Nyiɛkpɔɔ kee ŋga Beor biblɔ Balaam nya chasi na yuu yi kre.
16 Ŋmba u Nyiɛkpɔɔ kee ndru
na yuu wre nyu kee yi kre.
Ŋmba u Nyiɛkpɔɔ jawala chin,
ŋmba u Jaŋgafun wre
kee nyaa na yuu.
Ni sni mbrɔrɔ,
la, ni nyiɛlɛ wa na nyaa.
17 Ni nya na ŋunu wa
we kɔɔ yili Israel leele nu,
we yili na wɔlɔ yi.
Wre we paan
Moab loplombo kro gbo,
mbe ki leele kro kla.
18 We u loŋgoolo Edom leele
pre kro ja,
mbe tra kre wru mbe ta,
na Israel we yire,
mbe faŋga ta,
19 Ŋunu wa we yiri Israel na,
mbe paan mblɛ pie kro
chiɛ yire na kro kla.”
20 Bawa wra Amalek leele kee nya mna yo mbo,
“Amalek pe waŋgra,
ŋga kra yiɛ klu fa,
la, pie kɔɔ ki cha mbe la.”
21 Kenite leele kee ŋga wra nya mna yo na yi kre, mbo,
“E sɛ e tni hɛɛ pe,
dnɛ ndra na,
na hanyini
u sɛ zeere le nyjeeri,
na jawa na u shɔ kee kro nu.
22 Assyria leele we pan,
mbe e yii mbe sɛ e pe tinlɛ.”
23 Kee ŋga Balaam na yo na yi kre mbo,
“Na Nyiɛkpɔɔ yo,
we kre kee ŋga sembremu pe,
lewo ŋmbi we ŋmaa ta hin?
24 Wifɛɛnlɛ we krɔɛ kpɔɛ wru,
mbe yiri kuyɔɔsu tra ŋga,
pe yeeri Cyprus kre na,
mbe paan Assyria
na Eber leele kro tɔ,
mbe pe kla,
a nde kre kɔkro kre,
pre chɔɔ nɔɔ
we pan mbe fun na.”
25 Ŋga Balaam nyu na to kre, a wra yiri mna sɛ u chia, a ŋunu Balak na sɛ u lawee.