Israel Leele Pre Naa Sɛɛn Baal Sumi
25
Ŋga Israel leele pre na tni Shittim na kre, pe bilɛ pre naa Moab chiɛlɛ pre yiri na sni. 2 Kra tia na Moab chiɛlɛ pre pe sɛɛnlɛ pɛɛri kre, mbe pe sɛ Israel bilɛ pre yeeri, mbe pe kro sɛ na kosie kani pe sɛɛnlɛ yire yiɛ, mnaa sɛɛn kaara kaa. 3 Ŋga kra pan ma kre, Israel leele pre naa pe sɛɛn ŋga pe yeeri Peor Baal kre sumi, kra tia Nyiɛkpɔɔ krɔ na kun na pe ni. 4 A o Tafun Nyiɛkpɔɔ na yo Moses pan mbo, “Israel loplombo mblɛ pe sɛ sɛɛn kre na pre kro yoori, mu pe gbo peii ni Yoŋgo Nyuŋgo kre yɛsimi lafo chrichri na, mbe ndro kro pe nya. Imi kie pe mbe ni krɔ ŋga ki kun sisaa kre nyjii.” 5 A Moses na yo Israel kprakunfɛɛnlɛ pre pan na pe leele mblɛ pe sɛɛn Peor Baal kre sumi pre kro, pe pe gbo.6 Nyjila ŋga nu Moses na Israel leele pre kro naa wa na nyɛni Yoŋgo nyuŋgo kre yɛsimi wa kre, pra nya na Israel bilɛ pre wa lee na Midian chlɔ wa ni u yoŋgo nyuŋgo pe kro yiɛ na. Kre kee ŋga ndra na, Nyiɛkpɔɔ na tia kumu na pan mu le leele pre nu. 7 Ŋga srawɔfun Aaron nanae pre wa, praa u yeeri Phinehas, a wra pe Eleazar biblɔ na pe nya kre, a wra yili leele pre nu, mna sɛ u chombo wru, 8 mna taa pe na, mna sɛ le pe yoŋgo nyuŋgo wa. Bawa wra chombo kre tɛɛ mna pe kro shiin sun mu mbra peyɛ na. Titɛɛ kre nu to, a Nyiɛkpɔɔ na tia kumu ŋga kra le pe nu kre nyu na to. 9 La, pe mblɛ pra ku pre nyu naa kagbenyi fulo na jijirɛ.
10 A o Tafun Nyiɛkpɔɔ na yo Moses pan mbo, 11 “Eleazar biblɔ Phinehas, srawɔfun Aaron nana wre tia ni krɔ nyjii kee ŋga mbe na pe Israel lee na kre na. U pe ndro ŋmba wa kolo ŋga mbe ndro sɛɛn sumi, fɔna mi Nyiɛkpɔɔ bɔkɔ, kre ki tia ni krɔ nyjii, a ni n pe kla kre. 12 Kena ti mbe u loo na, mi na wre we wejinyiŋge nyu nunu pe, mbe ki tni nyjila kro nu. 13 Wre na u nanae we pe ni srawɔfɛɛnlɛ, ŋgi na hin? U ni ŋmbee wi, mu tia Israel leele sisam tinkɛɛ ta.”
14 Israel blɔ ŋmba na Midian chlɔ wre pra chaa mu gbo wre mɛɛ naa Zimri, a u lɛ mɛɛ naa Salu. A wre na wi Simeon jlom kre yɛklo. 15 A Midian chlɔ ŋmba pra gbo wre mɛɛ naa Cozbi. U lɛ na wi Zur, a wra pe Midian jlom kre lopom.