6 A Moses na Gad, na Reuben jlom wolo pre wie mbo, “Mni a e na chaa mbe kro mna, mbe e wolo Israel leele pre sɛ na wii mbe e ti hin? 7 Mni a e na chaa mbe e wolo pre sɔɔnrɔ gbo, mbe pia lɔɔ kun mbe sɛ tra ŋga o Tafun Nyiɛkpɔɔ pe ŋga kre nu hin? 8 Kre kee ŋga ka e lɛɛlɛ na pe, nyjila ŋga ndaa yire Kadesh Barnea na mna pe tun mbe pe sɛ tra kre le mbe pan kre. 9 Ŋga pra sɛ Eshcol landɛɛ nya mna tra kre le mu tro kre, a pra pan mna Israel leele pre sɔɔnrɔ gbo, mbe pia jaa sɛ tra ŋga o Tafun Nyiɛkpɔɔ na pe ŋga kre nu. 10 Kra tia o Tafun Nyiɛkpɔɔ wre krɔ na kun na pe ni ki ble kre, a wra kre daŋga ŋga da mbo, 11 ‘Ni da na ŋga leele mblɛ n lɛɛ wɔ mu taa ni kro kre ndra na, pe bilɛ mblɛ pra yili Egypt tra nu, mna li yɛlɛ fulo mu na shie pre wa tra ŋga nyu ndaa yo pe tolɛɛlɛ Abraham, na Isaac, na Jacob pan na mbe pe ŋga kre nya na nyini ni. 12 Pe wa wa ki nya, fɔna Caleb, Jephunneh Kenaz ndro wre biblɔ wre, na Joshua Nun biblɔ wre bɔkɔ. Pre shiin pre pra lɛɛ wɔ mna taa ni kro.’ 13 Kra tia o Tafun Nyiɛkpɔɔ krɔ na kun na Israel leele pre ni kpɔɔ, a wra tia pra kila tablɔ tra kre nu chiin yɛlɛ fuloe shiin, mna sɛ su na pre leele pre pra sisam pe pre kro na ku peii mu kɔ.

14 Kre mu e nya kre, yire sisampefɛɛnlɛ nanae, e yiri mu tni e tolɛɛlɛ pre titɛɛ, mbe kɔɔ ti o Tafun Nyiɛkpɔɔ wre krɔ na kuun na Israel leele pre ni kpɔɔ mbe ya. 15 Na e waa laa u kro, we leele mblɛ kro ti tablɔ tra ŋga nu mna, a yaa u nya na fio, na kaa pan ma, yire Reuben, na Gad jlom leele mblɛ na kie yire mbe leele pre kla.”

16 A Reuben, na Gad leele pre na yo Moses pan mbo, “O chaa mbe nagbɛɛ sin o yurɛ pre pan mna, mbe chiɛ yɛ pɔ mbe mboe sin mbe yi fɛ mbe kun wre na o chiɛlɛ, na o biile pan. 17 La, oo oyɛ kna mbe yiɛklu o wolo Israel leele pre pan, mbe lɔɔ kre kun mbe wre na pre wi mbe sɛ su na pie le lawee ŋga nu pie sɛ tni kre nu. A imi na ki nyi kre, ki fna mbe o chiɛ sin o chiɛlɛ, na o biile pre pan, mbe mboe sin mbe chiɛ yire fɛ mbe kun, mbe leele mblɛ pee wa mu tni tra ŋga nu pre wa jaa paan pe pe yaka. 18 Na o shie waa ndru mbe pan o kro, fɔna Israel leele pre kro tra ta mu tni tun. 19 A waa krɔyira ka ta, Jordan lɔɔ kre kro wa, ŋgi na hin? Wre ta Jordan lɔɔ kre yila finhaa mna.”

20 A Moses na yo pe pan mbo, “Na pan e yo na ee eyɛ kna, mbe o Tafun Nyiɛkpɔɔ yiɛklu e pan mbe wi mbe e ŋga 21 mbe e Jordan lɔɔ kre kun mbe u e loŋgoolo pre ni e yiɛ, 22 mbe tra kre shɔ mbe Israel leele pre ŋga waa, kena we ti mbe e ndru mbe paan tra ŋga wru mbe tni, mbe ki pe e wo. 23 La, na e waa je, a e n ki pe ma, kena e sisaa pe mu o Tafun Nyiɛkpɔɔ taan, a ee e sisam kre fɔtɔɔrɔ ta. 24 E chiɛ yire sin mbe e chiɛlɛ, na e biile tni, mbe e nagbɛɛ sin mbe e yurɛ pre le, la, nyu ŋga e yo kre, e le na ee li ki na.” 25 A pra kna mna yo Moses pan mbo, “Kee ŋga o Tafun Nyiɛkpɔɔ wre yo kpan, mu sumifɛɛnlɛ, oo li ki na. 26 O chiɛlɛ, na o biile, na o yurɛ pre we kro Gilead tra nu mna. 27 La, mu sumifɛɛnlɛ, oo oyɛ kna mbe Jordan lɔɔ kre kun, mbe sɛ yiɛklu o Tafun Nyiɛkpɔɔ wre pan mbe wi, imi na mu ki yo o pan kre.”

28 A Moses na yo srawɔfun Eleazar, na Nun biblɔ Joshua, na Israel jlom loplombo pre kro pan mbo, 29 “Na Gad, na Reuben jlom leele pre bilɛ pre kro waa Jordan lɔɔ kre kun, mu yiɛklu o Tafun Nyiɛkpɔɔ pan, mu wi mu tra kre shɔ kre, kena mu pe ŋga Gilead tra ŋga, mbe ki pe pe wo. 30 La, na pe nsra peyɛ kna, a e kro Jordan lɔɔ kre kun mu sɛ, kena sɛ pe ŋga tra kre ka Canaan tra nu wa, mbra shie yila tohaa wa.”

31 A Gad, na Reuben jlom wolo pre na kna mbo, “Mu sumifɛɛnlɛ lɛ wre, oo li o Tafun Nyiɛkpɔɔ wre nyu kee kre na. 32 Oo Jordan lɔɔ kre kun mbe o Tafun Nyiɛkpɔɔ wre yiɛklu mbe sɛ le Canaan tra kre nu, la, tra ŋga oo ta krɔyira kre we pe Jordan lɔɔ kre kokoo ŋga na mna.”

33 A Moses na Gad, na Reuben jlom leele pre, na Joseph biblɔ Manasseh wre jlom kre yɔɔ ŋga Amora ŋunu Sihon wre tra, kre na Bashan ŋunu Og tra kre, yire na kakpɔɛ, na yi seechiɛ nyjɛ yira yi fɛ mu kun kro.

34 Gad jlom leele pre pra yire chiɛ nyjɛ gbeele mu sin, Dibon, na Ataroth, na Aroer, 35 na Atroth, na Jazer, na Jogbehah, 36 na Beth-Nimrah, na Beth-Haran. Mna mboe sin mu yi fɛ mu kun, mna nagbɛɛ le le yi na pe yurɛ pan. 37 A Reuben jlom leele pra yire chiɛ nyjɛ gbeele mu sin, Heshbon, na Elealeh na Kiriathaim, 38 na Sibmah, mu wru mu ya chiɛ nyjɛ praa yeeri Nebo, na Baal-Meon yire na. Pra yire chiɛ nyjɛ krɛrɛ ŋga mɛɛ fɔnyi.

39 A Manasseh biblɔ Makir wre jlom leele pre na sɛ Gilead na, mna sɛ wi mu ki shɔ, mna Amora leele pre ni wa. 40 A Moses na kre Gilead tra kre wru mu Manasseh biblɔ Makir wre jlom leele pre ŋga, a pra tni wa. 41 Manasseh jlom ndro wa praa u yeeri Jair, wre na sɛ wi mna seechiɛ yɛ shɔ mna yi mɛɛ tɛɛ Havvoth-Jair, wre titi mɛɛ wra taa yi na. 42 A Nobah na sɛ wi mu Kenath na ki kabɛɛlɛ kro shɔ, mna yi mɛɛ tɛɛ Nobah, wre titi mɛɛ wra taa yi na.