7 Pra sɛ wi na Midian leele pre ni imi na o Tafun Nyiɛkpɔɔ na ki yo kre, mna Midian bilɛ pre gbo peii. 8 Leele mblɛ pra gbo kre, Midian wa ŋulo kunɔ na chaa pe nu, pre na lɛ ŋunu Evi, na Rekem, na Zur, na Hur, na Reba. Mna Beor biblɔ Balaam wre gbo brɔfiɛn yiɛshiin ni wa. 9 Israel leele pre na Midian wa chiɛlɛ, na pe biile kro yii, mna pe nui, na pe mbaala, na pe sikaala, na pe yirɛ kro foolo mu wru. 10 A chiɛ, na seechiɛ nyjɛ na Midian leele pre na nyi mu tni yire kro pra yi sro putuu. 11-12 Pra yirɛ nyjɛ pra foolo wa yire, na leele pre wru mna pan mu Moses ŋga pe tni haa wa, Moab tra mbrɛrɛ kre nu, mu mbra Jordan lɔɔ lawee ŋga nu Jericho na nyi lɔɔ kro kre.

13 Ŋga ŋunɔwifɛɛnlɛ pre na ndru na paan kre, Moses, na srawɔfun Eleazar, na Israel loplombo pre na yiri mna sɛ pe fni kolo. 14 A Moses krɔ na kun na ŋunɔwifɛɛnlɛ loplombo pre ni, pe mblɛ pra yiɛklu na ŋunɔwifɛɛnlɛ kagbenyi kagbenyi pan, na mblɛ pra yiɛklu na pe lafɛɛ lafɛɛ pan, mna ndru mu pan na pe ni pre kro. 15 Moses na pe wie mbo, “E chiɛlɛ pre ti a pe ŋmaa li ra?” 16 Pre chiɛlɛ mblɛ pra taa Balaam nyu kee na, a pre na kra yire a Israel leele pre na laa o Tafun Nyiɛkpɔɔ kro, mna sɛ sɛɛn Baal sumi Peor nyua kre na, a yira na le Israel leele nu mna pe tataara gbo kre. 17 Kena e pe bibilɛ pre, na chiɛlɛ mblɛ pe bilɛ chin pre gbo peii fuŋgaami. 18 La, chiɛlɛ mblɛ pe n bilɛ chin kre, e pre ti eyɛ pan. 19 A Moses na yo ŋunɔwifɛɛnlɛ pre pan mbo, “E ŋmba u leele pre wa gbo, ndee mu da gboo na kre, ŋu fun wre le nɛɛrɛ nu, kena ki fna mbe ufun tni chia kre mbookrɔ ble kɔɔnashin. Ki ble taarɛ, na ble kɔɔnashin wo kre na, mbe e yire na chiɛlɛ mblɛ e yii mu pan pre kro wɔ nɛɛrɛ nu paala kolo na. 20 Mbe e e dodonyi, na yira ŋga pe pe na yurɔ hlɛ, ndee sugbɔ yooro, ndee kaan ni kro wɔ nɛɛrɛ nu na.”

21 Srawɔfun Eleazar na yo Israel ŋunɔwifɛɛnlɛ pre pra sɛ wi pre pan mbo, “Mbra ŋga o Tafun Nyiɛkpɔɔ wre Moses ŋga mbe u le e pan yi kre mbo, 22-23 Na e chaa mbe yira ŋga kia jaa shɔ pe cheche kre, na swanyiɛ yi o, ndee swafiŋge yi o, ndee na swafre yi o, ndee na tɔɔnrɔ yi o, ndee na prim yi o, yira ŋga e chin na kia ja mbe shɔ kpan, e ki le kanhun mbe ki chin mbe pe cheche. A yira ŋga kie jaa shɔ kre, mbe e nyumu kre ka tɛɛ mbe ki pe cheche. 24 Ble kɔɔnashin ble kre na e e yirɛ je, mbe pe cheche. Kre ee ja mbe pan e tnihaa wa.”

25 O Tafun Nyiɛkpɔɔ na yo Moses pan mbo, 26 “Ŋu na srawɔfun Eleazar, na jlom loplombo pre, e leele, na yurɛ mblɛ pe yii ŋunɔ mu pan pre kro tɔɔnri. 27 E leele pre, na yirɛ nyjɛ ni pe yiri ŋunɔ mu pan yire yɔ shiin mbe yi yila, mbe mu ŋunɔwifɛɛnlɛ pre ŋga nunu, mbe hɛnyi yire wru mbe leele pre hamblɛ ŋga. 28 Yɔm ŋga ŋunɔwifɛɛnlɛ pre we ta kre, na wa waa ta a pe da leele lafɛɛ kunɔ, ki fna mbe u ndro nunu wɔ mbe mi e Tafun Nyiɛkpɔɔ wre ŋga. Pan chɔɔ pie nui, na bubunlɔ, na mbaala, na sikaala pre kro pe. 29 Kena mblɛ pie wɔ na ni wolo lɛ kre, mbe e pe wru mbe srawɔfun Eleazar ŋga. 30 A mblɛ Israel leele pre we ta kre, na wa waa ta leele fuloe shiin na kɛ, ki fna mbe u nunu wɔ mbe Levi leele mblɛ kɛɛ o Tafun Nyiɛkpɔɔ Yoŋgo Nyuŋgo kre nyi pre ŋga, pan chɔɔ ki fna mbe pe nui, na bubunlɔ, na mbaala, na sikaala pre pe na.” 31 A Moses na srawɔfun Eleazar na kee ŋga o Tafun Nyiɛkpɔɔ na yo Moses pan yire pe.

32 Leele, na yurɔ mblɛ pra kro a ŋunɔwifɛɛnlɛ pre na pan na pe ni pre nyu naa, mbaala kagbenyi lafɛɛ kɔɔnanu na fuloe taarɛ na kɛmbɔkunɔ, 33 na nui kagbenyi fuloe taarɛ na kɛmbɔshiin, 34 na bubunlɔ kagbenyi fuloe taarɛ na nunu, 35 na chiɛlɛ mblɛ pe nsra bilɛ chin kagbenyi fulo na kɛmbɔshiin.

36 Ŋga pra pe yɔ shiin kre, ŋunɔwifɛɛnlɛ pre na ta mbaala na sikaala kagbenyi lafɛɛ taarɛ na fulo na kɛmbɔkɔɔnashin na lafɛɛ kunɔ, 37 a o Tafun Nyiɛkpɔɔ wolo na pe lafɛɛ kɔɔnanu na fuloe taarɛ na kɛmbɔkunɔ. 38 Ŋunɔwifɛɛnlɛ pre nui naa kagbenyi fulo na kɛmbɔkɔɔnanu, a o Tafun Nyiɛkpɔɔ wolo naa fuloe taarɛ na kɛmbɔshiin. 39 Bubunlɔ pre, ŋunɔwifɛɛnlɛ pre na ta kagbenyi fulo na kɛ na lafɛɛ kunɔ, a o Tafun Nyiɛkpɔɔ wolo naa fuloe taarɛ na nunu. 40 Leele pre, ŋunɔwifɛɛnlɛ pre na ta kagbenyi kɛmbɔkɔɔnanu, a o Tafun Nyiɛkpɔɔ na ta fulo na kɛmbɔshiin. 41 Pe mblɛ pra pe o Tafun Nyiɛkpɔɔ wolo kre, Moses na pe kro wru mu srawɔfun Eleazar ŋga, imi na o Tafun Nyiɛkpɔɔ na yo kre.

42 Ŋga pra leele pre na yurɛ pre yɔ shiin mna ŋunɔ wifɛɛnlɛ pre ŋga yɔm nunu kre, yɔm ŋga pra Israel leele pre ŋga naa, 43 mbaala kagbenyi lafɛɛ taarɛ, na fulo na kɛmbɔkɔɔnashin na lafɛɛ kunɔ, 44 na nui pre kagbenyi fulo na kɛmbɔkɔɔnanu, 45 Na bubunlɔ pre kagbenyi fulo na kɛ na lafɛɛ kunɔ, 46 na leele pre kagbenyi kɛmbɔkɔɔnanu. 47 Yɔm ŋga Israel leele pre na ta kre, na pe leele pre tɔɔnri mu da fuloe shiin na kɛ kpan, mbe Moses nunu wɔ o Tafun Nyiɛkpɔɔ wo. Pan wra yurɛ pre kro pe, mna mblɛ wra wɔ pre wru mu Levi leele mblɛ praa o Tafun Nyiɛkpɔɔ yoŋgo nyuŋgo kre le pre ŋga.

48 Ŋga pra kɔ kre, a ŋunɔ wifɛɛnlɛ pre loplombo mblɛ pra yiɛklu na pe ni pre na sɛ yo Moses pan mbo, 49 “Mu sumifɛɛnlɛ, o ŋunɔ wifɛɛnlɛ mblɛ ni o na sɛ ŋunɔ mu pan pre tɔɔnri, mu nya na nunu chom kuraa nsra fun pe nu. 50 Ki tia o pan mbe sra wɔ na swanyiɛ yirɛ nyjɛ o ta mu yiri Midian tra nu yire kro ni mbe o Tafun Nyiɛkpɔɔ ŋga, na u kɛ tɔ u na ŋunɔ. Yirɛ nyjɛ ni o pan yi swanyiɛ kɛgbrɛ, na yi kɛ jlɔnyi, na feelee ŋga ni pe yirɛ tnɔ, na ndiile yirɛ, lagboo jlɔnyi.”

51 A Moses, na srawɔfun Eleazar na swanyiɛ yirɛ nyjɛ ni pra pan yire shɔ. 52 Yire swanyiɛ yirɛ nyjɛ ni pra pan mu sra wɔ mbe o Tafun Nyiɛkpɔɔ ŋga yire kro snam na da kradnɛ lafɛɛ jijirɛ na fulo. 53 Ŋunɔ wifɛɛnlɛ mblɛ pe nsra pe loplombo pre na yirɛ yire yɛ foolo mu ta pre titi wee. 54 A Moses, na srawɔfun Eleazar na yire swanyiɛ yirɛ yire shɔ ŋunɔwifɛɛnlɛ loplombo pre pan, mna sɛ yi tɛɛ Yoŋgo Nyuŋgo wa, mbe yiraa o Tafun Nyiɛkpɔɔ wre sɔɔnri, mbe wraa yaa Israel leele pre na nyjila kro nu.