3 A na ki pan na bichable ŋmba uu wa u lɛ katoo danyi yɛ da, ndee mu nyu wru na we kee ka pe mbe o Tafun Nyiɛkpɔɔ ŋga, 4 a u lɛ wre danyi yire, ndee nyu ŋga u yo kre loo, a u n nyu ka kun, kena ki fna u le na we li u danyi yire, ndee kee ŋga na u nyu wru kre na. 5 La na u lɛ waa ki loo, maa u nyu gbun u danyi yire, ndee nyu ŋga u wru kre na, kena u danyi yire, na nyu ŋga u wru kre kala wa u nya, o Tafun Nyiɛkpɔɔ we yi ti mbe u ŋga.

6 A na ki pan na bichable danyi da, ndee mu nyu wru kee ka na, na kaa u lii o, ndee na kee yɛŋgɛ u lii o, na ki pan na u kɔ mu leŋge, 7 a u plɔ wre waa ki loo mu pieri kre, kena u danyi yire, ndee u nyu ŋga wra wru kre we u nya. 8 La na u plɔ wre waa ki loo, maa u nyu gbun naa, kena chlɔ wre danyi yire, na u nyu ŋga u wru kre wa tnumu tun. O Tafun Nyiɛkpɔɔ we yi ti mbe u ŋga.

9 Danyi, ndee nyu ŋga lekuchɔ, ndee chlɔ ŋmba u leŋge mu je we wru kro, ki fna mbe u li ki na.

10 Na chlɔ na u plɔ wa mu tni, a u danyi da, ndee mu yo na we kee ka pe, 11 a u plɔ wre waa ki loo mu pieri, a u nsra u chlɔ wre nyu gbun ki na, kena u danyi yire, ndee nyu ŋga u wru kre kee we u nya. 12 La na u plɔ wre waa yi loo mu chlɔ wre nyu gbun yi na, kena u danyi yire, ndee nyu ŋga u wru kre wa tnumu tun. Ŋga blɔ wre u nyu gbun yi na kre ndra na, o Tafun Nyiɛkpɔɔ wre yi ti mu u ŋga. 13 Chlɔ wre plɔ wa kolo ni na we danyi, ndee nyu ŋga chlɔ wre wru kre kee ŋga u chaa kpan yo mbe u shɔ, ndee mbe u ti ki nu. 14 La, na u plɔ waa ki loo mu pieri a nyiŋge pan mu se ki na kre, kena u li ki na mbe chlɔ wre danyi, ndee nyu ŋga u wru kre u li. 15 La, na nyiŋge waa se mu kɔ, a blɔ wre waa chin mu kala ka chin na yuu kre, wre we ki mapini tio.”

16 Yire mbra nyjɛ o Tafun Nyiɛkpɔɔ wre na Moses ŋga, mu wru blɔ na u chɔ lalaa, na blɔ na u bichlɔ ŋmba u n leŋge tun, mu wa mu tni u pan katoo kre lalaa.