Mbra Ŋga Ki Sna Titi Yi Koroo
6
Yire mbra nyjɛ o Tafun Nyiɛkpɔɔ wre na ni ŋga, na ni e nyina yi yi, mbe e li yi na tra ŋga ee Jordan lɔɔ kre kuun mbe sɛ wru mbe tni kre nu. 2 A na yire na e nanae chaa mbe tni mbe e ŋmaa tnu kre, kena ki fna mbe e o Tafun Nyiɛkpɔɔ wre fiɛ, mbe li u mbra yire kro na. 3 Israel leele e loo, e dɔɔ ta na ee li mbra yire na, mbe ki kee kro nyu mbe e ŋga, mbe e jiri nɛɛrɛ tra taan kre nu, imi na o Tafun Nyiɛkpɔɔ na nyu yo e tolɛɛlɛ pre pan kre.4 Israel leele e loo, o Tafun Nyiɛkpɔɔ wre, Nyiɛkpɔɔ nunu chom wi. 5 Kena e o Tafun Nyiɛkpɔɔ wre kori na e loloŋgo, na e nyiɛ, na e faŋga kro ni. 6 E mbra nyjɛ ni e kaan aŋga ble ŋga nu ŋga le e lolonyi nu. 7 E e biile nyina yi yi. Na ee wa e kalonyi nu, ndee na kolo e yii na shie, ndee na sni e sni, ndee na e yiri dɛŋglɛ na, e na yi kee yuu pe pan. 8 E yi nyunɔ yirɛ na, e yi pɔ kɛnyi na, na e nduweele na, imi kie pe mbe e na yi sɔɔnri. 9 E yi nyunɔ e nyinyi krɔɛ jeelee, na e jlonwee nyu krɔɛ na.
Moses Pe Jaari Ndikana Na
10 O Tafun Nyiɛkpɔɔ wre na u nyu yo e tolɛɛlɛ Abraham, na Isaac, na Jacob pan na, we pan na e ni tra ŋga nu kakpɔɛ chichiele nyi, a yire titi ma e yi sin nu, 11 na kalonyi nyjɛ nu yirɛ chichiele nyini nyini nyi mu yi nyi, a yire titi ma e yi le yi nu, na kɔlɔe nyjɛ yire titi n tuulo, na tre sɛnyi kagblɛ, na olive tinyi kagblɛ nyjɛ yire titi n luu, mbe e yi ta mbe li mbe yɔɔ, 12 kena e dɔɔ ta chichie mbe yaa e Tafun Nyiɛkpɔɔ ŋmba wra e wɔ mu yili Egypt tra nu, mna e na pe tinlɛ kre fɛɛ. 13 E o Tafun Nyiɛkpɔɔ wre fiɛ, e na wre chiin sumi. A na wa we da, u wre chiin mɛɛ tɛɛ u da. 14 Yaa shia na leele mblɛ pe e fɛ mu kun pre sɛɛnlɛ yire yɛ sumi. 15 Ŋgi na hin? E Tafun Nyiɛkpɔɔ ŋmba wi e nu kre, Nyiɛkpɔɔ yenyjam fun wi, na e pe ma u krɔ we kun kpɔɔ na e ni, mbe u e kla tra yiɛ na.
16 Yaashia e Tafun Nyiɛkpɔɔ wre pe mbe le, imi na e na pe Massah na kre. 17 E le chichie na ee li e Tafun Nyiɛkpɔɔ wre mbra nyjɛ wra e ŋga yire kro na. 18 E na kee ŋga ki nyu mu fraka o Tafun Nyiɛkpɔɔ wre pan pini, mbe ki ti kee kro nyu mbe e ŋga, mbe ki ti e jaa sɛ tra chichie ŋga o Tafun Nyiɛkpɔɔ na daŋga tɛɛ mna nyu yo e tolɛɛlɛ pan kre wru tni. 19 A we e loŋgoolo ni e yiɛ, imi na wra yo kre.
20 Kena na e bibilɛ waa e wie mbakɔ na, “Yira kra tia o Tafun Nyiɛkpɔɔ wre na yire mbra nyjɛ le e pan na e li yi na hin?” 21 Mbe e yo pe pan na, “Ŋunu Pharaoh tinlɛ na lɛ wre Egypt tra nu, la, o Tafun Nyiɛkpɔɔ wre na u jaŋga kpɔɔ tɛɛ mna o wɔ mu yili wa.” 22 Wre titi yiɛ na o Tafun Nyiɛkpɔɔ na kawako kee, na kekpɔɛ fiɛrɛ wee pe tataara Egypt tra nu, na Pharaoh na u katoo leele kro na. 23 La, wra o wɔ mu yili wa, mna pan mu o ŋga tra ŋga wra daŋga tɛɛ mu nyu yo o tolɛɛlɛ pan kre. 24 Bawa o Tafun Nyiɛkpɔɔ na yo o pan na o li yire mbra nyjɛ na kro, mbra u fiɛ, mbe ki ti o kɛ nyu nyjila kro nu, mbe o ŋmaa ta imi na o nyi aŋga ŋga. 25 A na o li mbra yire kro na chichie o Tafun Nyiɛkpɔɔ wre yiɛ, imi na u yo o pan kre, kre kie ti mbe u yiɛ shɔ o na.