Yɛlɛ Kɔɔnashin Wo Kre
15
Yɛlɛ kɔɔnashin nyukɔɔrɔ na kpan, e leele mblɛ pe e fɔɔlɛɛ li kre titi e pe kɛ. 2 Imi na ee ki pe yi kre, ndro ŋmba u u ŋmbrɔ Israel ndro jin swa kpan, u fun waa shia ki shɔ, ŋgi na hin? O Tafun wre nyjila ŋga nu u fɔlɔ tii na kee kre nyjila da. 3 Na fuŋu mu fɔlɔ li rɛ, mu jaa ki shɔ, la, mu ŋmbrɔ Israel ndro fɔlɔ ŋga u li kpan ti mu u kɛ.4 Na ki pan ma, ndro n wa e nu mbe shian tra ŋga e Tafun Nyiɛkpɔɔ wre e kaan mbe e sɛ wru na krɔyira yi kre nu, we e dwan titi, 5 na ee li e Tafun Nyiɛkpɔɔ wre kee na lɛɛ nunu ni, mbe le na ee taa mbra nyjɛ ni e kaan aŋga ŋga na wala. 6 E Tafun Nyiɛkpɔɔ wre we e dwan imi na u u nyu yo kre, a we ti e ta mbe waŋgrɛ tataara jin, la, yire wa jin plɛ pan. Ee jaŋga ta waŋgrɛ na, la, wa wa jaŋga ta yire na.
7 Na e wolo pre wa waa shian e chiɛ yire ka na, tra ŋga e Tafun Nyiɛkpɔɔ e kaan kre na kre, yaa shia ndrashelee li u na, ndee mbe e kɛ sheli u ŋgaa na. 8 La, e ti mbe e lɛɛ tna, mbe e u jin yira ŋga ki u shian kpan. 9 A yaashia jawala sisaa le na yɛlɛ ŋga nu pe leele fɔɔlɛɛ tii na kee kre dani, mbe e yire kre na mbe je kifun wre pan jaŋga na. Na ki pan ma, we nyɛni na e mɛɛ ni mbe o Tafun Nyiɛkpɔɔ yeeri, a ee pimi li. 10 E lɛɛ nunu tɛɛ e u ufun wre kɛ, yaa ki pe na krɔ ni. Kena na e lɛɛ nunu tɛɛ mu ufun wre kɛ kre, e Tafun Nyiɛkpɔɔ wre we e dwan e tnumu kro nu, na yira ŋga na ee kɛ taa kpan na. 11 Shianfɛɛnlɛ plɛ we pe tra kre nu nyjila kro nu. Kena ni yuu e pan na e na kɛ nyaari e na e wolo pre, na shianfɛɛnlɛ, na pɔlɛfɛɛnlɛ mblɛ pee wa tra kre nu kaan.
Imi Ki Fna E Tnu Pe
12 Na e ŋmbrɔ Hebrew ndro uyɛ tle e wa pan, na chlɔ wi o, na blɔ wi o, na u mu sumi yɛlɛ kɔɔnanu, yɛlɛ kɔɔnashin wo kre na, ki fna mu u wa mbe u sɛ finfin. 13 A na mu u wa kolo mbe u sɛ, maa shia ti u sɛ kɛ waara. 14 Lɛɛ wɔ mu u ŋga mu yurɛ mblɛ pee wa wa mu pan kre plɛ, yire na mu shɔlɔ nyjɛ yii wa mu shunshun, na mu mu sumi fɛɛri ndoo, imi na o Tafun Nyiɛkpɔɔ wre mu dwan mu da kre le mu ŋga yɛ. 15 E sɔɔnri na tinlɛ na lɛ yire Egypt tra nu, a e Tafun Nyiɛkpɔɔ wre na e wɔ wa, kre ki tia ndaa kre kee ŋga yuu e pan aŋga kre.
16 La, na mu tnu waa yo mu pan mbo, “Ni n na chaa mbe laa mu na,” ŋga u ŋu na mu sele wolo kori, a u tnimu nyu mu u ŋga ndra na, 17 kena damia tɛɛ mu tnu wre ndie mbra krɔ na mu ki vru, kena u kaari mu sumifun nyjila kro nu. Na tnichlɔ wi naa, u pe ma na. 18 Yaashia ti ki sheli mbe e ŋga na ee tnu wa kolo mbe u sɛ. Ŋgi na hin? Yɛlɛ kɔɔnanu ŋga u mu sumi kre, u tnumu ŋga u tun wɛ na mu ndro wru mbe u tnumu tun mbe mu u ŋga fɔtɔɔrɔ gbee shiin na. Na mu ki pe ma mu Tafun Nyiɛkpɔɔ wre we mu dwan yira ŋga mu na pini kro nu.
Yurɛ Mblɛ Pie Klu Se
19 E e mbaala, na e sikaala, na e nui bilɛ mblɛ pie klu mbe se kre wɔ e tɛɛ mbe pe pe o Tafun Nyiɛkpɔɔ wre wolo. Yaashia nui bilɛ mblɛ pe klu mu se pre wa tɛɛ mbe tnumu tun, a yaa shia mbaala bilɛ mblɛ pe klu mu se pre yooro knumu. 20 Na yɛlɛ da kpan, yire na e sele wolo e sɛ pe gbo e ka o Tafun Nyiɛkpɔɔ wre yiɛ, lawee ŋga u wɔ mu tɛɛ kre nu. 21 La, na yurɔ wre wa fuuru, ndee na u n na nyaa, ndee na yaa u yaa na fumnɔ kre, yaa shia u tɛɛ mbe sra wɔ mbe o Tafun Nyiɛkpɔɔ wre ŋga. 22 Ee jaa pre yurɛ pre nyini gbo mbe kan e chiɛ yire na. Ndro ŋmba u n pe cheche paala kolo na, na ŋmba u pe cheche kro, pie jaa yurɛ pre ka, imi na e safiun, na kafaa kaara kaa kre. 23 La, yaa shia pe nyimi yire ka, e yi kna e wo tra na nyumu e kna mu wo.