Klɛntroble Lie
16
E na o Tafun Nyiɛkpɔɔ Klɛntroble yire lii Abib nyiɛpɔ kre nu. Ŋgi na hin? Abib nyiɛpɔ kre nu wra e wɔ mu yili Egypt tra nu blee. 2 Na ki da, yurɔ ŋmba ni ee Klɛntroble sra kre wɔ wre fna mbe pe nuu, ndee mbɔɔ, ndee sugbɔ, a lawee nunu chom ŋga o Tafun Nyiɛkpɔɔ wre wɔ mbe e na u sumi wa kre, bawa ki fna mbe e sɛ sra kre wɔ. 3 Yaashia paanu ŋga nu pe yiisi le ka. E paanu ŋga nu yiisi n wa ka ble kɔɔnashin, nyjɛ yɛ e na ka nyjila ŋga nu e naa fiɛlɛ mbe yili Egypt tra nu kre, e yire paanu nyjɛ nyini mɛɛ tɛɛ kanyana nyjila paanu. Yie ti ble nyjɛ ee li kro nu mbe e na nyjila ŋga ni e na yili Egypt tra nu kre sɔɔnri. 4 Wa waashia ti pe yiisi nya u pan e tra kre kro nu yire ble kɔɔnashin yire nu. Yurɔ ŋmba ni ee sra kre wɔ ble ŋga ki yiɛklu kre yila kɔŋgɔ kre, yaashia ti mbe nyiŋge se u kaara kre ka na.5 Yaashia klɛntroble sra kre wɔ chiɛ nyjɛ e Tafun Nyiɛkpɔɔ e ŋga yire ka na, 6 fɔna lawee ŋga we wɔ mbe u mɛɛ tni wa kre chiin nu. Bawa ki fna mbe e Klɛntroble sra kre wɔ yilakɔŋgɔ, na yila to, kre nyjila kre nu e na yili Egypt tra nu. 7 E kaara yire sɔɔ e yi ka lawee ŋga e Tafun Nyiɛkpɔɔ wɔ kre nu. Na nyiŋge waa se bnimi mbe e ndru mbe sɛ e yonyi nyinyi yire lawee. 8 Ble kɔɔnanu ee paanu ŋga nu yiisi n wa ka, kɔɔnashin wo kre nu mbe e pan mbe fni e Tafun Nyiɛkpɔɔ wre yiɛ, a ki ble kre ndro wa tnumu tun.
Yirɛ Kun Nyjila Ble Lie
9 Mu yire ŋga ble ee brɔfiɛn taa shɔlɔ na mbe yi kun kre, e yire kre ble kre na e ble tɔɔnri e sɛ su kranu kɔɔnashin ble na. 10 Ki ble kre, e shɔlɔ kun nyjila ble kpɔɛ yire li e o Tafun Nyiɛkpɔɔ wre ŋga, mbe e e chaara sra wɔ mbe u ŋga, dwamu ŋga o Tafun Nyiɛkpɔɔ wre e dwan kre ee le, mbe ki sra wɔ mbe u ŋga. 11 Mbe e yɛshɔɔrɔ kpɔɔ li o Tafun Nyiɛkpɔɔ wre yiɛ, lawee ŋga we wɔ mbe u Mɛɛ tni wa kre nu. Yire na e bibilɛ, na e bichiɛlɛ, na e letaala chiɛlɛ na bilɛ, na Levi leele, na fumblɔ mbe pe yiri waŋgra ka nu mu pan mu tni e nu, na bijile, na lekuchiɛlɛ mblɛ pee wa mu tni e nu kro ni. 12 E sɔɔnri na tinlɛ na lɛ yire Egypt tra nu, kena e dɔɔta na ee li yire mbra nyjɛ na.
Asɛkɛ Ble Lie
13 Na e waa shɔlɔ kun mu yi ble shunshun na mu kɔ, maa tre sɛnyi kun mu ble e simi fɛɛri ndoe yire nu mu kɔ kre, mbe e Asɛkɛ ble kpɔɛ yire li ble kɔɔnashin ni. 14 E ti mbe e yiɛ shɔ ble kpɔɛ lie yire nu, yire na e bibilɛ, na e bichiɛlɛ, na e letaala chiɛlɛ na bilɛ, na Levi leele, na fumblɔ mblɛ pe yiri waŋgra ka nu mu pan mu tni e nu, na bijile, na lekuchiɛlɛ mblɛ pee we mu tni e nu kro ni. 15 E yire ble kpɔɛ yire li na ble kɔɔnashin ni e e Tafun Nyiɛkpɔɔ wre ŋga, lawee ŋga we wɔ mbe tɛɛ kre nu. Ŋgi na hin? E Tafun Nyiɛkpɔɔ wre e kɛ nyu tnumu kro dwan, mu e dwan e yirɛ kun nyjila kre nu, mbe ki ti e yɛshɔɔrɔ ta poŋgo.
16 Yɛlɛ nyini kpan, ki fna mbe bilɛ pre kro pan lawee ŋga o Tafun Nyiɛkpɔɔ wɔ mu tɛɛ kre nu, mbe paan sra wɔ u yiɛ mbe u ŋga. Ble kpɔɛ lie nyjɛ nu e n na yiisi paanu kaa kre, na shɔlɔ kun nyjila ble kpɔɛ lie yire, na asɛkɛ ble kpɔɛ lie yire nu kre, ndro ŋmba we na paan o Tafun Nyiɛkpɔɔ yiɛ kpan, u n fna mbe pan kɛ waa. 17 Ndro ŋmba we na paan yirɛ ni mbe o Tafun Nyiɛkpɔɔ ŋga kpan, u imi Nyiɛkpɔɔ u dwan mu da le mbe yi wɔ.
Kprakunfɛɛnlɛ Wɔɔ
18 E kprakunfɛɛnlɛ, na loplombo wɔ e jlom yire nu chiɛ nyjɛ o Tafun Nyiɛkpɔɔ we e ŋga yire kro na, mbe pra kpra kuun kpra kolo na. 19 Pia shia kpra fɛɛlɛ, ndee mbe lewo yiɛ le. A pia shia dɔli yira shɔ. Ŋgi na hin? Na kachiŋu dɔli yira shɔ kre, kie jaa u yiɛ tɔ mbe wa kpra nya mbe yo, mbe jaa ti lewo ŋmba u fraka nyu gbli kpra yo haa. 20 E fraka kpra kuun nu nyjila kro nu, mbe ki ti e ŋmaa ta mbe tni tra ŋga e Tafun Nyiɛkpɔɔ wre e kaan kre nu.