2 Na blɔ, ndee chlɔ wa mu tni e nu e chiɛ nyjɛ o Tafun Nyiɛkpɔɔ wre e ŋga yire ka na, a e u nya na u sisam pini e Tafun Nyiɛkpɔɔ wre yiɛ na, mu na u nyu nunu ŋga u pe na e ni kre klai, 3 na kee ŋga u pini kre ni mbra yire taan, na sɛɛ yiɛ ufun wre sɛ suulo mu ki sumi, ndee na yila, ndee na nyiɛpɔ, ndee na wɔɛlɛɛ ufun wre sɛ sumi, 4 a ndro waa pan mu ki yo e pan kre, kena ki fna e kee kre lam wie chichie. Na ki waa pan na yɛŋgɛ yi, a dansiɛfun wa kee ŋga u pe kre na yɛŋgɛ na u kre afuŋgo kee ŋga nyini pe Israel leele nu kre, 5 kena e wre ndro wre u kre sisam kee kre nyini pe wre yii e yili na u ni chia kre jlonwee nyu na, e u waari dnɛ ni e u gbo. 6 Dansiɛfɛɛnlɛ shiin, ndee taarɛ nyu kee na ee jaa yire mbe lewo gbo, la, yaashia yire ndro nunu dansiɛrɛ kee chiin na mbe ndro gbo. 7 Dansiɛfɛɛnlɛ pre pe klu mbe u waari dnɛ ni tun, mbe leele hamblɛ pre chiin u waari na dnɛ ni mbe gbo, mbe ki ti kre sisam kre yili e nu.

8 Na ki pan na pe pan na kala shelee ni e kala li ndoo, a ki sheli mu e ŋga na ee ki kpra kun, na linku kee yi o, ndee na wa na u ŋmbrɔ pe ta kala ka na o, ndee na kakrɔ kee yi o, e sɛ na ki ni lawee ŋga e Tafun Nyiɛkpɔɔ wre we wɔ mbe praa u sumi kre nu. 9 Mbe e sɛ na kee kre ni Levi srawɔfɛɛnlɛ pre, na kpra kunfun ŋmba uu wa kre nyjila kre nu kre pan, e pe wie, pie kala kre li mbe e ŋga. 10 Jawala ŋga pie e ŋga kala kre na lawee ŋga o Tafun Nyiɛkpɔɔ wre wɔ kre nu wa kpan, e ki wru ma. E dɔɔta na ee li ŋga pie yo e pan kro na. 11 E taa mbra nyjɛ pie e nyina, na jawala ŋga pie e ŋga kre na kolo kro na. Yaashia kna mbe le kokoo ka na, mbe yiɛ wɔ kee nyjɛ pie yo e pan yire na. 12 Ndro ŋmba waa kpra kunfun, ndee srawɔfun ŋmba u yire o Tafun Nyiɛkpɔɔ yiɛ na sɔfum tnumu tuni wre le fiɛ kre fna mbe e u gbo. Ki fna e kre sisam kre nyini wɔ mbe yili Israel leele nu. 13 Na ki pan ma ndro kro we ki loo mbe fiɛ, mbe ndro wa pe wa le fiɛ ma na.

14 Na e waa le tra ŋga e Tafun Nyiɛkpɔɔ e kaan kre nu, a e waa ki wru mu tni mu kɔ, a e waa yo mbo, “E ti mbe o ŋunu cha oyɛ, mbe o pe na waŋgrɛ nyjɛ yi fɛ mu o kun ŋga lɛ kre,” 15 kena e dɔɔta na ŋunu ŋmba e Tafun Nyiɛkpɔɔ we wɔ, wre ee wɔ. Ŋunu wre fna mbe pe e wolo pre wa. Yaashia fuŋu ŋmba u yiri waŋgra ka nu mu pan mu tni e nu, a u n pe Israel ndro tɛɛ e ŋunu. 16 Ŋunu wre n fna mbe soolo cha nɛɛrɛ uyɛ pan, ndee mbe ti leele pre ndru mbe sɛ Egypt tra nu soolo nɛɛrɛ pan. Ŋgi na hin? O Tafun Nyiɛkpɔɔ yo e pan na, “Yaa shia ndru mbe sɛ wa na.” 17 A waashia leŋge nɛɛrɛ, na kre ma kie ti u laa Nyiɛkpɔɔ kro, a waa shia swafiŋge, na swanyiɛ cha nɛɛrɛ mbe ble.

18 Na waa pan mu jɔɔn kre li, ki fna mbe wre titi mbra yire shɔ Levi srawɔfɛɛnlɛ pre pan, mbe yi nyunɔ hlɛ na mbe tɛɛ uyɛ pan. 19 Mbra yire fna mbe pe u pan, a ki fna wraa yi tɔɔnri ble nyjɛ we li kro nu, mbe ki ti u tuan mbe chin, mbe u Tafun Nyiɛkpɔɔ wre fiɛ, mbe dɔɔta na we taa u kee nyjɛ u yo mbra yire nu kre kro na. 20 Kre kie ti mbe wa uyɛ le na u wɛ u wolo pre na, mbe jaa li mbra yire na imi na ki fna. Na u pe ma, kena wre na u nɔɔ leele we ŋunumu li Israel leele nu mbe mu.