Deuteronomy 18

Yirɛ Nyjɛ Srawɔfɛɛnlɛ Pre//Fna Mbra Taa

Levi leele mblɛ lɛ srawɔfɛɛnlɛ pre, pre na pe jlom leele pre kro n fna mbe tra, ndee krɔyira ta na pe wolo Israel wolo pre lɛ. Sra yirɛ nyjɛ leele pre we na woni, na nyjɛ pie na sroi mbra o Tafun Nyiɛkpɔɔ kaan yire yɛ pie na taa. 2 Pe n wa na krɔyira ni na pe wolo hamblɛ pre lɛ, o Tafun Nyiɛkpɔɔ wre wi pe krɔyira, imi na wra nyu yo pe pan kre. 3 Na ndro pan mu sra wɔ na nuu, ndee mbɔɔ ni kre, yurɔ wre kokoo ŋga ki fna mbe srawɔfɛɛnlɛ pre ta yi u pɔɔ, na u nyutan, na u lɛɛ. 4 Mbe e na pe kaan e seele yirɛ jle wee nyjɛ e woni yire, e shɔlɔ, na simi gbɔ wee fɔnyi, na olive simi nyjɛ e taa yire, yire na e mbaala yooro jle nyjɛ ee na knumu yire. 5 Ŋgi na hin? O Tafun Nyiɛkpɔɔ wre u pre na pe nanae wɔ e jlom yire na, na pe yire mbra sɔfum tnumu tuni o Tafun wre mɛɛ nu nyjila kro nu.

6 Na Levi leele pre wa waa yili e chia yire ka na Israel tra nu, a ki tna u nyiɛ pan na we sɛ tni lawee ŋga o Tafun Nyiɛkpɔɔ wre wɔ mbe pra u sumi kre nu, 7 kena we jaa na sɔfum tnumu kre tuni u Tafun Nyiɛkpɔɔ wre mɛɛ ni, imi na u wolo Levi leele mblɛ pee wa wa kre sumi o Tafun Nyiɛkpɔɔ wre yiɛ wa kre. 8 Yirɛ nyjɛ pe taa wa kre kro wre na pre fna mbe yi yɔ mbe yila, hali na ki pan na u sele wolo sro nyjɛ pe taa prɛ na u chese yi swa ŋga ki fna u ta.

9 Na e waa le tra ŋga e Tafun Nyiɛkpɔɔ wre e kaan kre nu, yaa shia afunyi yirɛ nyjɛ waŋgrɛ nyjɛ yii wa wa yire pini yire le mbe yi tuan. 10 Yaa shia ti mbe pe wa nya e nu na u u biblɔ, ndee bichlɔ tɛɛ mu sra wɔ mu u sro, ndee mbra chlɛ, ndee mbe pe kɔmfoɔ, ndee mbra dobodobo woni, ndee mbe tiprɛm li, 11 ndee mbra kabrɛ poo, ndee mbra gboolo yeeri. 12 Ŋgi na, e Tafun Nyiɛkpɔɔ wre leele mblɛ pe yire kee nyjɛ pini kre fun, yire afunyi kee nyjɛ na e Tafun Nyiɛkpɔɔ wre yila mbe yire waŋgrɛ yire ni e yiɛ. 13 Ki fna mbe yire na e Tafun Nyiɛkpɔɔ wre lalaa fniŋge.

Nyiɛkpɔɔ Keenyanyofun Wre Paan

14 Waŋgrɛ yire e shie mbe sɛ shɔ mbe tni kre, pe leele chilɛ, mu kɔmfoɔrɔ shɔ mu li. La, yire rɛ, e Tafun Nyiɛkpɔɔ wre n e ŋga kolo na e pe ma. 15 E Tafun Nyiɛkpɔɔ we keenyanyofun wɔ e nu mbe u pe na mi wi, yire titi ndro wi. Wre pan ki fna e ndie tɛɛ.

16 Ŋgi na hin? Kre kee ŋga e na o Tafun Nyiɛkpɔɔ wre tali, nyjila ŋga ni e na da nyua Sinai na, mna fni titɛɛ mna yo Nyiɛkpɔɔ pan mbo, “Maa ti mbe o mu mana loo, ndee mbe mu kanhun kpɔɔ kre nya na, na kre ma oo ku.”

17 A o Tafun Nyiɛkpɔɔ na yo ni pan mbo, “Kee ŋga pe yo kre nyu, 18 mbe keenyanyofun wɔ pe nu mbe u pe na ŋu wi, pre titi ndro wi, mbe ni ni kee le u nyu na, mbe u kee nyjɛ mbe yo u pan kro yo pe pan. 19 Ndro ŋmba u n ndie tɛɛ ni kee nyjɛ keenyanyofun wre we yire ni mɛɛ na mbe yo na kre, mi titi we ufun yeeri mbe u kee ŋga ki tia u n ndie tɛɛ kee yire na nyu wɔ. 20 La, na keenyanyofun ŋmba we uyɛ pe na ni mɛɛ ni u paara, a mi ma ni kee ka yo u pan na u ki yo kre, ndee na keenyanyofun wa waa sɛɛn ka mɛɛ tɛɛ mu paara kre, ki fna e u gbo.”

21 Ee jaa na yuu eyɛ pan na, “Mni oo pe mbe chin na kre kee ŋga o Tafun Nyiɛkpɔɔ wre pan ma ki yiri hin?” 22 Na kee ŋga keenyanyofun wre yo o Tafun Nyiɛkpɔɔ wre mɛɛ ni kre nsra pe ma, ndee mu pe kpra, e chin na kre kee kre o Tafun Nyiɛkpɔɔ wre ma u ki yo. Kre keenyanyofun wre u jawala ni u paara, yaa shia u fiɛ.