Fɛnkaari Chiɛ Yire
19
Na e Tafun Nyiɛkpɔɔ wre waa waŋgrɛ nyjɛ leele trɛ we e ŋga pre kla, a e waa pe chiɛ, na pe kalonyi wru mu tni kre, 2 kena e chiɛ taarɛ le e wɔ, e le na yie to tra ŋga e Tafun Nyiɛkpɔɔ e kaan mbe e wru mbe tni kre lalaa. 3 Mbe e tra ŋga e Tafun Nyiɛkpɔɔ e kaan na krɔyira yi kre yɔɔlɛ taarɛ, mbe kooloe wɔ mbe sɛ yi na, kena na ki pan na ndro wa ndro gbo kre, we jaa fɛ mbe sɛ yi ka na. 4 Na ki pan na ndro u ŋmbrɔ gbo, a tuwi ma u tuwi, ndee mu jawala fɔɔn ka le na u ni fa, a u fɛ mu sɛ chiɛ yire ka na mbe ŋmaa li kre, 5 kee ka nyi na, aada ndro na u tnifun sɛ nyaa kejenyi cha haa, a u gbana viŋge mbe tiŋge chan to, a gbana bie kre foli mu sɛ u ŋmbrɔ wre fɔɔri a u to mu ku. Na ki pan ma, wre ndro wre we jaa fɛ mbe sɛ yire chiɛ yire ka na mbe ŋmaa li. 6 Na chiɛ yire haa waa le le, a wa na linkufun wre kɔŋgɔ nini mbe u gbo mbe fɔlɔ tɔ kre, we u ta mbe yii mbe u gbo mbe fɔlɔ tɔ, nyjila ŋga ni ki n fna mbe wra u gbo. Ŋgi na hin? Na tuwi ma u tuwi mu u ŋmbrɔ wre gbo, a u ŋmbrɔ wre kee sisaa ka n wa u jawala nu fa. 7 Kre ki tia ndaa yuu e pan na e yire kakpɔɛ taarɛ yire wɔ e tɛɛ eyɛ pan.8 Na e Tafun Nyiɛkpɔɔ wre waa tra ka shɔ mu ya e pan, imi wra da mna yo e tolɛɛlɛ pan, mu e ŋga tra ŋga nyu wra yo na we pe ŋga kre, 9 a e le mu li mbra nyjɛ kee ni yuu e pan aŋga ŋga, mbe e Tafun Nyiɛkpɔɔ wre kori, mbe nyaari u kolo na nyjila kro nu kre mbe ti mbe e kakpɔɛ taarɛ wɔ na mbe ya jle wee yire na kre. 10 E ki pe ma, mbe ki ti pia na leele kuu e tra kre nu finfin, tra ŋga e Tafun Nyiɛkpɔɔ e kaan na e krɔyira yi kre, na e ki pe ma pia e gbun na linkuuro pimi ni.
11 La, na ndro waa u ŋmbrɔ pra, mu sɛ ja lawee ka nu mu u shie mu u gbun yira ni mu gbo, maa fɛ mu sɛ yire chiɛ yire ka na, 12 u chia loplombo pre pe ti mbe pe sɛ u yii chia kre na mbe pan, mbe pe u wru mbe le ŋmba u u chaa mbe gbo mbe fɔlɔ tɔ kre kɛɛ mbe u u gbo na. 13 Yaa shia u fooro le, ki fna e mblɛ pe leele kuu hakɛ na kre sisam kre nyini wɔ mbe yili Israel leele nu, mbe ki ti mbe kee kro nyu mbe e ŋga.
14 Wa waa shia dnɛ ŋga fawolo tɛɛ mu sam gbun ndro na u ŋmbrɔ lalaa kre flo ki titɛɛ, e krɔyirɛ nyjɛ e ta tra ŋga e Tafun Nyiɛkpɔɔ wre e kaan mbe e wru mbe tni kre nu.
Dansiɛfɛɛnlɛ Kee
15 Yaa shia yire ndro nunu dansiɛrɛ kee na, mbe lewo gbun na pimi ni sisaa ŋga u pe na, la, ki fna e yire leele shiin, ndee taara dansiɛrɛ kee na, mbe chiin lewo gbun pimi ni. 16 Na wa kafinɛ dansiɛrɛ li mu wa taan kre, 17 leele pre kro shiin pe sɛ yire o Tafun Nyiɛkpɔɔ wre yiɛ lawee ŋga u wɔ mu tɛɛ kre nu, srawɔfɛɛnlɛ pre na kprakunfɛɛnlɛ mblɛ pee wa kre nyjila kre nu pre yiɛ, 18 mbe kprakunfɛɛnlɛ pre kala kre lamu le chichie, na ki waa pan na kala dansiɛlifun wre fnɛ, mu dansiɛrɛ waa li mu u ŋmbrɔ wre taan kre, 19 kena kee ŋga ee na ŋmba na u kala fnɛ mu taa wre pe kre, e kafinɛ dansiɛlifun wre pe ki yi. Mbe ki ti e kre sisam kre nyini wɔ mbe yili eyɛ nu. 20 Na ki pe ma leele pre hamblɛ we ki loo mbe fiɛ, a ndro waa kre sisam kre nyini ka pe e nu na. 21 Yaa shia ndro fooro le. Na ndro u ŋmbrɔ gbo, e u gbo ka e fɔlɔ tɔ, na wa u ŋmbrɔ nyini ja, e u wo ja ka e fɔlɔ tɔ, na wa u ŋmbrɔ ŋgaala gbun mu kɔ, e u wo gbun e kɔ ka e fɔlɔ tɔ, na wa u ŋmbrɔ kɛ kun, e u wo kun ka e fɔlɔ tɔ, na wa u ŋmbrɔ jele kun, e u wo kun ka e fɔlɔ tɔ na.