Ŋunɔ Wiire Kee
20
Na e sɛ ŋunɔ mbe sɛ wi na e loŋgoolo ni, a e waa pe soolo, na pe soo kɛɛ, na pe wifɛɛnlɛ nya a pe nɛɛ mu wɛ e wolo na kre, yaa shia pe fiɛ. Ŋgi na hin? E Tafun, e Nyiɛkpɔɔ wre wra e wɔ mu yili Egypt tra nu wree wa mu ya e na. 2 Na ki pan na e chaa mbe sɛ ŋunɔ kre, srawɔfun wre fna mbe yiri mbe pan mbe yire ŋunɔwifɛɛnlɛ pre yiɛ mbe paara mbe pe nyina. 3 Kee nyjɛ ki fna u yo yi kre, “Israel leele e loo, aŋga e shie ŋunɔ mbe sɛ wi na e loŋgoolo ni. Yaa shia pe fiɛ, ndee mbe ti e gbun yɔ, ndee mbe seeri, ndee mbe ti tutom wo e na pe yiɛ. 4 Ŋgi na hin? E Tafun Nyiɛkpɔɔ wre, yire na wre e shie, mbe u sɛ wi na e loŋgoolo ni mbe e ŋga, a ee wi mbe yili.”5 Ŋunɔwifɛɛnlɛ pre loplombo pre pe ŋunɔwifɛɛnlɛ pre wie na, “Ndro waa wa e nu mu katoo fɔŋgɔ sin a u n ta mu tni ki nu tun ra? Na waa wa ma kena e ti mbe ufun ndru mbe sɛ katoo. Na kre ma, na waa sɛ to ŋunɔ, lefuŋu we u katoo kre nyu nyaa. 6 Ndro waa wa e nu mu afoo see pe, a ufun n ta mu yi yɛ kun mu li tun ra? Na waa wa ma, kena e ti ufun ndru mbe sɛ katoo. Na kre ma na u sɛ to ŋunɔ, ndro fuŋu we sɛ u see kre wru mbe li. 7 Ndro waa wa e nu, mu chlɔ shɔ mbe leŋge, a u n ta mu u leŋge tun ra? Na waa wa ma, kena e ti ufun ndru mbe sɛ katoo, na kre ma na u sɛ to ŋunɔ, lefuŋu we u chɔ wre wru mbe leŋge.”
8 Na ŋunɔwifɛɛnlɛ pre loplombo pre paara mu da wa pe wie na, “Ndro waa wa e nu na fiɛ, a u gbun na yɔɔlɛ u na ree? Na waa wa ma e ti mbe ufun ndru mbe sɛ katoo, mbe ufun wre wa kɔɔ ti fiɛrɛ u ŋmbilɛ hamblɛ pre yii na.” 9 Na loplombo pre waa paara leele pre pan mu kɔ kre, mbe pe leele mblɛ pie na yiɛ klu ŋunɔwifɛɛnlɛ pre pan wɔ.
10 Na e shie mbe sɛ wi na kakpɔɔ ka leele ni kre, e klu e sɛ na wejinyiŋge kee ni pe pan. 11 Na pe waa ki nɔɔloo, maa pe jlonwee nyu krɔɛ nyaa e pan, kena leele mblɛ pee wa chia kre na kro fna e pe yii mbe praa tnumutuni e pan jaŋga na. 12 La, na chia kre leele waa je, a pe nsra na wejinyiŋge chaa na e ni kre, maa na chaa mbe wi na e ni kre, e chia kre fɛ e kun. 13 Na e Tafun Nyiɛkpɔɔ wre waa chia kre le e kɛɛ kre, e chia kre bilɛ gbo peii. 14 La, pe chiɛlɛ, na pe biile, na pe yurɛ, na yirɛ nyjɛ yii wa chia kre na kro, e jaa yi foolo mbe ta. A e loŋgoolo pre yirɛ nyjɛ e Tafun Nyiɛkpɔɔ wre we ti e foolo yire kro e wee yi. 15 Kakpɔɛ nyjɛ haa yi le na e ni, a yi n mbra tra ŋga nu e shie mbe tni kre nu kre, kre kolo ŋga na ki fna mbe e tro na pe ni.
16 La, na e waa wi mu kakpɔɔ ka ja tra ŋga e Tafun Nyiɛkpɔɔ e kaan kre nu kre, e le na ee ki leele na, ki yurɛ kro gbo peii. 17 E Hittite leele, na Amora, na Canaan leele, na Perizzite leele, na Hivite leele, na Jebusite leele pre kro peii, yaashia wa ti imi na e Tafun Nyiɛkpɔɔ wre na ki yo e pan kre. 18 Na kre ma, pie e nyina afunyi kee nyjɛ pe pini, na pe sɛɛnlɛ sumiɛ kee yire. A na ki pan ma, kena e sisaa pe mu e Tafun Nyiɛkpɔɔ wre taan.
19 Na e waa chia ka fɛ mu kun a ki mu, a e na chaa mbe wi mbe chia kre shɔ kre, yaa shia gbana tɛɛ mbe ki tinyi chile mbe wo. Ŋgi na hin? Ee jaa na yi sɛnyi kuun mbra lii. E loŋgoolo ma tinyi yire, kena yaashia yi chile mbe wo. 20 Aada ee na kɛɛ chaa mbe yire yi na mbe nduu chia kre mboo na mbe le ki na mbe wi mbe ki ja. Na ki pan ma, e tinyi nyjɛ yia jaa sɛ yire knumu, e nduu yi na, e le, e sɛ wi, e chia kre shɔ.