Deuteronomy 21

Na Ndro Linku Mu Fɛ,//Sra Ŋga Pe Woni

Na ki pan na, pe gboo nya nyaa lam tra ŋga e Tafun Nyiɛkpɔɔ wre e kaan mbe e sɛ tni kre nu, a e n chin ndro ŋmba u u gbo kre, 2 e loplombo pre, na e kprakunfɛɛnlɛ pre pe sɛ yire mna gboo wre nyi mu sni kre, mbe lawee kre kra mbe sɛ su chiɛ nyjɛ yi mbra wa kro na. 3 Kena chia ŋga ki mbra mna gboo wre nyi mu sni kre loplombo fna mbe napɔlɔ ŋmba pe n da mu tɛɛ mu tnumu tun, ndee mu fali na u ni tun wɔ. 4 Mbe loplombo pre nuu wre wru mbe sɛ na u ni lafolo ŋga nu nyumu nyi, a ki n da mu kɔ, a pe n da mu ki landɛɛ fali mu yirɛ luu ki nu tun nu. Na pe da landɛɛ kre nu mbe pe napɔlɔ wre yulɔ ka wa. 5 Ki fna mbe Levi bibilɛ srawɔfɛɛnlɛ pre sɛ wa ka. Ŋgi na hin? Pre e Tafun Nyiɛkpɔɔ wre wɔ mbe pra sɔfum tnumu tuni, mbe o Tafun Nyiɛkpɔɔ wre mɛɛ tɛɛ mbra dwamu kaan, mbra kakrɔɛ na leele lalɛɛ kaalɛɛ lii. 6 Kena loplombo mblɛ pee wa chia ŋga ki mbra mna gboo wre nyi mu sni kre kro fna mbe sɛ pe kɛnyi je mbe wo napɔlɔ ŋmba yulɔ pe ka landɛɛ kre nu wa wre na, 7 mbe yo na, “O n chin ndro ŋmba gboo nu, a ŋga ki pini o n ki nya. 8 Kena o Tafun Nyiɛkpɔɔ yurɔ ŋmba ni o mu leele Israel wolo ndra loni wi kre, u shɔ, ŋu mna pe shɔ, kena maa pe gbun na pimi ni ndro ŋmba pe gbo mu wa finfin ŋga ndra na.” 9 Kena na e kee ŋga e Tafun Nyiɛkpɔɔ wre chaa pe ma kre, yaa lewo ŋmba pe gbo mu wa finfin wre kumu pini li na.

Na Pe Chiɛlɛ Yii Ŋunɔ

10 Na yire na e loŋgoolo waa wi, a e Tafun Nyiɛkpɔɔ wre waa pe le e kɛɛ a e pe ja, maa pe plɛ yii mu pan e chia kre, 11 na e wa waa chlɔ chichie nya leele mblɛ e yii pre nu, a u kee niŋge ni u pan, ufun we jaa chlɔ wre wru mbe leŋge. 12 Na ki pan ma, ufun u u wru u sɛ u katoo, mbe ti u u ndra klu, mbe u kajinyi knumu, 13 mbe u u yonyi nyjɛ ni pra u yii yire chinɛ u na, mbe u tni u katoo wa mbe u lɛ, na u lo nyɛni nyiɛpɔ nyu na, na kre tro, kena u chin mbe da u na, mbe u wru mbe pe u chɔ. 14 A na ki kɔ mu pan na blɔ wre yiɛ n shɔ chlɔ wre na kre, u ti mbe u sɛ mna u chaa. Waa shia u prɛ, a waa shia u pe na tnu wi, ŋga u u chin chlɔ kre ndra na.

Bijlo Krɔ Lie

15 Na blɔ waa chiɛlɛ shiin leŋge, maa nunu kori mu wɛ nunu na, a chiɛlɛ pre kro shiin waa bibilɛ se mu u ŋga, a u biblɔ jlo waa pe chlɔ ŋmba u n kori wre pɔ kre, 16 na ki waa da na blɔ wre u krɔyirɛ yɔɔlɛ mbe tɛɛ u bibilɛ pan kre, waa shia yirɛ nyjɛ ki fna u pɔ lopom wre ŋga yire wru mbe chlɔ ŋmba u chaa wre biblɔ wre ŋga, mbe chlɔ ŋmba u n kori wre pɔ ŋmba wi lopom titi wre ti. 17 Ki fna mbe blɔ wre chin na chlɔ ŋmba u n kori wre biblɔ wre wi u pɔ lopom, a imi we u krɔyirɛ yire yɔɔlɛ mbe u biile ŋga mbe da kpan, ki fna mbe u u biblɔ lopom wre ŋga ma gbee shiin.

Pɔ Ndikaŋu Kee

18 Na ki pan na blɔ waa wa na biblɔ ndikaŋu ŋmba u yirii na u lo, na u lɛ taanla, a na pe u ndie tinii wa li pe kee na kre, 19 u lo na u lɛ pe u yii mbe sɛ na u ni chia loplombo pre fnihaa wa chia kre jlonwee nyu na. 20 Mbe sɛ yo pe pan na, “O biblɔ wi kre, a u pe ndikaŋu, mu na yirii na o taanla. Wa li o nyu kee na, sasamfun na gbɔgbɔɔ wi,” 21 Kena mbe chia kre bilɛ kro u waari dnɛ ni mbe gbo, ki fna e kre sisam kre nyini wɔ mbe yili eyɛ nu. Na ki pan ma Israel leele pre kro we ki loo mbe fiɛ.

22 Na ndro sisam kpɔɔ pe, a pe u gbun pimi ni, mu u gbo mu sɛ u hlu tiŋge na kre, 23 yaashia ti mbe nyiŋge u gboo kre se tiŋge kre na, e le na ee u le ki ble kre lam. Ŋgi na hin? Lewo ŋmba pe hlu tiŋge na kre, Nyiɛkpɔɔ suŋgɔ ki u yii. A ki n fna tra ŋga e Tafun Nyiɛkpɔɔ wre e ŋga krɔyira kre, mbe e ki tɔ nɛɛrɛ ni.