5 Chlɔ waa shia bilɛ yirɛ le, a blɔ waa shia chiɛlɛ yirɛ le. Ŋgi na hin? E Tafun Nyiɛkpɔɔ wre lewo ŋmba u yire kee yire pini wre fun.

6 Na mu hanyini nya zeere nu kolo mbɛɛ na, ndee na tiŋge na yi o, ndee na tra lam yi o, a uu wa mu sni u chrɛwɛ na, ndee mu juule u biile na kre, maa shia lo wre na biile pre chaa mbe wɔ. 7 Mu jaa u biile pre, ndee chrɛwɛ yire wɔ, la, le na mu lo wre wa mbe u sɛ, mbe ki ti mbe kee kro nyu mbe mu ŋga, mbe mu ŋmatitnɔmu ta.

8 Na wa katoo fɔŋgɔ sin, u ki ndra gbun lahoo, mbe buŋgo sin mbe ki jenu fɛ mbe kun, mbe ndro wa kɔɔ kun ki na mbe to mbe ku, mbe ki nyuŋgo kre ndra kla.

9 Maashia yirɛ nyini shiin chaa mbe luu mu afoo see, na mu pe ma, yirɛ nyjɛ mu luu kre, na yi sɛnyi yire kro we pe nɛɛrɛ yirɛ.

10 Wa waa shia kaan nunu le bubnɔ, na nuu na, mbe fali na pe ni.

11 Wa waa shia yoŋgo ŋga pe mbayooro na kɔdɔli jese tɛɛ mu tin tɔ.

12 E jese pe zɔmbaara, e yi fra e mbra e dodonyi jenu jijirɛ yire na.

13 Na blɔ waa chlɔ wru mu leŋge, maa sni na u ni mu kɔ, mu nya na u n na u chaa, 14 maa chlɔ wre ndra kla, maa u ŋga mɛɛ sisaa mbra yuu na, Ndaa chlɔ ŋmba leŋge, la, ni nsra u da chlɔ kre, 15 kena chlɔ wre lɛ, na u lo fna mbe yili na bijɔ wre na u plɔ wre sni yira ŋga nyimi mana kre ni fimi na, mbe sɛ na ki ni chia kre loplombo pan chia kre jlonwee nyu na, mbe ki pe dansiɛrɛ li na bichable wre n kla.

16 Mbe bichable wre lɛ yo chia loplombo pre pan na, Ni ni bichlɔ wru mu blɔ ŋmba ŋga a u u leŋge, la, fuŋgaami ŋga u n na u chaa. 17 A u ni pɔ wre ndra kla mu yo na, Ni n mu pɔ wre da chlɔ, u kla. La, ni bichlɔ wre dansiɛrɛ yira ŋga ki nyina na u n kla yi kre. Kena pɔ wre lo, na u lɛ wre, pe blɔ wre na u chɔ wre sniyira ŋga yi dansiɛrɛ yira kre wɔ chia kre loplombo pre yiɛ na. 18 Na ki pan ma, loplombo pre fna mbe bichable wre plɔ wre yii mbe sɛ u ndie tini. 19 A ki fna mbe pe u prɛ mbe swafiŋge lafaa shɔ mbe bichable wre lɛ wre ŋga. Ŋgi na hin? Blɔ wre mɛɛ sisaa taa Israel bichable ŋmba u n blɔ chin na. A ki fna mbe bichable wre pe blɔ wre chɔ, ki n fna u u je mbe hɛ su u kumu ble.

20 La, na ki pan na kee ŋga blɔ wre yo mu taa chlɔ wre na kre pe kpra, a pe n dansiɛrɛ yira ka ta mu nyina na bichable wre nyu kre, 21 kena pe sɛ bichable wre yire u lɛ katoo jlonwee nyu na, bawa ki fna mbe chia kre bilɛ u waari dnɛ ni mbe gbo. Ŋgi na hin? U nyifɛɛrɛ kee pe Israel na, mu tni u lɛ katoo mu tiɛri. Ki fna e kre sisam ŋga nyini wɔ mbe yili eyɛ nu.

22 Na e blɔ wa nya a u sni na u ŋmbrɔ chɔ ni kre, blɔ ŋmba u chlɔ wre cha wre, na chlɔ wre kro fna mbe e pe gbo. Ki fna e kre sisam ŋga nyini wɔ mbe yili eyɛ nu.

23 Na ki pan na pe bichable ŋmba u n blɔ chin wru mu blɔ ŋga mbe u u leŋge, a blɔ wa u fni chia na, maa u yii mu sɛ u cha, 24 e pe kro shiin pre yii, e sɛ na pe ni chia kre jlonwee nyu na, e pe waari dnɛ ni e gbo. Ŋgi na hin? Chlɔ wre naa wa chia lam, a u nsra gble le mbe pe pan mbe u shɔ, a blɔ wre, wre blɔ fuŋu chɔ kla. Ki fna e kre sisam ŋga nyini wɔ mbe yili eyɛ nu.

25 La, na pe bichable wru mu blɔ ŋga mbe u u leŋge, a blɔ wa sɛ u yii mu u cha nyaa jaŋga na, blɔ ŋmba u kre kee kre pe wre chiin ki fna pe gbo. 26 Pia shia bichable wre pe yaka. Ŋgi na hin? U n sisaa pe a ki fna mbe pe u gbo. Pan kre kee ŋga nyi to na ndro u ŋmbrɔ tɔ mu u gbo. 27 Ŋgi na hin? Blɔ wre, nyaa lamu u u nya, kie jaa pan na bichable ŋmba pe wru mu blɔ ŋga mbe u u leŋge kre gble le, a ndro n wa wa mbe u shɔ.

28 Na ki pan na blɔ bichable ŋmba u n blɔ chin nya, a pe n u wru mu blɔ ŋga mbe u u leŋge, a blɔ wre waa u cha jaŋga na, a pe u yii kre, 29 ki fna mbe blɔ wre swafiŋge fuloe shiin na kɛ tɔ mbe bichable wre lɛ ŋga, mbe bichable wre wru mbe leŋge. Ŋgi na hin? Wre u bichable wre kla. Blɔ wre wa jaa u je, hali mbe sɛ su u kumu ble.

30 Blɔ waa shia u lɛ chɔ wru mbe leŋge, mbe u lɛ yiɛ le nyumu.