Ŋmba U N Fna Nyiɛkpɔɔ Leele Nu
23
Blɔ ŋmba pe san, ndee ŋmba fɛŋgɛ pe kun mu wa n fna mbe chaa o Tafun Nyiɛkpɔɔ wre leele nu pe fni haa.2 Chlɔ ŋmba pe n leŋge paala kolo na pɔ, ndee u nanae n fna mbe chaa o Tafun Nyiɛkpɔɔ wre leele nu pe fni haa, hali mu sɛ su u nana jelijae kɛ wolo na.
3 Ammon ndro, ndee Moab ndro, ndee pe nanae n fna mbe chaa o Tafun Nyiɛkpɔɔ leele nu pe fni haa, hali mu sɛ su pe nanae jelijae kɛ wolo na. 4 Ŋgi na hin? Ŋga e na yili Egypt na na paan kre, pe nsra pan mu e fni na paanu na nyumu ni, a pra Beor pɔ Balaam ŋmba wra yiri Pethor kakpɔɔ ŋga kraa wa Mesopotamia tra nu kre wru swa na, mbe u pan mbe e sun. 5 La, e Tafun Nyiɛkpɔɔ wre nsra ndie tɛɛ Balaam pan, a wra suŋgɔ kre kaari dwamu mu e ŋga. Ŋgi na hin? E Tafun Nyiɛkpɔɔ wre e kori. 6 Yire na pre waa shia yira ka, mbe ki ti e nɔɔlɔ wru na pe ni, hali mbe sɛ su e kumu ble.
7 Yaashia Edom ndro fun. Ŋgi na hin? E sele ndro wi. A yaa shia Egypt ndro fun. Ŋgi na hin? E na pe fumblɔ pe tra nu. 8 Pe nana jelijae mblɛ pie se kre, we na chaa e nu lawee ŋga nu o Tafun Nyiɛkpɔɔ wre leele fnii kre nu.
Tnimu Cheche
9 Na e fni mbe sɛ wi na e loŋgoolo ni kre, e le na ee eyɛ wɔ nɛɛrɛ yirɛ kro nu. 10 Na e leele pre wa waa uyɛ nya na u n pe cheche. Ŋgi na hin? U sni mu yiri mu da na u wejiŋge pan, kena ki fna u yili e tni haa wa mbe sɛ tni mbɛɛ ka na. 11 La, na yila waa na koo, mbe u weli, na yila waa to mbe u chiin pan e tnihaa wa.
12 E lawee ka le e tnihaa kre mbɛɛ na, mna ee na shie kaan na. 13 E wee tuu yira cha e chaa e yirɛ nu, kena na ndro chaa mbe sɛ kaan na, mbe u wee tuu, na u sɛ kaan kre na mu kɔ mbe u ki tɔ. 14 Ŋgi na hin? E Tafun Nyiɛkpɔɔ paan na e le e tnihaa wa na kɛ toni e na, mbe e loŋgoolo yii mbe le e kɛɛ. Kena e tni haa wa kre fna mbe pe cheche, mbe wa kɔɔ yira fɔɔn ka nya wa, mbe ki ti u krɔ kna mbe wa e na.
Mbra Nyininyini
15 Na tnu fɛ mu pan mu e kaari, yaa shia u yii mbe sɛ u tafun ŋga. 16 E ti u tni mbe chaa e nu, lawee ŋga u chaa, na chia ŋga u chaa kpan na, yaashia na u fiŋge.
17 Israel blɔ, ndee chlɔ n fna mbe pe sɛɛn nyuŋgo tiɛrifun. 18 Na chlɔ tiɛrifun, ndee blɔ tɛtiɛrɔɔ tiɛri mu yaka ta, waa shia sɛ na ki ni, e Tafun Nyiɛkpɔɔ wre katoo, mbe paan ki tɛɛ mbe nyu suŋgɔ wɔ. Ŋgi na hin? E Tafun Nyiɛkpɔɔ wre yire kepele yire fun.
19 Na mu mu ŋmbrɔ Israel ndro jin swa, ndee sro, ndee yaka, maa shia nyumu le ki nu. 20 La, na e fuŋu jin yira ee jaa nyumu le ki nu, la, e ŋmbrɔ Israel ndro pan ma, mbe ki ti e Tafun Nyiɛkpɔɔ wre e dwan yira ŋga na ee kɛ taa kpan na, tra ŋga e shie mbe sɛ wru mbe tni kre nu.
21 Na e nyu suŋgɔ ka wru e Tafun Nyiɛkpɔɔ wre ni, yaa shia na ble koni mbra teeri ki na. Ŋgi na hin? Kolo kro na e Tafun Nyiɛkpɔɔ we e wie ki yi fɔlɔ, a na ki pan ma ee sisam pimi li. 22 La, na e n nyu suŋgɔ wru, yaa pimi li. 23 Kee ŋga kie yili e nyuu kpan ki fna e le na ee ki pe. Ŋgi na hin? Yire titi e e nyu nyaa mu nyu suŋgɔ wru na e Tafun Nyiɛkpɔɔ wre ni.