Leŋgeere Jeere Na Leŋgeere Shiinwo
24
Na blɔ chlɔ leŋge, mu kɔ mu kee ka nya u na, a ki tia u yiɛ n shɔ u na, a waa jeere hlɛ nyunɔ mu chlɔ wre ŋga, mu u ni mu yili u katoo, 2 na chlɔ wre waa yili katoo wa, maa sɛ blɔ fuŋu wru mu leŋge, 3 a ki waa pan na u kee nsra tna u plɔ shiinwo wre pan, a waa jeere hlɛ nyunɔ mu u ŋga, maa u ni mu yili u katoo, ndee na blɔ wre u ku mu chlɔ wre ti, 4 kena u plɔ jle wo wre wra klu mu u je wre n fna mbe ndru mbe chlɔ wre wru mbe leŋge na, ŋga chlɔ wre pe nɛɛrɛ ndro kre ndra na. Kre kee kre pe afuŋgo yira e Tafun Nyiɛkpɔɔ wre yiɛ na. Yaashia kre sisam ŋga nyini pe tra ŋga e Tafun Nyiɛkpɔɔ wre e kaan na e krɔyira yi kre nu.Mbra Nyininyini
5 Na blɔ wa u chɔ leŋge fɔŋgɔ, yaa shia ti mbe u sɛ ŋunɔ, a yaa shia tnumu ka sembremu le u kɛɛ, ki fna u tni katoo yɛlɛ nunu, mbe u chɔ ŋmba u leŋge wre yiɛ shɔ.
6 Yaashia tre dnɛ shiin wru, ndee mbe ki nyjeeri wo laa kple mbe sɛ tle fɔlɔ nyu na. Ŋgi na hin? Pan ki nyi na mu lewo ŋmaa tle fɔlɔ nyu na.
7 Na e ndro nya a u u ŋmbrɔ Israel ndro ju, mu sɛ na u fiŋge na tnu wi, ndee mu sɛ u prɛ, ki fna e ŋmba u u ju wre gbo. Ki fna e kre sisam kre nyini wɔ eyɛ nu.
8 E yiranyiɛrɛfun dɔɔ ta e nu, e le na ee u pe imi na Levi srawɔfɛɛnlɛ pre we yo. E dɔɔ ta na ee taa kee nyjɛ ni yo pe pan yire na. 9 E sɔɔnri kee ŋga e Tafun Nyiɛkpɔɔ wre na pe Miriam na kolo, nyjila ŋga nu e na yili Egypt tra nu na paan kre.
10 Na e ŋmbrɔ yaka jin e pan, yaashia sɛ le u katoo mbe sɛ yira ŋga u chaa mbe tle yira kre titɛɛ kre shɔ. 11 Na ki pan ma, yire fimi na, mbe ndro ŋmba mu jin yira wre titi yili fimi na yira ŋga u chaa mbe tle mu pan kre ni mbe paan mu ŋga ki yi. 12 Na ndro wre pe shianfun, maa shia ti mbe yira ŋga we tle mu pan kre nyiŋge se mu pan. 13 Na yoŋgo u tle mu pan, na yila waa kɔ, ki ndro mu sɛ u ŋga, mbe u ki ta mbe tɔ mbe sni. Na ki pan ma, we mu ŋga mboo, a o Tafun Nyiɛkpɔɔ we kre kee kre le na kee ŋga ki fraka u yiɛ yi.
14 Yaa shia shianfun, ndee foorofun wru tnumu nu, mbe u le na shianfun wi ndra na, mbe u pe imi na ki n fna, na e ŋmbrɔ Israel ndro wi o, ndee na fuŋu ŋmba uu wa mu tni e chiɛ yire ka na wi o, yaa shia u pe ma. 15 Ble nyini fuu ŋga e u fɔlɔ tɔ, mbe yila chin mbe to. Ŋgi na hin? Shianfun wi, a kre na u kaan mu tnumu kre tun, na kre ma, we nyɛni mbe o Tafun Nyiɛkpɔɔ yeeri, mbe ki ti mu sisam pimi li.
16 Na biile sisaa pe, yaa shia pe lɛɛlɛ gbo biile pre sisam tlo, ndee na lɛɛlɛ sisaa pe, mbe e biile gbo pe lɛɛlɛ pre sisam tlo. Ndro kro fna mbe ku wre titi sisam tlo.
17 Yaa shia fuŋu, ndee bijro le mbe u kala li imi na ki n fna, ndee mbe lekuchɔ yoŋgo shɔ u pan mbe tle u fɔlɔ nyu na. 18 E sɔɔnri na tinlɛ na lɛ yire Egypt na, a e Tafun Nyiɛkpɔɔ wre na e shɔ mu yili wa. Kre ki tia ndaa yuu e pan na e na kre kee ŋga pini.
19 Na e yirɛ kun see, a yirɛ yire yɛ waa kro see wa, mbe jaa yaa, yaa shia ndru mbe sɛ yi shishia na. E yi ti fuŋu, ndee bijro, ndee lekuchɔ pan, mbe ki ti e Tafun Nyiɛkpɔɔ e tnumu kro dwan. 20 A na e e olive tinyi sɛnyi yire kun gbee nunu mu wo, yaa shia ndru mbe sɛ yi sɛnyi nyjɛ yie kro tinyi yire na yire shishia na. E nyjɛ yie kro wa yire ti fuŋu, na bijro, na lekuchɔ pan. 21 Na e tre sɛnyi kun e afoe seele nu, yaashia ndru mbe sɛ yi tinyi yire shishia na. E nyjɛ yie kro wa yire ti fuŋu, na bijro, na lekuchɔ pan. 22 E sɔɔnri na tinlɛ na lɛ yire Egypt na, kre ki tia ndaa yuu e pan na e kre kee ŋga pe.