25
Na leele shiin ta peyɛ na, pe fna mbe sɛ kala kre ni kala lihaa, mbe kprakunfɛɛnlɛ pre kala kre le mbe ki kpra kun, ŋmba wo ki tna kre mbe pe u wa, mbe ŋmba wo ki n tna wre gbun pimi ni. 2 Na ŋmba u pimi li kre fna pe u gbun kre, kalalifun wre fna mbe ti u sni mbe juule tra, mbe pe u frɔ fwa ni kalalifun wre yiɛ na, sisam ŋga u pe kre pie le mbe u gbun ki fwɛ nyu. 3 La, ki n fna mbe u ti pe u gbun mbe wɛ fwɛ fuloe shiin na. Na u waa tia pe u gbun mu wɛ ma na, kena pe ndro wre yiɛ le nyumu leele yiɛ na.4 Nuu ŋmba u shɔlɔ mbru kre, yaa shia u nyu pɔ.
Na Lɛ Pɔ Ku Mu Chlɔ Ti
5 Na lɛbiile bilɛ plɛɛ wa mu tni titɛɛ, a pe wa waa ku mu u chɔ ti na u n biblɔ se u na, u lekuchɔ wre waa shia sɛ leŋge fimi na, mbe u plɔ wre sele ti. U plɔ wre chunu, ndee u nyjɔ u chlɔ wre wru mbe leŋge, mbe u pe imi na ki fna u u lɛ pɔ lekuchɔ pe mbe da. 6 Biblɔ ŋmba we klu mbe se wre, gboo wre mɛɛ na ki fna pe u tɛɛ, mbe ki ti mbe u mɛɛ wa fun Israel leele nu. 7 La, na lɛpɔ waa wa, a u n na chaa mbe u lɛpɔ chlɔ ŋmba u ku mu ti leŋge, kena chlɔ wre u sɛ loplombo pre pan chia kre jlonwee nyu na, mbe sɛ yo pe pan na, “Ni plɔ lɛpɔ je, a u n na chaa mbe u lɛpɔ mɛɛ kro Israel leele nu. U n na chaa mbe ŋga ki fna u pe mbe ni ŋga na u lɛpɔ lekuchɔ wi mi kre pe.” 8 Na ki pan ma kre, chia kre loplombo fna mbe blɔ wre yeeri mbe paara mbe u nyina. Na u waa je maa yo mbo, “Ni n na u chaa mbe leŋge,” 9 lekuchɔ wre fna mbe sɛ u pan chia kre loplombo pre yiɛ na, mbe chlɔ wre blɔ wre kpawrɛ nunu wɔ u jele na, mbe tɛɛnrɛ hlu mbe wo u yiɛ na, mbe yo na, “Kee ŋga ki fna mbe pe ndro ŋmba u n na chaa mbe u lɛpɔ nɔɔ leele ta pe yi kre.” 10 Wre blɔ wre, mɛɛ ŋga ni pie u nɔɔ leele chin Israel leele nu yi, ŋmba kpawrɛ nunu pra wɔ u jele na wre katoo leele.
11 Na bilɛ shiin tuni, a nunu chɔ sɛ u plɔ shɔ haa u ŋmbrɔ wre kɛɛ, maa kɛ wa maa sɛ blɔ ŋmbaa wre fɛŋgɛ, na u liɔwɛ yii na tini kre, 12 yaa shia chlɔ wre fooro le, e u kɛ chieri e wa.
13 Yaa shia dnɛ nyjɛ ni e yirɛ kra na prɛ yire cha nyini shiin, mbe ti nunu sna, mbe wɛ nunu na. 14 A yaa shia yirɛ nyjɛ ni e yirɛ kra na prɛ yire cha nyini shiin, mbe ti mbe ka kpɔɔ mbe wɛ ka na. 15 E ti mbe dnɛ na yirɛ nyjɛ ni e yirɛ kra na prɛ yire yila, mbe e na kpra lii, mbe ki ti e ŋmaa tnu tra ŋga e Tafun Nyiɛkpɔɔ wre e kaan kre nu. 16 Ŋgi na hin? E Tafun Nyiɛkpɔɔ wre lewo ŋmba u yire kee nyjɛ pini, a wraa kpra li yi nu kre fun.
E Amalek Leele Pre Gbo
17 E sɔɔnri kee ŋga Amalek leele na pe e na kolo, ŋga e na yili Egypt tra na na paan kre. 18 Nyjila ŋga nu e na fna mna pra kre, pra pan mna yire e kro mna e tɔ, mna e wolo mblɛ pra kro tɔ kre gbo peii, pe nsra Nyiɛkpɔɔ fiɛ. 19 Ki tia na e Tafun Nyiɛkpɔɔ wre waa tia e wuu e loŋgoolo mblɛ pe e fɛ mu kun kre kɛɛ tra ŋga u e kaan na e krɔyira yi kre nu, e Amalek leele pre nɔɔ pɔ e flo tra yiɛ na, mbe ndro wa pe sɔɔnri na. Yaashia ki fɛɛ.