4 Srawɔfun wre we kakɛɛ kre shɔ mu kɛɛ, mbe sɛ ki tɛɛ e Tafun Nyiɛkpɔɔ wre sragbunu kre yiɛ. 5 Kena ŋu titi nyu nyaa mbe yire e Tafun Nyiɛkpɔɔ wre yiɛ na mbe yo na, “Aramean ndro na wi ni lɛ, a wraa kila na tro, u nsra titɛɛ ta mbe tni, a wre na u leele chiɛri plɛ na sɛ Egypt na mna sɛ tni wa, mna kɔ mu kaari waŋgra kpɔɔ, mna nɛɛ, mna faŋga ta. 6 La, Egypt leele pre na o fiŋge, mna tia o na kala nya, mna tia o naa kpain tnumu tuni jaŋga na. 7 A o na nyɛni mna o Tafun, o lɛɛlɛ Nyiɛkpɔɔ wre yeeri, a o Tafun Nyiɛkpɔɔ wre na o nyɛnɛɛ loo, mna o fooro lie kre, na o kanyana, na fiŋgee ŋga praa o fiŋge kre nya. 8 Ki tia o Tafun Nyiɛkpɔɔ wre na u jaŋga kpɔɔ tɛɛ mna o wɔ mu yili Egypt na wa, wra fiɛrɛ kee, na kawako kee, na kekpɔɛ pe wa, 9 mna pan na o ni lawee ŋga nu, mu o ŋga tra ŋga ki nyu mu tna ŋga nu. 10 Kena fuŋgaami ŋga ni pan na ni see yirɛ jle nyjɛ ŋu o Tafun Nyiɛkpɔɔ wre ni ŋga yire ni.” Kena mu kakɛɛ kre tɛɛ e Tafun Nyiɛkpɔɔ wre yiɛ, mbe kosie kan u yiɛ.

11 Mbe ŋu na Levi, na fumblɔ mblɛ pee wa mu tni e nu kre yɛshɔɔrɔ li, yirɛ chichiele nyjɛ o Tafun Nyiɛkpɔɔ wre ŋu na mu katoo leele ŋga kre ndra na.

12 Na maa mu yirɛ nyjɛ mu yɔɔlɛ kɛ mbe nunu wɔ yire wɔ yɛlɛ taarɛ wo ŋga nu ki fna e yi wɔ kre nu kre, mbe mu sɛ Levi ndro, ndee fuŋu, ndee bijro, ndee lekuchɔ ŋga yi yi, mbe ki ti pe yi ta mbe li e chiɛ yire na mbe yɔɔ. 13 Kena mu yo o Tafun Nyiɛkpɔɔ wre pan na, “Yirɛ cheche nyjɛ ki fna ni wɔ yire, ni yi wɔ ni katoo, mu sɛ Levi ndro, na fuŋu, na bijro, na lekuchɔ ŋga yi yi, imi na mna yo kre. Ni n krɔ kna mu wa kee nyjɛ mna yo yire na, a ni n yi ka fɛɛ. 14 Nyjila ŋga ni ndaa nyɛni kre, ni nsra yire cheche yirɛ nyjɛ ki fna ni wɔ yire ka wɔ mu ka, ndee mna yi ka wru nyjila ŋga ni ni nsra pe cheche kre, ndee mna yi ka tɛɛ mu sra wɔ mu gboolo ŋga. Ni li ni Tafun Nyiɛkpɔɔ wre nyu kee na, a kee ŋga mu yo ni pe kro ni ki pe. 15 Yire mu cheche ndoo ŋga nu mu nyi mu tni nyjeeri kre nu mu o le, mu mu leele Israel wolo pre dwan, kre na tra ŋga mu o ŋga kre, imi na mna mu nyu yo mna da mna o tolɛɛlɛ ŋga, na mu o ŋga tra ŋga ki nyu mu tna kre.”

16 Aŋga ble ŋga, e Tafun Nyiɛkpɔɔ wre yo na e li u mbra yire kro na, ki tia e dɔɔta na ee e lolonyi, na e nyiɛ kro tɛɛ mbe taa yi na. 17 Aŋga yire titi nyu nyaa mu yo na, o Tafun wre, na e Nyiɛkpɔɔ wi, a ee nyaari u kolo na, mbe u mbra yire yii kɛ shiin, mbe li yi na. 18 Aŋga o Tafun Nyiɛkpɔɔ wre tia e loo na u leele lɛ yire, a u krɔ wolo lɛ yire imi na wra u nyu yo kre, a ki fna e li kee nyjɛ u yo yire kro na. 19 U tia e loo na we e yire nyjeeri, mbe e ŋga mɛɛ, na buuro kpɔɔ mbe wɛ waŋgrɛ nyjɛ u wa yire leele kro na, a ee pe leele mblɛ e pe cheche mu e Tafun Nyiɛkpɔɔ wre ŋga, imi na wra u nyu yo kre.