Deuteronomy 27

Nyiɛkpɔɔ Mbra Yire Kee

A Moses na Israel loplombo pre na yo leele pre pan mbo, “E li mbra nyjɛ ni e kaan aŋga ble ŋga nu ŋga kro na. 2 Na e waa Jordan lɔɔ kre kun mu le tra ŋga e Tafun Nyiɛkpɔɔ wre e kaan kre nu, e dnɛ badɛnyi yɛ cha e yi yire sholo, mbe e yi wlɔ mbe yi fniŋge. 3 Mbe e mbra yire nyunɔ yi na, ŋga ble ee lɔɔ kre kun mbe le tra ŋga ki nyu mu tna, a e Tafun Nyiɛkpɔɔ wre na e kaan ki yi kre nu, imi na wra ki yo e lɛɛlɛ pan kre. 4 Na e waa Jordan lɔɔ kre kun, e yire dnɛ yire yire sholo nyua Ebal na, imi na ni yuu e pan aŋga ŋga, mbe e yi wlɔ mbe yi fniŋge. 5 E dnɛ yɛ tɛɛ e sragbunu sin wa e e Tafun Nyiɛkpɔɔ wre ŋga. Yaashia tɔɔnrɔ tɛɛ mbe ki pe. 6 E nyaalam dnɛ chiin yoori e tɛɛ e kre sragbunu kre sin, e o Tafun Nyiɛkpɔɔ wre ŋga, mbe e yirɛ sro ki na mbe u ŋga. 7 Mbe e wejinyiŋge sra wɔ wa, mbe e yi ka mbe yɛshɔɔrɔ li e Tafun Nyiɛkpɔɔ wre yiɛ. 8 Mbe e mbra yire kro nyunɔ chiriri dnɛ nyjɛ e yire mu yire sholo yire na.”

9 A Moses na Levi srawɔfɛɛnlɛ pre na yo Israel leele pre kro pan mbo, “Israel leele, e pieri, e ndie tɛɛ e loo. Fuŋga e pan mu pe e Tafun Nyiɛkpɔɔ wre leele titi. 10 Kena e li e Tafun Nyiɛkpɔɔ wre mbra nyjɛ ni e kaan aŋga ble ŋga nu ŋga na.”

Suŋgɔ Na Ndikana

11 Ki ble kre lam chɔɔ Moses na yo leele pre pan na, 12 na e waa Jordan lɔɔ kre kun, Simeon sele, na Levi sele, na Judah sele, na Issachar sele, na Joseph sele, na Benjamin sele yire pe sɛ yire nyua Gerizim na mbe dwan mbe leele pre ŋga. 13 Mbe Reuben sele, na Gad sele, na Asher sele, na Zebulun sele, na Dan sele, na Naphtali sele, mbe pre sɛ yire nyua Ebal na mbe sun. 14 Kena mbe Levi leele pre yire kee nyjɛ yo mana kpɔɔ ni, mbe leele pre kro yi loo.

15 “Ndro ŋmba we yira tɛ mbe ki pe sɛɛn, ndee mbe yira nya mbe ki pe sɛɛn kpan, suŋgɔ we u yii. Lewo kɛ nyu yira ŋga we pe mbe ki ndra mbra ki sumi kpan o Tafun Nyiɛkpɔɔ ki fun,” Kena leele pre kro yo, “Ami!”

16 “Ndro ŋmba we u lɛ, ndee u lo yiɛ le nyumu kpan, suŋgɔ we u yii.” Kena leele pre kro yo, “Ami!”

17 “Ndro ŋmba we wre na u ŋmbrɔ lalaa sam dnɛ flo ki titɛɛ kpan, suŋgɔ we u yii.” Kena leele pre kro yo, “Ami!”

18 “Ndro ŋmba we fuun yii kaan na mbe ti u fun kolo na kpan, suŋgɔ we u yii.” Kena leele pre kro yo, “Ami!”

19 “Ndro ŋmba wa na chaa mbe kpra yo mbe fuŋu, ndee bijro, ndee mbe lekuchɔ ŋga kpan, suŋgɔ we u yii.” Kena leele pre kro yo, “Ami!”

20 “Ndro ŋmba we sni na u lɛ chɔ ni kpan, suŋgɔ we u yii. Ŋgi na hin? Ufun u lɛ yiɛ le nyumu.” Kena leele pre kro yo, “Ami!”

21 “Ndro ŋmba we yurɔ yii mbe cha kpan, suŋgɔ we u yii.” Kena leele pre kro yo, “Ami!”

22 “Ndro ŋmba we sni na u jaa ni kpan, na u lɛ pɔ wi o, na u lo pɔ wi o, suŋgɔ we u yii.” Kena leele pre kro yo, “Ami!”

23 “Ndro ŋmba we sni na u nafun chlɔ ni kpan, suŋgɔ we u yii.” Kena leele pre kro yo, “Ami!”

24 “Ndro ŋmba we ju mbe u tnifun gbo kpan, suŋgɔ we u yii.” Kena leele pre kro yo, “Ami!”

25 “Ndro ŋmba we dɔli yira shɔ mbe ti pe ndro gbo finfin kpan, suŋgɔ we u yii.” Kena leele pre kro yo, “Ami!”

26 “Ndro ŋmba wa mbra kee nyjɛ yii kɛ shiin, mbe li yi na kre, suŋgɔ we u yii.” Kena leele pre kro yo, “Ami!”