4 Ble kpɔɛ lie nyjɛ ni le mu tɛɛ, na yi nyjila da mbe e yi kee kpali. 5 O Tafun Nyiɛkpɔɔ Klɛntro ble yire lie nɔɔhle yi nyiɛpɔ jlewo kre ble kɛmbɔjijirɛ ble na yilakɔŋgɔ. 6 Ble nyjɛ nu pe n naa yiisi paanu kaan yire we nɔɔhle nyiɛpɔ kre ble kɛmbɔkunɔ ble kre na. Kena ble kɔɔnashin, ki n fna mbe e paanu ŋga nu yiisi nyi ka. 7 Ble ŋga ki yiɛklu kre nu ki fna mbe e fni mbe ni sumi, a ndro waashia tnumu tun. 8 Yire ble kɔɔnashin yire nu e na yurɛ sroo sra woni e na mi e Tafun Nyiɛkpɔɔ wre kaan. Ble kɔɔnashin wo kre na chɔɔ mbe e ndru mbe fni mbe ni sumi, a ndro waashia tnumu tun.”

9 O Tafun Nyiɛkpɔɔ na yo Moses pan mbo, 10 “Yo Israel leele pre pan, na e waa le tra ŋga ni shie mbe e ŋga kre nu, a e waa e shɔlɔ kun, ki fna e sɛ srawɔfun ŋga yi pɔmu jle yire. 11 Mbe u yi tɛɛ mbe yirɛ viŋge sra wɔ mbe o Tafun Nyiɛkpɔɔ wre ŋga. Srawɔfun wre fna mbe yirɛ yire viŋge ble ŋga ki taa Wuuble kre na kre nu, na u yi pe ma kena mbe sra kre shɔ. 12 Ŋga ble we yirɛ yire viŋge kre chɔɔ na ki fna e yurɛ sroo sra kre wɔ mbe o Tafun Nyiɛkpɔɔ wre ŋga na mbɔɔ pɔ ŋmba u da yɛlɛ nyu, a u na fumnɔ ni. 13 Mbe e paanu mimi ŋga snamu kie da kradnɛ jijirɛ cha, mbe olive simi chaa ki nu, mbe yi sro sragbunu kre na mbe mi e Tafun Nyiɛkpɔɔ wre ŋga. Kre sra kre ndiom tna Nyiɛkpɔɔ pan. Mbe simi gbɔwo kɔtua na yɔɔ ya yi na. 14 Yaa shia shɔlɔ fɔnyi ka bibre, ndee na kla wee yi o, ndee na paanu pe yi tɛɛ mu fɔ o, fɔna ŋga ble ee pan na yɛ ni mbe paan Nyiɛkpɔɔ ŋga tun. Yire mbra nyjɛ fna mbe e nanae kro taa yi na lawee ŋga nu pie tni kpan nu, nyjila kro nu.

15 Wuuble kre ble ŋga ki taa ki na kre, ble ŋga na e paan shɔlɔ pɔwee yire na sra woni kre, e yire kre ble kre na e tɔɔnri kranu kɔɔnashin. 16 Na e yire Wuuble kre nyisee na mu ble yire tɔɔnri, yie hɛ to ble fuloe shiin na kɛ, kena e ndru mbe shɔlɔ fɔnyi tɛɛ mbe sra wɔ mbe e Tafun Nyiɛkpɔɔ wre ŋga. 17 Ki ble kre, sele nunu leele fna mbe paanu shiin pe, mimi ŋga snamu ki da kradnɛ jijirɛ ni ki fna pe paanu kre nunu pe, mbe yiisi le ki nu, mbe yi tɛɛ mbe shɔlɔ fɔnyi sra ŋga pe viŋge na o Tafun Nyiɛkpɔɔ kaan kre wɔ. 18 Kre nyjila kre chɔɔ, ki fna mbe Israel leele pre kro pan na mbapilɛ pala kɔɔnashin mblɛ pe li yɛlɛ nununu, nablɛm nunu, na mbapilɛ shiin, mblɛ pe n na fumnɔ ni, mbe shɔlɔ sra yirɛ, na simi gbɔwo sra wɔ wo kre ya yurɛ pre na, mbe pe yurɛ pre tɛɛ mbe yurɛ sroo sra kre wɔ, mbe o Tafun Nyiɛkpɔɔ ŋga. Kre sra kre ndiom tna o Tafun Nyiɛkpɔɔ wre pan. 19 Mbe e ndru mbe kaplɔ tɛɛ mbe sisam sra wɔ, mbe mbaala shiin mblɛ pe da yɛlɛ nyu tɛɛ mbe wejinyiŋge sra wɔ. 20 Mbe srawɔfun wre paan mbaala shiin pre viŋge o Tafun Nyiɛkpɔɔ yiɛ mbe tɛɛ mbe yirɛ viŋge sra kre wɔ, yire na paanu nyjɛ pe shɔlɔ fɔnyi tɛɛ mu pe kre. Yi pe sra yirɛ cheche o Tafun Nyiɛkpɔɔ pan, a srawɔfɛɛnlɛ pre wee yi. 21 Kre ble kre chɔɔ na ki fna mbe e kro fni mbe ni sumi, la, ndro waashia tnumu tun. Yire mbra nyjɛ fna mbe e nanae mblɛ pie kɔɔ yiri mbakɔ pre na lii yi na, lawee ŋga nu pie tni kro nu.

22 Na e waa e shɔlɔ kun tra kre nu, yaa shia see jenu wee yire kun, a yaa shia ndru mbe yi yaa. E yi ti e shianfɛɛnlɛ, na fumblɔ pan. Mi wi e Tafun, na e Nyiɛkpɔɔ wre.”

23 O Tafun Nyiɛkpɔɔ na yo Moses pan mbo, 24 “Yo Israel leele pre pan na nyiɛpɔ kɔɔnashin wo kre ble ŋga ki yiɛklu nu, ki fna mbe e tni mbe wuu. Na pe waa bnɔɛ fɔ e pan, mbe fni mbe ni sumi sumi. 25 Ndro waa shia tnumu tun ki ble kre, mbe e yurɛ sroo sra wɔ mbe mi e Tafun Nyiɛkpɔɔ wre ŋga.”

26 O Tafun Nyiɛkpɔɔ na yo Moses pan mbo, 27 “Nyiɛpɔ kɔɔnashin wo kre ble kɛ na, kre ble kre yi e ndra lɔ ble. Ki n fna mbe e yaka le nyuu ki ble kre, mbe e yirɛ sroo sra wɔ mbe o Tafun Nyiɛkpɔɔ ŋga. Kena e fni mbe ni sumi. 28 Ndro waa shia tnumu tun ki ble kre, ŋgi na hin? Kre ble kre yi e ndra lɔ ble, kre nu e sra woni o Tafun Nyiɛkpɔɔ yiɛ mbe e sisam laa e na. 29 Na ndro n shia ble fun ki ble kre, wrefun wre wa jaa pe ni leele pre wa na. 30 A na ndro waa tnumu tun ki ble kre, mi e Tafun Nyiɛkpɔɔ wre we ufun wre gbo mbe yili leele nu. 31 Ndro waa shia tnumu tun kuraa ki ble kre. Yire mbra nyjɛ fna mbe e nanae mblɛ pie kɔɔ yiri mbakɔ pre li yi na, lawee ŋga nu pie tni kro nu. 32 Mu yire nyiɛpɔ kre ble kɔɔnanyjirɛ wo kre yilakɔŋgɔ, mbe sɛ su ki ble kɛ wo kre yilakɔŋgɔ, ki fna mbe ki pe e Wuuble, a ndro n fna mbe yaka le nyuu.”

33 O Tafun Nyiɛkpɔɔ na yo Moses pan mbo, 34 “Yo Israel leele pre pan na, nyiɛpɔ kɔɔnashin kre ble kɛmbɔkunɔ na, kre nu pie Nyiɛkpɔɔ Asɛkɛ ble kpɔɛ yire nɔɔhle, mbe sɛ yi nyu le ble kɔɔnashin ble na. 35 Ki ble ŋga ki yiɛklu kre na ki fna mbe e fni mbe ni sumi, a ndro waa shia tnumu tun. 36 Yire ble kɔɔnashin yire nu kro fna mbe e yurɛ sroo sra wɔ mbe mi e Tafun Nyiɛkpɔɔ wre ŋga. Ble kɔɔnatarɛ wo kre na chɔɔ, mbe e ndru mbe fni na mbe ni sumi, mbe yurɛ sroo sra kre wɔ mbe mi e Tafun Nyiɛkpɔɔ wre ŋga. Kre ble yire lie nyu we to, mbe e fni mbe ni sumi. Ndro waa shia tnumu tun.

37 Ble kpɔɛ lie nyjɛ Nyiɛkpɔɔ le mu tɛɛ, mbe e na fni yi nu mbra u sumi, mbra sro sra, na yurɛ sroo sra, na shɔlɔ sra, na yurɛ gboo sra, na simi woo sra. A ki fna mbe e na sra yire woni imi na ki fna ble yire kro nu. 38 Yire ble kpɔɛ lie yiree wa mu ya Wuuble kre lie na, a yire sra wɔɔ nyjɛɛ wa mu ya yirɛ nyjɛ yire titi we na kee yire na, yire na danyi sra, na yire titi chaara sra nyjɛ e woni na o Tafun Nyiɛkpɔɔ kaan kre.

39 Kena mu yire nyiɛpɔ kɔɔnashin kre ble kɛmbɔkunɔ na, na e e see yirɛ kun mu kɔ kre, kena e ble kpɔɛ yire li ble kɔɔnashin ni mbe o Tafun nyiɛkpɔɔ ŋga. Ble ŋga ki yiɛklu kre pe Wuuble, a ble kɔɔnatarɛ ble kre pe Wuuble na. 40 Ble ŋga ki yiɛklu kre nu, mbe e e tinyi sɛnyi chichiele yɛ knumu, mbe shuɛ klɛ knumu, na tinyi wrɛ ni, mbe yi tɛɛ mbe yɛshɔɔrɔ ble li mi e Tafun Nyiɛkpɔɔ yiɛ ble nununu kɔɔnashin. 41 Yɛlɛ nyini mbe e na yire ble kpɔɛ nyjɛ lii ble kɔɔnashin. Yire kee nyjɛ fna mbe e nanae mblɛ pie kɔɔ yiri mbakɔ pre na lii yi na, mbra ble yire lii nyiɛpɔ kɔɔnashin wo nu. 42 Yire ble kɔɔnashin yire nu, Israel leele pre kro fna mbe tni asɛkɛ nu. 43 Mbe ki ti mbe e nanae kɔɔ chin na e Tafun Nyiɛkpɔɔ wre na tia e na tni asɛkɛ nu, nyjila ŋga nu ndaa e wɔ mna yili Egypt tra nu kre. Mi wi e Tafun Nyiɛkpɔɔ wre.”

44 Kolo ŋga na Moses na tro mna o Tafun Nyiɛkpɔɔ ble kpɔɛ yire nyjila kpali Israel leele pre pan na yi kre.