Sra Wɔ Yirɛ Cheche Yire
22
O Tafun Nyiɛkpɔɔ na yo Moses pan mbo, 2 “Yo Aaron na u bibilɛ pre pan na, Israel leele pre sra cheche nyjɛ pe paan na woni na ni kaan yire, yaashia yi le yira waara, mbe ni mɛɛ cheche kre kla. Ŋgi na hin? Mi wi e Tafun Nyiɛkpɔɔ wre. 3 Yo pe pan na, hali mu sɛ su pe nanae mblɛ pie kɔɔ yiri mbakɔ, na wa waa le nɛɛrɛ nu paala kolo na, maa je mu da Israel leele pre sra cheche nyjɛ ni pe paan na mi e Tafun Nyiɛkpɔɔ kaan yire na, wrefun wre wa jaa sɔfum tnumu kre tun na. Mi wi e Tafun Nyiɛkpɔɔ wre. 4 Na yiranyiɛrɛ waa Aaron nanae pre wa yii, ndee na yira ka nyini ki yilii u blɛm nu, ndee na u da gboo na, ndee na blɛnyi yi woni u pan, kena u le nɛɛrɛ nu, waa shia sra sro cheche yire ka le nyuu. 5 Ndee na waa da yurɔ ŋmba u fulo tra mbe jaa u tɔ nɛɛrɛ ni, ndee ndro ŋmba we jaa u tɔ nɛɛrɛ ni, ndee yira ŋga kie jaa u tɔ nɛɛrɛ ni na kro, 6 ndro ŋmba we da yire yirɛ nyjɛ ka na kpan uyɛ tɔ na nɛɛrɛ ni, wa pe cheche mbe sɛ su yilakɔŋgɔ. A wa jaa sra sro cheche yire ka le nyuu, fɔna u weli tun. 7 Na yila waa to, kena nɛɛrɛ laa u na, kre we chiin jaa sra sro cheche yire ka le nyuu, ŋgi na hin? Sro ŋga ki fna u ta yi. 8 Srawɔfɛɛnlɛ pre waa shia yurɔ gboo, ndee yurɔ ŋmba yurɔ sisaa gbo mu wa ka, mbaa uyɛ tɔ na nɛɛrɛ ni. Mi wi e Tafun Nyiɛkpɔɔ wre. 9 Srawɔfɛɛnlɛ pre fna mbe li ni kee nyjɛ ni pe nyina yire kro na, mbe pia yi le kewɛɛ, mbaa pimi li mbe ku. Mi wi e Tafun Nyiɛkpɔɔ ŋmba ni e pe cheche.10 Srawɔfɛɛnlɛ pre sele leele pre chiin pee kolo ni na pie sra sro cheche yire ka. Ndro waa shia ka le nyuu, hali na ufun wree wa mu tni srawɔfun jaara, ndee na ndro ŋmba u wru wra tnumu tuni u pan wi. 11 La, na srawɔfun wre titi swa kun mu tnu lɔ, ndee na u katoo pe tnu wre se, tnu wre we jaa srawɔfun wre sro nyjɛ u taa yire yɛ ka. 12 Na srawɔfun bichlɔ waa sɛ blɔ ŋmba u n pe srawɔfun leŋge kre, pɔ chlɔ wre wa jaa sra sro cheche kre ka le nyuu. 13 La, na srawɔfun bichlɔ waa kaari lekuchɔ, ndee na u sɛ leŋge haa a pe u je, a biile n wa u pan, a u ndru mu pan mu tni u lɛ katoo, imi na wra nyi u bichabim nyjila kre, kena we jaa u lɛ sro ŋga u taa kre ka le nyuu. Ndro ŋmba u n fna mbe ka le nyuu wre waa shia ka le nyuu.
14 Na ndro waa punu mu sra sro cheche yire ka le nyuu, ki fna mbe u sro kre fɔlɔ tɔ. Pe sro kre le mbe ki ndrɔ ŋga ki fna na ki ni yɔ kunɔ, mbe u ki nunu tɔ mbe ya. 15 Srawɔfɛɛnlɛ pre waa shia Israel leele pre sra cheche nyjɛ pe woni na mi e Tafun Nyiɛkpɔɔ kaa yire le na yirɛ wɛɛ yi, 16 mbe ti mbe leele mblɛ pe n fna mbe yi ka pre yi ka, na kre ma, kie pan na pimi gbɔɔn, na ndie tiniɛ ni pe na. Mi wi e Tafun Nyiɛkpɔɔ wre, a ni sra sro yire pe cheche.”
Sra Wɔɔ Ŋga Nyiɛkpɔɔ Je
17 O Tafun Nyiɛkpɔɔ na yo Moses pan mbo, 18 “Yo Aaron, na u bibilɛ pre, na Israel leele pre kro pan na, na Israel leele pre wa, ndee na fuŋu ŋmba uu wa mu tni e nu pre wa pan na u yurɔ ni mbe yurɔ sroo sra wɔ mbe mi e Tafun Nyiɛkpɔɔ wre ŋga, ndee na daŋga yira wɔhaa u pan o, ndee na wre titi chaara sra wɔhaa u pan o, 19 yurɔ wre fna mbe pe nablɛm, ndee mbaplɔ, ndee kaplɔ ŋmba u n na fumnɔ, kre ndro wrefun sra kre we shɔ. 20 Ndro waa shia pan na yurɔ ŋmba u fumnɔ ni, na kre ma u sra kre wa shɔ. 21 Na ndro waa pan na yurɔ ni mbe wejinyiŋge sra wɔ mbe o Tafun Nyiɛkpɔɔ ŋga, a ki pe danyi nyjɛ u da sra, ndee na wre titi chaara sra yi kre, yurɔ wre n fna mbe pe yurɔ fumnɔ wo, kre u sra kre we shɔ. 22 Wa waa shia yurɔ ŋmba u fun nyiɛlɛ na, ndee ŋmba u fuuru, ndee ŋmba kokoo pe kun mu wa, ndee ŋmba na kla nyi, ndee ŋmba krukru yii, ndee ŋmba na klɛ bɛɛlɛ nyi ni mbe sro sra wɔ sragbunu kre na mbe mi e Tafun Nyiɛkpɔɔ ŋga. 23 Na ndro pan nuu ni, ndee mbɔɔ ni, a u kokoo ka klo, we jaa u tɛɛ mbe wre titi chaara sra wɔ, la, wa jaa u tɛɛ mbe daŋga ŋga u da sra wɔ. 24 Wa waa shia yurɔ ŋmba pe san tɛɛ mbe sra wɔ mbe mi e Tafun Nyiɛkpɔɔ wre ŋga. A wa waa shia kre kee kre pe e tra kre nu fio. 25 Ndro waashia wre yurɔ wre nyini shɔ fuŋu pan mbe u tɛɛ mbe sro sra wɔ mbe mi Nyiɛkpɔɔ ŋga. Na ki pan ma, mba sra kre shɔ, ŋgi na hin? Yurɔ wre fumnɔ.”
26 O Tafun Nyiɛkpɔɔ na yo Moses pan mbo, 27 “Nuu pɔ, ndee sugbɔ pɔ, ndee mbɔɔ pɔ ŋmba pe se fɔŋgɔ fna mbe kro u lo jaara ble kɔɔnashin. Mu yire ble kɔɔnatarɛ ble na na shie, pie jaa u tɛɛ mbe yurɔ sroo sra wɔ. 28 Yaashia nuu na u pɔ, ndee mbe mbɔɔ na u pɔ ŋmba u se fɔŋgɔ tɛɛ mbe sra wɔ ble nunu na.
29 Na wa chaa mbe mboo ŋgaa sra wɔ, u ki wɔ kolo ŋga na u sra kre we shɔ na. 30 Sra kaara kre fna mbe pe ki ka ki ble kre lam, nyiŋge n fna mbe ka se. Mi wi e Tafun Nyiɛkpɔɔ wre.”
31 O Tafun Nyiɛkpɔɔ na yo mbo, “E li ni mbra yire kro na. Mi wi e Tafun Nyiɛkpɔɔ wre. 32 Yaa shia ni mɛɛ cheche kre le fiɛn. Israel leele pre kro fna mbe chin na ni pe cheche. A mi wi e Tafun Nyiɛkpɔɔ ŋmba ni e pini cheche, 33 a mi ndaa e wɔ mu yili Egypt tra nu, mbe paan pe e Nyiɛkpɔɔ. Mi wi e Tafun Nyiɛkpɔɔ wre.”