Srawɔfɛɛnlɛ Pre Cheche Pee
21
O Tafun Nyiɛkpɔɔ na yo Moses pan mbo, “Yo Aaron bibilɛ srawɔfɛɛnlɛ pre pan na, na leele pre wa ku, srawɔfɛɛnlɛ pre waa shia sɛ u kumu na mbe uyɛ tɔ na nɛɛrɛ ni, 2 la, u ndro soo rɛ, we jaa sɛ u kumu na, na u lo, ndee u lɛ, ndee u biblɔ, ndee u bichlɔ, ndee u chunu, ndee u nyjɔ wi. 3 A na u jaa ŋmba u n leŋge tun wi, ŋga u n blɔ ni, a wre u u le kre ndra na, we jaa sɛ u kumu na mbe uyɛ tɔ nɛɛrɛ ni. 4 Waa shia uyɛ tɔ na nɛɛrɛ ni leele mblɛ pe mbra u na leŋge haa pre wa kumu lawee sɛɛ ni. 5 Srawɔfɛɛnlɛ pre wa waashia u ndra klu, ndee mbe u nyutanyooro knumu mbe yɛ ti, ndee mbe u wejiŋge knumu mbe ki nyina na kumu u pini. 6 Ki fna mbe pe pe cheche mbe mi Nyiɛkpɔɔ ŋga, mbe pia ni mɛɛ kla. Ŋgi na hin? Pre pe sro sra sroi sragbunu na, na mi pe Tafun Nyiɛkpɔɔ wre kaan, kena ki fna mbe pe pe cheche. 7 Srawɔfɛɛnlɛ pre waashia chiɛlɛ mblɛ pe tiɛri leŋge mbe peyɛ tɔ na nɛɛrɛ ni, ndee mbe chiɛlɛ mblɛ pilɛ pe pe je wru mbe leŋge, ŋgi na hin? Srawɔfɛɛnlɛ pre pe cheche mu mi Nyiɛkpɔɔ ŋga. 8 Leele pre fna mbe srawɔfɛɛnlɛ le na pe pe cheche, ŋgi na hin? Pre pe sro sra woni na ni Nyiɛkpɔɔ kaan. Kena e pe le na pe pe cheche, ŋgi na hin? Mi e Tafun Nyiɛkpɔɔ wre ni pe cheche, a mi ni e pini cheche. 9 Na srawɔfun bichlɔ waa na tiɛri mu uyɛ tɔ na nɛɛrɛ ni, kena u u lɛ yiɛ le nyumu, ki fna mbe pe u sro mbe gbo.10 Srawɔfun Lopom titi ŋmba pe wɔ u wolo nu, mu olive simi kna mu wo u na, mu u le srawɔfun, mbe wra srawɔfun dodonyi yire leni wre n fna mbe u ndra ti mbe wa ki saanri, ndee mbe u dodoŋgi tini mbe wla uyɛ na, mbe ki nyina na kumu u pini. 11 A ki n fna mbe u le lawee ŋga nu pe gboo tɛɛ. A waa shia uyɛ tɔ na nɛɛrɛ ni, hali na u lɛ, ndee u lo gboo wi. 12 A na waa ni Sumindoo cheche kre ti, maa sɛ lawee ŋga nu pe gboo tɛɛ nu, kena u wre titi, na cheche ndoo kre tɔ nɛɛrɛ ni, ŋgi na hin? Ni srawɔfun lopom titi wi. Mi wi u Tafun Nyiɛkpɔɔ.
13 Chlɔ ŋmba u n blɔ chin, wre ki fna mbe srawɔfun leŋge. 14 Waashia lekuchɔ leŋge, ndee mbe chlɔ ŋmba u leŋge mu je leŋge, ndee mbe chlɔ tiɛrifun wru mbe leŋge, la, chlɔ ŋmba u yiri u leele nu, a u n blɔ chin ki fna mbe u leŋge. 15 Na ki pan ma, kre u nanae we jaa ni tnumu kre tun mbe ni sumi. E sɔɔnri na mi wi e Tafun Nyiɛkpɔɔ, a mi ni srawɔfun wre wɔ mu u pe cheche.”
16 O Tafun Nyiɛkpɔɔ na yo Moses pan mbo, 17 “Yo Aaron pan, na u nanae mblɛ pie yiri mbakɔ kre, ŋmba waa pe yaŋu kpan, waashia sro sra wɔ mbe ni ŋga, hali mu sɛ su nyjila kro nu. 18 Lewo ŋmba na yira sisaa nyi, waa shia sra wɔ mbe ni ŋga. Na fuun wi, ndee na u fuuru, ndee na u kokoo ka ki tlo, ndee mu klo, 19 ndee na u kɛ, ndee u jele ki n nyu, 20 ndee na chanchan ki u yile, ndee na lechiriwi wi, ndee na u nyini ki ja, ndee ndee na klafun wi, ndee na blɔ ŋmba pe san wi. 21 Srawɔfun Aaron nanae pre ŋmba na yira nyjɛ ka we to kro, waashia sra wɔ mbe mi e Tafun Nyiɛkpɔɔ wre ŋga. Ŋgi na hin? Yaŋu wi, a ki n fna mbe u sro wɔ mbe mi Nyiɛkpɔɔ ŋga. 22 Na wa pe ma, we ja mbe sro ŋga ki pe cheche, na sro ŋga ki pe cheche titi ŋga pe pe mu Nyiɛkpɔɔ ŋga kre ka ka. 23 La, ŋga yira fun wi kre ndra na, waa shia da yoŋgo ŋga pe paari cheche ndoo wa kre na, ndee mbe da sragbunu kre na, mbaa kɔɔ sumi ndoo kre tɔ na nɛɛrɛ ni. Mi wi e Tafun Nyiɛkpɔɔ ŋmba ni yire yirɛ yire pe cheche.”
24 Moses na yire kee nyjɛ krɛrɛ yo Aaron na u bibilɛ pre, na Israel leele pre kro pan.